Хуыцау ӕххуыс кӕны, йӕ фӕндонмӕ гӕсгӕ ӕмӕ йӕм зӕрдӕбынӕй чи кувы, уыдонӕн. Кӕд Хуыцаумӕ никуы куывтай, уӕд дӕ ныфс бауадздзысты, Хуыцауӕй ӕххуыс чи куырдта, уыцы адӕмы цӕвиттонтӕ Библийӕ. Зӕгъӕм:

•   «Баххуыс мын кӕн, о Йегъовӕ, мӕ Хуыцау, фервӕзын мӕ кӕн де ’нувыд уарзтмӕ гӕсгӕ» (Псалом 109:26).

•   «Фехъус мӕ, о Йегъовӕ, ӕмӕ мын дӕ хорзӕх ратт. О Йегъовӕ, ӕххуысгӕнӕг мын у» (Псалом 30:10).

 Кӕй зӕгъын ӕй хъӕуы, ацы ныхӕстӕ чи ныффыста, уыцы адӕймаг Хуыцауыл тынг ӕууӕндыд. Фӕлӕ Хуыцау хъусы, «зӕрдӕсаст» кӕнӕ «ныфссаст чи у», ахӕм сыгъдӕгзӕрдӕ адӕмы куывдтытӕ дӕр (Псалом 34:18).

 Афтӕ ма хъуыды кӕн, ӕмӕ Хуыцау махӕй тынг дард у ӕмӕ ныл ӕппындӕр нӕ тыхсы. Библийы фыст ис: «Йегъовӕ бады бӕрзондыл, фӕлӕ сӕрныллӕг адӕймаджы уыны, сӕрбӕрзонд чи у, уыимӕ та йын иумӕйагӕй ницы ис» (Псалом 138:6). Чырысти та иухатт йӕ ахуыргӕнинӕгтӕн загъта: «Сымахӕн... уӕ сӕрыхъуынтӕ дӕр иууылдӕр нымад сты» (Матфейы 10:30). Хуыцау дӕу тыххӕй зоны, дӕхӕдӕг дӕхи тыххӕй кӕй нӕ зоныс, суанг ахӕм лыстӕг хабӕрттӕ дӕр. Уӕдӕ истӕуыл куы тыхсай ӕмӕ йӕм куы кувай, уӕд дӕ куыннӕ хъумӕ фехъуса! (1 Петры 5:7)