ЦАВӔР фарны кой кӕнӕм? Бирӕтӕм афтӕ кӕсы, ӕмӕ нӕлгоймаджы сӕйраг хӕс у йӕ бинонты дарын. Фӕлӕ кӕд иуӕй-иу устытӕ ницы цух вӕййынц, уӕддӕр сӕ зӕрдӕты фарн нӕ вӕййы, суанг ма тӕрсгӕ дӕр фӕкӕнынц. Зӕгъӕм, иу сылгоймаг Розӕ Испанийӕ йӕ лӕджы тыххӕй дзуры: «Адӕмимӕ-иу уыд тынг фӕлмӕн, хӕдзары та – бирӕгъ». Джой Нигерийӕ зӕгъы: «Мӕ лӕгимӕ-иу разы куы нӕ уыдтӕн, уӕд-иу мын загъта: „Ӕз дӕ лӕг дӕн, ӕмӕ дын цыдӕриддӕр зӕгъон, уый хъуамӕ аразай!“».

Нӕлгоймагӕн йӕ бон куыд у йӕ хӕстӕ ӕххӕстгӕнгӕйӕ фӕлмӕнӕй архайын? Лӕджы цы аразын хъӕуы, цӕмӕй йӕ хӕдзары фарн уа, кӕнӕ йӕ хӕдзар «ӕнцойдзинады» бынат уа? (Руф 1:9).

Кӕд лӕг дӕр ӕмӕ ус дӕр Хуыцауы раз ӕмсӕр сты, уӕддӕр сыл Библимӕ гӕсгӕ бинонты ’хсӕн ис хицӕн хӕстӕ. Ромӕгтӕм 7:2 фыст ис, моймӕдзыд сылгоймаг кӕй цӕры «йӕ сӕрыхицауы закъонмӕ» гӕсгӕ. Бирӕ организациты кӕйдӕр хистӕрӕй куыд сӕвӕрынц, афтӕ бинонты ’хсӕн дӕр ис хистӕр – нӕлгоймаг. Хистӕрӕй та йӕ сӕвӕрдта Хуыцау (1 Коринфӕгтӕм 11:3). Лӕг хъуамӕ йӕ бинонтӕн разамынд дӕтта.

Лӕгтӕ, Хуыцау уын цы бартӕ радта, уыдонӕй куыд хъуамӕ пайда кӕнат? Библи зӕгъы: «Уӕ устыты алкӕддӕр уарзут, Чырысти дӕр ӕмбырд куыд бауарзта» (Ефесӕгтӕм 5:25). Кӕд Йесо Чырыстийӕн бинойнаг никуы уыд, уӕддӕр дын йӕ цӕвиттон баххуыс кӕндзӕн, цӕмӕй хорз цардӕмбал суай. Ӕркӕсӕм, куыд.

Йесо иннӕтӕн уыд ныфсы хос ӕмӕ сын сӕ уаргъ рог кодта. Йесо ӕфхӕрд ӕмӕ ныфссаст адӕмӕн загъта: «Уе ’ппӕт дӕр мӕм ӕрцӕут, ӕмӕ уын ӕз удӕнцой ратдзынӕн» (Матфейы 11:28, 29). Уый адӕмы сӕ низтӕй дзӕбӕх кодта ӕмӕ сын сӕ уырнындзинад дӕр фидар кодта. Ӕмӕ диссаг нӕу, Йесомӕ бирӕтӕ сӕхи кӕй ластой. Фидарӕй йӕ зыдтой, сӕ уаргъ сын кӕй фӕрогдӕр кӕндзӕн!

Лӕгтӕн сӕ бон куыд у Йесойы бафӕзмын. Агур фадӕттӕ дӕ цардӕмбалы уаргъ фӕрогдӕр кӕнынӕн. Сылгоймӕгтӕй чидӕртӕ сӕхи хатынц Розӕйау, уый хъаст кӕны: «Мӕ лӕгӕн ӕххуырстӕй уӕлдай нӕ уыдтӕн». Фӕлӕ лӕгтӕ се ’ппӕт ахӕм не сты. Квэку йӕ усимӕ у амондджын, уый дзуры: «Мӕ цардӕмбалы арӕх бафӕрсын, цӕмӕй дӕм фӕкӕсон, зӕгъгӕ. Бирӕ йӕ кӕй уарзын, хӕдзары хъуыддӕгтӕ кӕнынӕн дӕр ын уый тыххӕй феххуыс кӕнын».

 Йесо адӕммӕ йӕ хъус дардта ӕмӕ сын тӕригъӕд кодта. Иу мӕгуыр сылгоймаг 12 азы рынчын уыд уӕззау низӕй. Ӕмӕ, Йесойӕн йӕ бон диссӕгтӕ аразын кӕй у, уый куы фехъуыста, уӕд йӕхицӕн загъта: «Йӕ уӕлӕдарӕсыл дӕр ын куы андзӕвон, уӕд дӕр сдзӕбӕх уыдзынӕн». Ӕмӕ нӕ фӕрӕдыд! Йесомӕ ’ввахс бацыд, йӕ уӕлӕдарӕсы хаутыл ын андзӕвыд, ӕмӕ йӕ низ уайтагъд фесӕфт. Уым чи уыд, уыдонӕй, ӕвӕццӕгӕн, чидӕртӕ ахъуыды кодтой, ацы сылгоймаг йӕ ныфс цӕмӕты хӕссы, зӕгъгӕ. Фӕлӕ Йесо ӕмбӕрста, афтӕ йӕ фыртыхстӕй кӕй бакодта *. Ӕмӕ йын фӕлмӕнӕй загъта: «Мӕ чызг... Дӕ удхайраг низӕй макуыуал схъӕрз». Йесо йӕм адӕмы не ’ркӕсын кодта ӕмӕ йӕм хыл дӕр нӕ фӕкодта, фӕлӕ йын йӕ уавӕр бамбӕрста. Афтӕмӕй равдыста, тӕригъӕдгӕнаг нӕлгоймаг кӕй уыд, уый (Марчы 5:25–34).

