Ɔvi June 6 mɔɔ kɔdwu June 16, 2013 la, nyɛvolɛ mgbe dɔɔnwo mɔɔ bɛvi ewiade ye ɛleka kɔsɔɔti la hɔle Rouen meli agyinlaleɛ ɛleka ne mɔɔ wɔ France sɔlɔ la kɛ bɛkɔ bɛahɔnlea meli dɔɔnwo mɔɔ bɛfa bɛkɔ konle mɔɔ bɛbayia ɛkɛ la. Bɛfɛlɛ ɛvoyia ne Armada.

Mɔɔ meli mɔɔ le ngɛnlɛma kpalɛ na eza bɛwale bɛtɛla meli biala wɔ ewiade ye anu la pɛle adenle kilomita 120 (75 ma) wɔ Seine azule ne anye na bɛhɔgyinlanle azule ne anloa ɛleka mɔɔ le kilomita nsuu (4 ma) wɔ Normandy, ɛleka mɔɔ fɛta mɔɔ bɛbali ɛvoyia ne la. Nyɛvolɛ ne mɔ nyianle nwolɛ adenle kpole vale kenle mɔɔ bo bulu la hɔvole meli ɛhye mɔ nee meli ndendenle ngakyile 45 mɔɔ bɛlɛfa bɛali ɛvoyia ne la anu mɔɔ bɛanlie bɛ ɛhwee.

Nzɔne a hanle menli ngakyile dɔɔnwo mɔɔ asolo bɛ ɛvolɛ la ɔmanle bɛhɔle kɛ bɛkanlea Armada ɛvoyia ɛhye bie a? Ahenle mɔɔ vale ɛvoyia ne rale na ɔnea ɔtoto nwolɛ ninyɛne boɛ la hanle kɛ Armada ɛvoyia ne maa bɛnyia nwolɛ adenle “bɛbikye zɔhane ‘Nyevile Nu Ɛlɛne Mgbole’ ne mɔ mɔɔ bɛmaa yɛ nye die la kpalɛ.” Nɔhalɛ nu, wɔ menli dɔɔnwo afoa nu, ngakula nee mgbanyinli amuala, meli mgbole mgbole ɛhye mɔ maa bɛkakye nyevile zo adendulɛ ndendenle ne mɔ nee fanwodi mɔɔ bɛnyia la.

Nyɛvolɛ dɔɔnwo noko eza nyianle nwolɛ adenle dele fanwodi gyɛne nwo edwɛkɛ, fanwodi mɔɔ Baebolo nu nɔhalɛ ne maa yɛnyia la. (Dwɔn 8:​31, 32) Mekɛ mɔɔ ɛnee nyɛvolɛ ne mɔ ɛlɛneɛnlea Rouen mɔɔ ɛkɛ le kɛnlɛma nee ye awɔdenle ne mɔ mɔɔ menli ɛbu zolɛ la, bɛnwunle mbuluku mɔɔ Gyihova Alasevolɛ ɛva ɛgugua ehwili mɔ bɛpia azo la. Saa menli nee melikavolɛma mɔɔ kɛnwu ye la bikye bɛ a, bɛmaa bɛfa mbuluku biala mɔɔ bɛkulo la mɔɔ bɛndua ɛhwee a. Menli dɔɔnwo anye liele edwɛkɛ ne mɔɔ se “Ewiade Mɔɔ Adwenletane Ɛnle Nu​—Kenlenzu?” mɔɔ rale Ɛzinzalɛ Arane ne anu la anwo, na Alasevolɛ ne mɔ dole ɛsalɛ vɛlɛle bɛ kɛ bɛradie ɛdendɛlɛ bie mɔɔ gyi Baebolo ne azo mɔɔ bɛbamaa ye wɔ French, Nrelenza, anzɛɛ Spanish nu la bie.

Menli mɔɔ wɔ sua ne azo la anye liele deɛ ɛhye anwo. Nrenya ko mɔɔ ɔzinle ɔ nwo kɛ Alasevolɛ ne mɔ gyigyi ehwili nwo wɔ gua ne azo la hanle kɛ: “Me nye ɛlie kɛ menwu bɛ wɔ awɔdenle ne mɔ azo. Mebu menli mɔɔ bɛnva bɛ diedi ne bɛnli nwɔhoa la, ɔnva nwo kɛ me nee bɛ ɛnlɛ diedi ko la.” Mrenya mgbanyinli nwiɔ bie mɔɔ nwunle Alasevolɛ mgbavolɛ nee mbɛlɛra bie kɛ bɛlɛyɛ bagua nu gyima ɛhye bie la hanle kɛ: “Ɔwɔ kɛ bɛmaa bɛ nye die mɔɔ bɛlɛyɛ la anwo kpalɛ!”