Ницы. Цалдӕр миназмӕ Библи бирӕ хӕттыты рафыстой, фысгӕ та-иу ӕй кодтой, бирӕ чи нӕ лӕууыд, ахӕм ӕрмӕджытыл. Фӕлӕ уӕддӕр, зӕгъӕн ис, ӕмӕ дзы ницы фӕивта. Ӕмӕ ахӕм хатдзӕг иртасджытӕ скодтой, рагон къухфыстытӕ кӕрӕдзиимӕ куы абарстой, уӕд.

 Нырмӕ Библийы рагон къухфыстытӕй ссардтой мингӕйттӕ. Иуӕй-иуты дзы ис цавӕрдӕр хицӕндзинӕдтӕ, ӕмӕ уый ууыл дзурӕг у, ӕмӕ-иу сӕ куы рафыстой, уӕд-иу дзы скодтой рӕдыдтытӕ. Уыцы хицӕндзинӕдтӕн сӕ фылдӕр ахӕм стыр не сты ӕмӕ текстӕн йӕ хъуыды нӕ фӕивтой. Фӕлӕ дзы разынд цалдӕр стыр хицӕндзинады. Ӕмӕ, куыд зыны, афтӕмӕй уыдонӕй кӕцыдӕртӕ сты, кӕддӕр барӕй текстмӕ хаст чи ’рцыд, ахӕм ивындзинӕдтӕ, уымӕн ӕмӕ кӕйдӕр фӕндыд, Библийы цы хъуыдытӕ ис, уыдон фӕивын. Ӕркӕсӕм дыууӕ цӕвиттонмӕ.

1.   1 Иоанны 5:7 стихы иуӕй-иу рагон тӕлмацты ис ахӕм ныхӕстӕ: «Ӕртӕ ӕвдисӕны лӕууынц арвыл: Фыд, Дзырд ӕмӕ Сыгъдӕг Уд; ӕмӕ ацы ӕртӕ сты иу». Фӕлӕ, ӕууӕндӕн кӕуыл ис, уыцы къухфыстытӕй базонӕн ис, ацы ныхӕстӕ дзы райдианы кӕй нӕ уыдысты. Фӕстӕдӕр сӕ бафтыдтой a. Уымӕ гӕсгӕ, Библийы нырыккон тӕлмацтӕй ӕууӕндӕн кӕуыл ис, уыдоны ацы ныхӕстӕ не сты.

2.   Хуыцауы ном Библийы рагон къухфыстыты ӕмбӕлы цалдӕр мин хатты. Фӕлӕ йӕ бирӕ тӕлмацты баивтой дзырдтӕ «Хицау» кӕнӕ «Хуыцау»-ӕй.

 Нырмӕ тынг бирӕ къухфыстытӕ ссардтой. Ӕмӕ кӕд Библийы кӕцыдӕр къухфыстыты рӕдыдтытӕ ис, уӕд сӕ ныртӕккӕ бирӕ ӕнцондӕр у ссарын b. Уыцы къухфыстытӕ кӕрӕдзиимӕ куы абарай, уӕд цы ис базонӕн, Библийы нырыккон тӕлмацтӕ раст сты ӕви нӕ, уый тыххӕй?

•   Дзуттаг Фыстыты тыххӕй (арӕх ма сӕ фӕхонынц Рагон Фӕдзӕхст дӕр) ахуыргонд Уильям Грин загъта: «Нӕ бон у фидарӕй зӕгъын, ӕмӕ, раджы заманты цы ныффыстой, уыдӕттӕй нӕм уый хуызӕн ӕнӕ ивындзинӕдтӕй ӕндӕр никӕцы чиныг ӕрхӕццӕ».

•   Чырыстон Грекъаг Фыстыты, кӕнӕ Ног Фӕдзӕхсты, тыххӕй библииртасӕг Фредерик Брюс ныффыста: «Ног Фӕдзӕхст ӕууӕнчы аккаг кӕй у, уымӕн бирӕ фылдӕр бӕлвырдгӕнӕнтӕ ис, зындгонд рагон фысджыты уацмыстӕ ӕууӕнчы аккаг кӕй сты, уымӕй. Фӕлӕ уыдон ӕууӕнчы аккаг кӕй сты, ууыл ничи фӕдызӕрдыг кӕны».

•   Фредерик Кеньон, Библийы къухфыстыты зындгонд иртасӕг, загъта, зӕгъгӕ, адӕймаг «йӕ къухмӕ Библи куы райса, уӕд йӕ бон уыдзӕн фидарӕй ӕмӕ ӕнӕдызӕрдыгӕй зӕгъын, йӕ къухы ӕцӕгдӕр Хуыцауы Ныхас кӕй ис ӕмӕ нӕм фӕлтӕрӕй-фӕлтӕрмӕ цӕугӕйӕ ӕнусты сӕрты кӕй ӕрхӕццӕ, бирӕ дзы ницы фӕивта, афтӕмӕй».

•   Дзуттӕгтӕй ӕмӕ-иу чырыстӕттӕй Библийы чингуытӕ чи рафыста, уыдон-иу дзы нӕ айстой, Хуыцауы адӕмы стыр рӕдыдтыты кой кӕм уыд, уыцы скъуыддзӕгтӕ (Нымӕцтӕ 20:12; 2 Самуилы 11:2–4; Галатӕгтӕм 2:11–14) c. Уӕдӕ дзы дзуттӕгты ӕгоммӕгӕсдзинады кой кӕм ис, стӕй адӕмы ӕрымысгӕ ахуырӕдтӕ хурмӕ чи хӕссы, уыцы скъуыддзӕгтӕ дӕр, куыд уыдысты, афтӕ рафыстой (Оси 4:2; Малахи 2:8, 9; Матфейы 23:8, 9; 1 Иоанны 5:21). Уыцы скъуыддзӕгты кӕй ницы фӕивтой, уымӕй равдыстой, ӕууӕнкджын кӕй уыдысты ӕмӕ Хуыцауы сыгъдӕг Ныхасӕн тынг кӕй аргъ кодтой.

•   Кӕд Хуыцау Библи йӕ сыгъдӕг тыхы фӕрцы ныффыссын кодта, уӕд ӕй уый фӕстӕ дӕр нӕ хъахъхъӕдтаид, цӕмӕй дзы хъуыдытӕ ивд ма ’рцыдаиккой? d (Исай 40:8; 1 Петры 1:24, 25). Уый йӕ Ныхас ӕрмӕст раджы заманты цӕрӕг адӕмы пайдайӕн нӕ ныффыссын кодта, фӕлӕ абон мах пайдайӕн дӕр (1 Коринфӕгтӕм 10:11). Библи зӕгъы: «Раздӕр цыдӕриддӕр фыст ӕрцыд, уый та фыст ӕрцыд махӕн зонд бацамонынӕн, цӕмӕй нӕ нӕ фидардзинады фӕрцы ӕмӕ, Фыстад цы удӕнцой дӕтты, уый фӕрцы уа ныфс» (Ромӕгтӕм 15:4).

•   Йесо Чырысти ӕмӕ-иу йӕ фӕдылдзӕуджытӕ ӕрхастой ныхӕстӕ Дзуттаг Фыстытӕй ӕмӕ никуы дызӕрдыг кодтой, уыцы рагон тексттӕ ӕууӕнчы аккаг кӕй сты, ууыл (Лукайы 4:16–21; Хъуыддӕгтӕ 17:1–3).