Лӕгтӕн сӕ бон куыд у Йесойы бафӕзмын. Дӕ цардӕмбал йӕхи ӕвзӕр куы хата, уӕд ӕм дӕ хъус тынгдӕр дар ӕмӕ фӕразондӕр у. Бацархай, цӕмӕй бамбарай, цавӕрдӕр хъуыддагмӕ ахӕм цӕстӕй цӕмӕн кӕсы ӕмӕ йӕхи афтӕ цӕмӕн дары. Зӕгъӕм, Рикардо ахӕм ныхӕстӕ  загъта: «Куы фенын, ӕмӕ мӕ цардӕмбалмӕ алы ныхас дӕр хъыг кӕсын райдайы, уӕд уӕлдай тынгдӕр бацархайын, цӕмӕй ахӕмӕй мацы зӕгъон, ӕмӕ йын ноджы зындӕр уа».

Йесо йӕ ахуыргӕнинӕгтимӕ ныхас кодта. Йесо-иу йе ’мбӕлттимӕ зӕрдӕйӕ-зӕрдӕмӕ ныхас кодта. «Мӕ Фыдӕй цыдӕриддӕр фехъуыстон, уый уын раргом кодтон»,– загъта сын уый (Иоанны 15:15). Кӕй зӕгъын ӕй хъӕуы, Йесо-иу хатт иунӕгӕй дӕр уыд, цӕмӕй ахъуыды кодтаид ӕмӕ-иу Хуыцаумӕ скуывтаид. Фӕлӕ-иу арӕх йӕ ахуыргӕнинӕгтӕн, йӕ зӕрдӕйы цы уыд, уыдӕттӕ дзырдта. Фыдгӕнӕгау ӕй цы ӕхсӕв хъуамӕ амардтаиккой, уый размӕ сын загъта, цӕуыл тыхсти, уый тыххӕй: «Мӕ уд дудгӕ рыст кӕны» (Матфейы 26:38). Кӕд-иу Йесойӕн йе ’мбӕлттӕ сӕ хъуыддӕгтӕй йӕ ныфс асастой, уӕддӕр сӕм мадзуратӕ никуы кодта (Матфейы 26:40, 41).

Лӕгтӕн сӕ бон куыд у Йесойы бафӕзмын. Дӕ цардӕмбалӕн дзур, цӕуыл хъуыды кӕныс ӕмӕ дӕ зӕрдӕйы цы ис, уый. Сылгоймаг, чи зоны, хъаст кӕна, йӕ лӕг адӕмимӕ зӕрдиагӕй кӕй фӕныхас кӕны, хӕдзары та дзы ныхас дӕр кӕй не сласдзынӕ. Фӕлӕ ӕндӕрхуызон дӕр вӕййы. Аннӕ йӕ лӕгимӕ зӕрдӕйӕ-зӕрдӕмӕ куы фӕныхӕстӕ кӕны, уӕд ыл базыртӕ базайы. Мӕнӕ цы загъта: «Бамбарын ӕй, ӕцӕгдӕр мӕ кӕй уарзы, ӕмӕ мӕ зӕрдӕйӕн ноджы адджындӕр свӕййы».

Раст нӕ уаид, дӕ маст райсыны тыххӕй дӕ цардӕмбалимӕ мадзуратӕ куы кӕнис. «Мӕ лӕг-иу мӕм куы смӕсты, уӕд-иу мӕм цалдӕр боны дӕр дзыхӕй нал дзырдта. Архайдта-иу, цӕмӕй мӕхи аххосджыныл нымадтаин ӕмӕ мӕ йӕ удхӕссӕг кӕй федта, уый-иу мын ӕмбарын кодта». Фӕлӕ ис ӕндӕр цӕвиттон дӕр. Зӕгъӕм, Эдвин Йесойы фӕзмы. Уый дзуры: «Истӕуыл куы смӕсты вӕййын, уӕд мӕ маст уайтагъд не скалын, фӕлӕ хуыздӕр кӕд уыдзӕн аныхас кӕнын, уыцы рӕстӕгмӕ банхъӕлмӕ кӕсын».

Статьяйы райдианы кӕй кой кодтам, уыцы сылгоймаг Джой бафиппайдта, йӕ лӕг Йегъовӕйы Ӕвдисӕнтимӕ Библи ахуыр кӕнын куы райдыдта, уӕдӕй фӕстӕмӕ тынг кӕй фӕивта. Джой зӕгъы: «Хуыздӕр адӕймаг сси ӕмӕ архайы, цӕмӕй Йесойы фӕзма ӕмӕ мӕ тынгдӕр уарза». Милуангай бинонты цард фӕхуыздӕр Библийы фӕрцы. Дӕу дӕр фӕнды, ӕмӕ дӕ бинонты цард фӕхуыздӕр уа? Дӕ бон у Йегъовӕйы Ӕвдисӕнтӕй искӕмӕн зӕгъын, ӕмӕ демӕ Библи лӕвар ахуыр кӕнын райдайой.