Еци Ӕвдесӕнтӕ айдагъ адӕнмӕ н’ адтӕнцӕ хӕларзӕрдӕ, фал ма мӕ куйтӕмӕ дӕр. Еухатт стенди хӕццӕ лӕудтӕй еу кизгӕ, Элейн, зӕгъгӕ, ӕма мин мӕ куйтӕн еу цалдӕр печений равардта. Гъема уой фӕсте алли хатт дӕр паркмӕ ку рацӕуианӕ, уӕд мӕ мӕ куйтӕ еци стенди размӕ ивазтонцӕ.

Гъе уотӕ адтӕй цалдӕр мӕйей дӕргъи. Еци стенди рази мӕ куйтӕн алли хатт дӕр ести адгийнаг раттиуонцӕ, ӕз ба Ӕвдесӕнти хӕццӕ естӕбӕлти радзубандитӕ кӕнинӕ. Фал мӕ сӕ хӕццӕ берӕ дзорун дӕр нӕ фӕндадтӕй. Уӕд мӕбӕл 70 анземӕй фулдӕр цудӕй. Йегови Ӕвдесӕнтӕ ка ’нцӕ ӕма цӕбӕл ӕууӕндунцӕ, уомӕн рӕстмӕ зонгӕ дӕр неци кодтон. Рӕстдзийнадӕ агурдтон, фал киристон аргъауӕнтӕй фӕффудӕнгъӕл дӕн, гъема мӕхецӕн загътон, Библи мӕхуӕдӕг ке ахур кӕндзӕн.

Йегови Ӕвдесӕнти стендти хӕццӕ лӕугӕй горӕти ӕндӕр рауӕнти дӕр фӕууининӕ. Се ’гасдӕр хъӕбӕр зӕрдӕмӕдзӕугӕ адӕн адтӕнцӕ. Цийфӕнди фарста сӕмӕ ма раттинӕ – алкӕддӕр Библий фӕрци дзуапп кодтонцӕ. Уомӕй мин мӕ зӕрдӕ балхӕдтонцӕ ӕма сӕбӕл фулдӕр ӕууӕндун райдӕдтон.

Еухатт мин Элейн загъта: „Ӕвӕдзи, исарази уодзӕнӕ, цӕрӕгойтӕ Хуцауи лӕвар ке ’нцӕ?“ Ӕз ба ин уотӕ: „Дзубанди дӕр ибӕл нӕййес!“ Ӕма мин уӕд Библийӕй бакастӕй Исаййи 11:6–9. Гъе уой фӕсте мӕ фулдӕр базонун бафӕндадтӕй. Фал журнал ба уӕддӕр нӕ райстон.

Уой фӕсте ма Элейн ӕма ӕ сӕрихецау Брентти хӕццӕ цалдӕр хатти фембалдтӕн. Сӕ хӕццӕ берӕ некӕд дзоринӕ, фал мин ци фӕдздзориуонцӕ, е ба мӕ зӕрдӕмӕ хъӕбӕр цудӕй. Етӕ мин загътонцӕ, Евангелитӕ ӕма, дан, Гъуддӕгти киунугутӕ бакӕсӕ, цӕмӕй, дан, ӕй дӕхуӕдӕг зонай, киристӕнттӕ цӕхуӕнттӕ гъӕуама уонцӕ, уой. Гъема ӕз дӕр уотӕ бакодтон. Минкъий фӕстӕдӕр ба сӕ хӕццӕ Библи ахур кӕнунбӕл исарази дӕн. Е адтӕй 2016 анзи сӕрди.

Библий ахурмӕ ӕма ӕмбурдтӕмӕ алли къуӕре дӕр минкъий сувӕллони хузӕн ӕнгъӕлмӕ кастӕн. Библи ахур кӕнун мӕ бон ке ӕй, уой мӕхецӕн устур амонд ӕма арфӕдзийнадӕбӕл нимадтон. Анзӕй мӕбӕл минкъий фулдӕр рацудӕй ӕма донаргъуд райстон. Нур мӕбӕл 79 анзи цӕуй, ӕма ’й федарӕй зонун, рӕстдзийнади надбӕл ке цӕун. Йеговӕ мӕ устур кадӕй исхайгин кодта – ӕ бийнонтӕмӕ мӕ ӕрбакодта!»