Staka taem Bible kolem Jesus “Son bilong God.” (John 1:49) Datfala toktok “Son bilong God” showim God hem Creator, and hem givim laef lo evri samting, wea Jesus tu insaed diswan. (Sams 36:9; Revelation 4:11) Bible no storyim God hem dadi blo Jesus lo sem wei wea wanfala man garem pikinini lo wanfala woman.

 Bible kolem tu olketa angel “olketa son bilong trufala God.” (Job 1:6, NW) Bible storyim tu firstfala man, Adam, hem “son bilong God.” (Luke 3:38) Bat from Jesus hem first samting wea God creatim bifor eni nara creation blo hem and Jesus nomoa only wan wea God seleva creatim, Bible kolem hem barava important Son blo God.

•  Hao, Jesus stap lo heven bifor hem kam born lo earth?

•  Wat nao Jesus duim bifor hem kam lo earth?

 Yes. Jesus hem wanfala spirit wea stap lo heven firstaem bifor hem kam lo earth and born olsem man. Jesus sei: “Mi kam daon from heven.”—John 6:38; 8:23.

 God creatim Jesus bifor hem creatim eni nara samting. Diswan nao wanem Bible talem abaotem Jesus:

•   “Hem firstborn long evri samting wea God wakem.”—Colossae 1:15.

•   Hem nao “first samting wea God wakem.”—Revelation 3:14.

 Disfala profesi abaotem man “wea start kam from taem bifor, from olketa day bifor yet” hem kamap tru lo Jesus.—Micah 5:2, NW; Matthew 2:4-6.

 Hem garem hae position lo heven. Jesus storyim diswan taem hem prea. Hem sei: “Dadi, tekem mi go bak . . . long heven wea hem nao ples mi stap witim iu long bifor kam yet.”—John 17:5.

 Hem helpem Dadi blo hem for creatim evri nara samting. Jesus hem “nambawan wakaman” wea waka tugeta witim God. (Proverbs 8:30, NW) Bible storyim Jesus olsem: “God iusim hem for wakem evri nara samting long heven and long earth.”—Colossae 1:16.

 God iusim Jesus for creatim olketa nara samting olsem, evri angel and disfala universe. (Revelation 5:11) Hao God and Jesus waka tugeta hem olsem architect waka tugeta witim wanfala builder. Datfala architect creatim olketa design, then datfala builder wakem olketa samting followim olketa design hia.

 Hem datfala Word. Bible kolem Jesus “Word” taem hem stap lo heven. (John 1:1) Luk olsem, God iusim Son blo hem for talem olketa information and givim instruction lo olketa nara angel.

 Luk olsem, Jesus duim tu waka olsem Spokesman blo God for olketa man lo earth. Luk olsem God iusim Jesus, wea hem datfala Word, for givim instruction lo Adam and Eve lo garden blo Eden. (Jenesis 2:16, 17) Maet Jesus nao datfala angel wea leadim olketa Israelite lo wilderness and maet voice blo hem nao olketa Israelite mas obeyim.—Eksodas 23:20-23. a