1 Коринфӕгтӕм 16:1—24
16 Зӕгъын мӕ фӕнды, сыгъдӕджытӕн+ цы ӕхца ӕмбырд кӕнут+, уый тыххӕй: Галатийы+ ӕмбырдтӕн куыд бафӕдзӕхстон, сымах дӕр афтӕ кӕнут.
2 Алчидӕр-иу уӕ къуырийӕн йӕ фыццаг бон*, цы йӕм ис, уымӕй хицӕнӕй сӕвӕрӕд, йӕ къух цас амоны, уыйбӕрц, цӕмӕй уӕм куы ’рцӕуон, уӕд уын сӕ ма хъӕуа ӕмбырд кӕнын.
3 Куы уӕм ӕрцӕуон, уӕд, фыстӕджыты кӕй тыххӕй ныффыссат, ӕууӕнкджын сты, зӕгъгӕ+, уыдоны арвитдзынӕн, цӕмӕй уын уӕ рӕдау лӕвар Иерусалиммӕ фӕхӕццӕ кӕной.
4 Фӕлӕ кӕд мӕн дӕр бахъӕуа ацӕуын, уӕд мемӕ ацӕудзысты.
5 Цӕугӕ та уӕм ӕркӕндзынӕн, Македонийыл куы ахизон, уӕд, уымӕн ӕмӕ мӕ фӕндаг Македонийыл+ уыдзӕн.
6 Ӕмӕ уӕм, ӕвӕццӕгӕн, иуцасдӕр баззайдзынӕн, йе та, чи зоны, зымӕг дӕр сымахмӕ арвитон, цӕмӕй мӕ уый фӕстӕ, кӕдӕм цӕуон, уырдӕм иу гыццыл ахизын кӕнат+.
7 Нӕ мӕ фӕнды, цӕмӕй уӕм фӕндагыл цӕугӕйӕ ӕнӕуи бауайон, фӕлӕ кӕд Йегъовӕ+ зӕгъа+, уӕд мӕ ныфс ис, ӕмӕ уемӕ иуцасдӕр кӕй баззайдзынӕн+.
8 Ефесы+ та уыдзынӕн Фӕндзайӕм боны бӕрӕгбонмӕ,
9 уымӕн ӕмӕ мын лӕггад кӕнынӕн стыр дуар байгом+, фӕлӕ ныхмӕлӕуджытӕ дӕр бирӕ ис.
10 Фӕлӕ уӕм кӕд Тимофей+ ӕрцӕуа, уӕд бацархайут, цӕмӕй йӕ ныфс ма асӕтта, уымӕн ӕмӕ уый дӕр мӕнау Йегъовӕйы+ хъуыддаг кӕны.
11 Уымӕ гӕсгӕ йыл ӕнӕрвӕссон мачи кӕнӕд+. Иу гыццыл-иу ӕй ахизын кӕнут, цӕмӕй мӕм ардӕм ӕрцӕуа, уымӕн ӕмӕ йӕм ӕфсымӕртимӕ ӕнхъӕлмӕ кӕсӕм.
12 Не ’фсымӕр Аполлосы+ тыххӕй та мӕ уый зӕгъын фӕнды, ӕмӕ йын тынг ныллӕгъстӕ кодтон, цӕмӕй уӕм ӕфсымӕртимӕ ацӕуа. Фӕлӕ йӕ ныртӕккӕ нӕ бафӕндыд. Фадат ын куы фӕуа, уӕд уӕм ӕрцӕудзӕн.
13 Уӕдӕ ма бафынӕй ут+, уырнындзинады фидар лӕуут+, ут хъӕбатыр*+ ӕмӕ фидар+.
14 Алцыдӕр аразут уарзгӕйӕ+.
15 Фӕдзӕхсын уын, ме ’фсымӕртӕ: сымах ӕй зонут, Ахайы бӕстӕйы фыццаг+ Стефаны хӕдзаронтӕ кӕй баууӕндыдысты ӕмӕ сӕ хъарутӕ иууылдӕр сыгъдӕджытӕн лӕггад кӕнынмӕ кӕй радтой+.
16 Сымах дӕр ахӕм адӕймӕгтӕн сӕ коммӕ кӕсут, стӕй, немӕ чи кусы ӕмӕ чи фыдӕбон кӕны, уыдонӕй алкӕй коммӕ дӕр+.
17 Ӕз та тынг цин кӕнын, Стефан+, Фортунат ӕмӕ Ахаик мемӕ кӕй сты, ууыл, раст цыма сымах стут мемӕ, афтӕ.
18 Уыдон барӕвдыдтой мӕ зӕрдӕ*+ дӕр ӕмӕ уӕ зӕрдӕтӕ дӕр. Уымӕ гӕсгӕ ахӕм адӕймӕгтӕн аргъ кӕнут+.
19 Салӕмттӕ уын ӕрвитынц, Азийы* цы ӕмбырдтӕ ис, уыдон+. Зӕрдиаг чырыстон салӕмттӕ уын ӕрвитынц Акилӕ ӕмӕ Прискӕ* дӕр, сӕ хӕдзары+ чи ӕмбырд кӕны, уыдонимӕ иумӕ.
20 Ӕфсымӕртӕ уын иууылдӕр салӕмттӕ ӕрвитынц. Салам дӕтгӕйӕ-иу кӕрӕдзийӕн ӕфсымӕртау апъа кӕнут+.
21 Мӕ салӕмттӕ уӕм ӕз, Павел, фыссын мӕхи къухӕй+.
22 Нӕ Хицауы чи нӕ уарзы, уый та ӕлгъыст фӕуӕд+. О нӕ Хицау, ӕрцу!+
23 Нӕ Хицау Йесойы стыр хорзӕхӕй хайджын ут.
24 Ӕз уе ’ппӕты дӕр, Йесо Чырыстиимӕ иудзинады чи ис, уыдоны бирӕ уарзын.
Фиппаинӕгтӕ
^ Комк. «лӕгдзинад уӕм уӕд».
^ Грекъ. пне́вма. Кӕс Уӕлӕмх. 7.
^ Хуыйны ма «Прискиллӕ» дӕр.
