Gyisɛse ɛnle kɛ dasanli gyɛne biala la, ɛnee ɔwɔ anwuma kɛ sunsum nu abɔdeɛ kolaa na bɛawo ye wɔ azɛlɛ ye azo. (Dwɔn 8:23) Yemɔ a le Nyamenle abɔdeɛ mɔɔ limoa a, na ɔboale wɔ ninyɛne mɔɔ ɛha la kɔsɔɔti ɛbɔlɛ nu. Ɔ ngome a Gyihova angomekye bɔle ye a, ɛhye ati a bɛfɛlɛ ye Nyamenle Ara “mɔɔ ɔwole ye kokye la.” (Dwɔn 1:14) Ɛnee Gyisɛse le Nyamenle Kpɔmavolɛ, yemɔti eza bɛfɛlɛ ye “Edwɛkɛ ne.”​—Kenga Mrɛlɛbulɛ 8:22, 23, 30; Kɔlɔsaema 1:15, 16.

Nyamenle zoanle ɔ Ra ne wɔ azɛlɛ ye azo. Ɔyele ye ngoane ne ɔrawulale Dwuunli bɛlɛra bie mɔɔ ɛnze nrenyia mɔɔ bɛfɛlɛ ye Mɛle la awodeɛ nu. Ɔti Gyisɛse annyia selɛ mɔɔ le dasanli la. (Luku 1:30-35) Gyisɛse rale azɛlɛ ye azo (1) kɛ ɔbahilehile Nyamenle anwo nɔhalɛ ne, (2) kɛ ɔbayɛ kɛzi bɛgyinla ngyegyelɛ nloa bɛyɛ Nyamenle ɛhulolɛdeɛ la anwo neazo, na (3) yeava ye ngoane ne mɔɔ di munli la yeayɛ “ɛkpɔnedeɛ.”​—Kenga Mateyu 20:28.

Ɛkpɔnedeɛ le ezukoa mɔɔ bɛtua bɛdie awie amaa bɛangu ye la. (Ɛzɛdɔso 21:29, 30) Ɛnee ewule nee kpanyinliyɛlɛ ɛmboka Nyamenle bodane mɔɔ ɔlɛ ɔmaa alesama la anwo. Kɛzi yɛnwu ɛhye ɛ? Nyamenle hanle hilele Adam, sonla ne mɔɔ limoa la kɛ saa ɔyɛ mɔɔ Baebolo ne fɛlɛ ye “ɛtane” la a ɔbawu. Yemɔti, saa Adam anyɛ ɛtane a anrɛɛ ɔnrɛwu ɛlɛ. (Gyɛnɛsese 2:16, 17; 5:5) Kɛmɔ Baebolo ne kile la, ewule luale  Adam anwo zo a “rale” ewiade a. Ɛhye ati, Adam vale ɛtane nee nwolɛ ahatualɛ, ewule gyakyile ɔ bo zo amra kɔsɔɔti. Yɛhyia ɛkpɔnedeɛ mɔɔ balie yɛ avi ewule mɔɔ yɛnyianle yɛvile Adam ɛkɛ anu la.​—Kenga Wulomuma 5:12; 6:23.

Nwane a bahola adua ɛkpɔnedeɛ ne na yealie yɛ yeavi ewule nu a? Saa yɛwu a, yɛtua yɛdayɛ mumua ne yɛ ɛtane nwo kakɛ ala. Sonla mɔɔ ɛnli munli la ɛnrɛhola ɛnrɛdua awie mɔ ɛtane nwo kakɛ.​—Kenga Edwɛne 49:7-9.

Gyisɛse ɛnle kɛ yɛdayɛ la, ɔdi munli. Yeanyɛ ɛtane biala, ɔti ɛnee ɔngyia kɛ ɔwu. Noko ɔlua awie mɔ ɛtane ti Gyisɛse wule. Nyamenle lale ɛlɔlɛ kpole ali hilele alesama na ɔmaanle ɔ Ra ne rawule maanle yɛ. Gyisɛse noko nyianle yɛ nwo ɛlɔlɛ ɔlua ɔ Ze mɔɔ ɔdiele ye na ɔvale ye ngoane ɔkpɔdale yɛ ɛtane la azo.​—Kenga Dwɔn 3:16; Wulomuma 5:18, 19.

Nea Duzu Ati A Gyisɛse Wule A? vidio ne.

Mɔɔ Gyisɛse wɔ azɛlɛ ye azo la ɔyɛle wuliravolɛma ayile, ɔdwazole mowuamra, na ɔliele menli mɔɔ esiane ɛdo bɛ la. Ɔyɛle ɛhye ɔvale ɔhile mɔɔ ɔbayɛ yeamaa alesama kɔsɔɔti mɔɔ yɛ tieyɛ kenle bie la. (Mateyu 15:30, 31; Dwɔn 5:28) Gyisɛse wule la, Nyamenle dwazole ye rale ngoane nu kɛ sunsum nu abɔdeɛ. (1 Pita 3:18) Akee Gyisɛse hendɛle wɔ Nyamenle asa fema zo hɔkpulale kɛ Gyihova maanle ye tumi kɛ ɔli Belemgbunli wɔ azɛlɛ ye kɔsɔɔti azo la. (Hibuluma 10:12, 13) Kɛkala, Gyisɛse ɛlɛdi Belemgbunli wɔ anwuma, na ye ɛdoavolɛma ɛlɛbɔ edwɛkpa ɛhye nolo wɔ ewiade amuala.​—Kenga Daneɛle 7:13, 14; Mateyu 24:14.

Ɔnrɛhyɛ, Gyisɛse bava tumi mɔɔ ɔlɛ kɛ Belemgbunli la aye amaneɛnwunlɛ kɔsɔɔti nee menli mɔɔ fa ba la avi ɛkɛ. Menli kɔsɔɔti mɔɔ lɛ diedi wɔ Gyisɛse anu na bɛtie ye la banyia ngoane wɔ paladaese azɛlɛ zo.​—Kenga Edwɛne 37:9-11.