Bɛwole me wɔ Wulomu kandiba ɛleka bie mɔɔ ehyiavolɛma wɔ la. Ɛnee ɛbɛlabɔlɛ ɛnla aze. Ɛnee menze me mame mɔɔ wole me la yɛɛ me nee me papa avinli anyɛ kpalɛ ɛlɛ. Melɛnyi la menzukoale kɛzi bɛbɔ ɛbɛla wɔ ɛleka mɔɔ yɛ se la.

Mekali ɛvolɛ bulu la, ɛnee mebɔ ɔ bo kɛ mewua debie. Mekɛ mɔɔ lumua mɔɔ menriandile menvile sua nu la ɛnee meli ɛvolɛ 12. Wɔ mekɛ dɔɔnwo anu, ɛnee me papa kɔfa me wɔ kpolisima ɔfese na yeava me yeahɔ sua nu. Ɛnee meta mesu kpolera—ɛnee ninyɛne mɔɔ kɔ zo wɔ ewiade ne anu la ka me ɛya na meyɛ basabasa. Menlile ɛvolɛ 14 la, menvile sua nu bɔkɔɔ. Mendɔle gua zo na membɔle ɔ bo kɛ meno nyiletane. Kɛmɔ ɛnee menlɛ ɛleka mɔɔ meda la ati, ɛnee mebu kale anlenkɛ na meda nuhua toonwo nwonlomɔ mangyee ne. Akee mekpondɛ ɛleka mɔɔ nzule wɔ la na mebia.

Menwunle awule nye zo kpalɛ—ɛnee meze baage kpodi yɛɛ mewua azua mgbole nee ngyikyi nu nɔɔzo. Menliele duma ɛtane, eku bie mɔɔ ɛlie duma ɛtane la dole ɛsalɛ vɛlɛle me na ɔmanle “menyianle adenle” kɛ akee mewua wɔ bange nu. Kɛmɔ ɛnee me nye yɛ se la ati, yeangyɛ ɛnee bɛbu me kpalɛ wɔ eku ne anu. Ɛnee mengɔ mengyakyi me etu; nɔhalɛ nu, ɛnee meda a mefa meto me esumi ne abo. Ɛnee me ɛbɛlabɔlɛ ne gyi basabasayɛlɛ, nyiletane, debiewualɛ, ɛdendɛlɛ ɛtane yɛɛ ɛbɛlatane zo. Ɛnee dahuu kpolisima kpondɛ me. Bɛhyele me fane dɔɔnwo, na ɛvolɛ dɔɔnwo anu bɛdole me efiade na bɛyele me.

Mekɛ bie mɔɔ bɛyele me wɔ efiade la menyɛle kɛ mekakpɔla me ante ko. Ɛnee menze kɛ me ante nee ɔ mra nwiɔ ɛrayɛ Gyihova Alasevolɛ. Bɛhanle kɛ bɛ nee me kɔ Alasevolɛ ne mɔ debiezukoalɛ ne bie. Ɛnee mekpondɛ kɛ menwu debie, yemɔti me nee bɛ hɔle. Yɛdwule Belemgbunlililɛ Asalo ɛkɛ ne la, menganle ye biala kɛ metɛnla anlenkɛ ne anloa amaa meanwu menli mɔɔ ɛlɛwolo nee mɔɔ ɛlɛfinde la. Nɔhalɛ nu, ɛnee etu wɔ me nwo.

 Zɔhane debiezukoalɛ ne hakyile me subane. Mekakye kɛ ɛnee medwenle kɛ mewɔ ewiade fofolɛ nu. Bɛzelele na bɛzomanle me kɛnlɛma kɛ mele bɛ gɔnwo la. Kɛzi Alasevolɛ ne mɔ zelele kɛnlɛma la anwo nvoninli tɛbɔ me adwenle nu. Ɛnee ɛhye le ngakyile bɔkɔɔ wɔ ewiade ne mɔɔ mewɔ nu la anwo!

