Kɛ mɔɔ duma Belemgbunlililɛ Asalo kile la, Baebolo ngilehilelɛ titili mɔɔ bɛyɛ ye wɔ ɛkɛ la twe adwenle kɔ Nyamenle Belemgbunlililɛ ne​—edwɛkɛtile mɔɔ ɛnee Gyisɛse ɛzonlenlɛ gyima ne gyi zo la azo.​—Luku 8:1.

Ɛkɛ ne a nɔhalɛ ɛzonlenlɛ kɔ zo a. Ɛkɛ ne a bɛyɛ Belemgbunlililɛ edwɛkpa ne nolobɔlɛ nwo ngyehyɛleɛ a. (Mateyu 24:14) Asolo kɛzi Belemgbunlililɛ Asalo biala kpole de nee kɛzi bɛzi ye la, noko biala ɛnle hyeleenyi yɛɛ asafo mɔɔ bo ko la yia wɔ dɔɔnwo anu. Kenlensa ye yɛsisi Belemgbunlililɛ Asalo dɔɔnwo (bɛkyehyɛ nu a yɛsi nnu alehyenlɛ ko biala) amaa yɛ asafo ne mɔ mɔɔ ɛlɛso la anyia ɛleka ayia. Kɛzi yɛkola yɛyɛ ɛhye ɛ?​—Mateyu 19:26.

Ndoboa mɔɔ bɛye la a bɛfa bɛsi a. Bɛfa ndoboa ɛhye mɔ bɛnwa ɔfese ne amaa bɛava ezukoa bɛamaa asafo mɔɔ kulo kɛ si anzɛɛ siezie Belemgbunlililɛ Asalo bie la.

Menli mɔɔ vi ɛleka ngakyile mɔɔ tu bɛ nwo maa mɔɔ bɛndua bɛ kakɛ la a si a. Wɔ maanle dɔɔnwo anu, bɛlɛ Belemgbunlililɛ Asalo Ɛsisilɛ Ekpunli ngakyile. Wɔ maanle bie anu, suazilɛ azonvolɛ ekpunli nee menli mɔɔ ɛdu bɛ nwo ɛmaa la vi asafo ko anu kɔ fofolɛ nu, bɛkɔ namunamu nu bɔbɔ na bɛboa asafo mɔɔ wɔ ɛkɛ ne la bɛmaa bɛsi bɛ Belemgbunlililɛ Asalo. Wɔ maanle bie mɔ anu, bɛkpa Alasevolɛ mɔɔ fɛta la bɛmaa bɛnea suazilɛ nee Belemgbunlililɛ Asalo boɛyɛlɛ zo wɔ maanzinli bie anu. Menli dɔɔnwo mɔɔ ze suazilɛ nye zo kpalɛ la tu bɛ nwo maa wɔ sua biala ɛzilɛ nu ɛdeɛ, noko asafo ne anu amra a tu bɛ nwo maa yɛ gyima dɔɔnwo a. Gyihova sunsum ne nee mɔdenle mɔɔ ye menli ne fi ɛkɛla muala anu bɔ la maa ɛhye mɔ amuala yɛ boɛ.​—Edwɛne 127:1; Kɔlɔsaema 3:23.

• Kɛmɔti a bɛfɛlɛ ɛleka mɔɔ yɛsonle la Belemgbunlililɛ Asalo ɛ?

• Kɛzi yɛkola yɛsisi Belemgbunlililɛ Asalo wɔ ewiade amuala ɛ?