“Zao ty fotoa hampijanona ty aly noho fanafiha. Zao ty fotoa hifeheza tena,” hoy António Guterres, Sekretera Zeneralin’ny Firenena Mikambana, tamy 13 Avrily 2024.

 Anisan’ny raha malaza amy zao ty aly amy faritsy Antinana (Moyen-Orient) iny.

 “Miatriky koronta maro mandilatsy tamy Aly Bevata Faharoe iny tontolo toy henanizao, ka olo 2 tapitrisa tapitrisa, zany hoe ty ampahefan’olo an-tany etoy ro mipetraky amy pilasy misy aly rey any.”​—Filan-kevi-pilaminan’ny Firenena Mikambana, 26 Zanviè 2023.

 Retoa iaby ty anisan’ny firenena misy aly henanizao: Israely, Gaza, Syrie, Azerbaïdjan, Ukraine, Soudan, Ethiopie, Niger, Myanmar, noho Haïti. a

 Mbia avao vo ho tampitsy ty aly? Ho vitan’ny mpitondra reo va ty hampisy filamina? Ino ty volanin’ny Baiboly?

 Koronta amy tany toy iaby reo mampiseho fa, fa kely sisa le tsy hisy sasy ty aly. Mampiseho koa aly reo fa fa miay amy fotoa kaihin’ny Baiboly hoe “farani-zao tontolo zao” tsika.​—Matio 24:3.

•   “Haharè aly nareo sady hisy hivola aminareo koa hoe misy aly amy pilasy hafa any. . . . Hisy firenena hialy amy firenena, le hisy fanjakà hialy amy fanjakà.”​—Matio 24:6, 7.

 Laha teanao ho hay hoe manino ro manatanteraky ty faminanian’ny Baiboly ty fisian’ny aly, le vakio ty lahatsoratsy hoe “Inona ny Famantarana ny ‘Andro Farany’?”

 Fa nivola mialoha ty Baiboly fa ho tampitsy ty aly amy tany toy iaby. Ino ty raha hiseho? Tsy hoe ty ezaky atao ty olombelo ro hampisy filamina, fa hisy aly kaihy hoe Aramagedona zay hanampitsy ty aly. Io ro kaihin’ny Baiboly hoe “alini-andro bevata-Ndranahary, azy Farani-Ze Mahery iny.” (Apokalypsy 16:14, 16) Lafa tampitsy aly io, le hotanterahi-Ndranahary ty raha teany hatao, zany hoe ty hanome fiadana zisiky farany ty olombelo.​—Salamo 37:10, 11, 29.

 Laha teanao ho hay ty mikasiky an’ny ali-Ndranahary hanampitsy ty aly iaby io, le vakio ty lahatsoratsy hoe “Inona no Atao hoe Ady Aramagedona?”