Membɔle ɔ bo kɛ me nee Alasevolɛ ne mɔ sukoa Baebolo ne. Mekɛ mɔɔ melɛsukoa debie la, menwunle ye kɛ ɔwɔ kɛ mekakyi me ɛbɛlabɔlɛ ne bɔkɔɔ. Mendiele edwɛkɛ mɔɔ wɔ Mrɛlɛbulɛ 13:20 la kɛ: “Sonla mɔɔ nee nrɛlɛbɛvolɛma tu la nwu nrɛlɛbɛ, na mɔɔ nee ahoasea tu la nwu ɔ nyunlu.” Menwunle kɛ ɔwɔ kɛ metwe me nwo mefi eku ne anwo. Ɛnee ɔnla aze, noko Gyihova moalɛ zo mengolale mengyakyile.

Eza menzieziele me nwo kɛnlɛma. Membɔle mɔdenle mengyakyile sigalɛte nee nyiletane ɛnlonlɛ. Mempepɛle me ti enrinli ndendenle ne, menyele me nzo nu asomadeɛ ne, na mengyakyile edwɛkɛ ɛtane ɛhanlɛ. Mekɛ mɔɔ lumua mɔɔ membɔle ɔ bo kɛ menea me ɛbɛlabɔlɛ zo boɛ la ɛne.

Me nye ɛnlie ɛgengalɛ nee debiezukoalɛ nwo, yemɔti ɛnee ɔyɛ se ɔmaa me kɛ me adwenle bahɔ Baebolo ɛzukoalɛ zo na meava meabɔ me ɛbɛla. Noko akee, membɔle nwolɛ mɔdenle la, ngyikyingyikyi menyianle Gyihova anwo ɛlɔlɛ, na debie bɔle ɔ bo kɛ ɔkakyi wɔ me nu—debie bɔle ɔ bo kɛ ɔgyegye me adwenle. Ɛnee meta mete nganeɛ ɛtane metia me nwo, na menyia adwenle kɛ Gyihova ɛnrɛva ɛtane dɔɔnwo ne mɔɔ meyɛ la ɛnrɛhyɛ me ɛlɛ. Zɔhane mekɛ ne anu, kɛzi Gyihova vale Belemgbunli Devidi ɛtane mgbole mɔɔ ɔyɛle hyɛle ye mɔɔ mengengale la kyekyele me rɛle.—2 Samoɛle 11:1–12:13.

Ɛnee ngyegyelɛ bieko a le me diedi ne mɔɔ meka nwolɛ edwɛkɛ meahile awie mɔ wɔ azua nu la. (Mateyu 28:19, 20) Ɛnee mesulo kɛ mebayia awie mɔɔ mekɛ bie membodale ye anzɛɛ menyɛle ye ɛtane wɔ adenle bie azo la! Noko ngyikyingyikyi mengolale menlile ɛzulolɛ ne azo konim. Membɔle ɔ bo menyianle ahunlundwolɛ kpalɛ kɛ mebaboa awie mɔ meamaa bazukoa yɛ anwuma Selɛ ne mɔɔ anwo yɛ nwanwane na ye fakyɛ ne le kpole la anwo debie.

Gyihova anwo debie mɔɔ menzukoale la liele me ngoane! Me gɔnwo mɔ dɛba dɔɔnwo ɛwu anzɛɛ bɛla efiade, me kunlu dwo me ɛbɛlabɔlɛ nwo yɛɛ me nye la kenlebie ade. Mezukoa kɛ mebabɛlɛ me nwo aze meayɛ tieyɛ na meahomo me ahonle ɛtane ne azo. Ɔlua ɛhye ati, me nee me gɔnwo mɔ avinli le kɛnlɛma. Megya me ye anwofɛlɛko, mɔɔ bɛfɛlɛ ye Carmen la, na yɛ nye die. Yɛlɛbɔ nu yɛava anyelielɛ kpole yɛaboa awie mɔ yɛamaa bazukoa Baebolo ne.

Kɛkala meyɛ gyima kpalɛ—ɔyɛ a mekɔ bange, noko mengɔnwua debie, emomu, mekɔsiezie ɛkɛ!