Jaʼ, röj oj cristianos. Tatzʼetaʼ jujun naʼoj ri achoj ruma ke riʼ nqabʼij:

• Nqaxikʼ qiʼ richin nqakʼäm qanaʼoj chi rij ri Jesús chuqaʼ nqasamajij pa qakʼaslem ri xukʼüt kan rijaʼ (1 Juan 2:6).

• Qaniman chi ri Jesús rubʼanon jun nimaläj samaj richin yojkolotäj, ruma riʼ nqabʼij chi «kan majun chik achoj rikʼin nqïl wi kolotajïk. Ruma chi kan majun chik jun bʼiʼaj ri yaʼon ta pe chuwäch re ruwachʼulew richin [...] chi yojkolotäj» (Hechos 4:12, Nuevo Testamento en Cakchiquel Occidental).

• Toq xojok ruqʼalajrisanel ri Jehová, xojqasäx pa yaʼ pa rubʼiʼ ri Jesús (Mateo 28:18, 19).

• Yojchʼon rikʼin ri Dios pa rubʼiʼ ri Jesús (Juan 15:16).

• Nqanimaj chi ri Jesús kʼo pa kiwiʼ konojel ri achiʼaʼ (1 Corintios 11:3).

Ja kʼa, e kʼo naʼoj ri nubʼän chi man junan ta rubʼanik ri qanimanïk kikʼin chʼaqa chik (nikʼaj chik) molaj ri nkibʼij chi e cristianos. Jujun tzʼetbʼäl chi rij reʼ. Röj qaniman chi ri Jesús man junan ta rikʼin ri Dios, ri Jesús Rukʼajol ri Dios, achiʼel nubʼij ri Loqʼoläj Wuj (Marcos 12:29). Ruma riʼ man nqanimaj ta ri naʼoj Trinidad. Chuqaʼ, man nqanimaj ta chi toq jun winäq nkäm kʼa nkʼaseʼ na kan ri ranima. Nixta ta ri Loqʼoläj Wuj man nubʼij ta chi ri Dios yeruyaʼ ri winäq pa qʼaqʼ pa qʼij chi chaqʼaʼ. Chuqaʼ chi qawäch röj man ütz ta chi ri ukʼwäy taq bʼey pa taq religiones nyaʼöx jun kibʼiʼ richin nyaʼöx kiqʼij (Eclesiastés 9:5; Ezequiel 18:4; Mateo 23:8-10).