Ɛhɛe. Gyihova Alasevolɛ die Baebolo ne amuala di ɔluakɛ “bɛfa Nyamenle Sunsum a bɛkɛlɛ Nyamenle Edwɛkɛ ne a, na ɔle kpalɛ.” (2 Temɔte 3:​16) Ngyekyeleɛ Dɛba ne nee Ngyekyeleɛ Fofolɛ ne amunwiɔ boka nwo, kɛmɔ bɛta bɛfɛlɛ bɛ la. Gyihova Alasevolɛ ta fɛlɛ Baebolo foa ɛhye mɔ Hibulu Ngɛlɛlera nee Keleseɛnema Giliki Ngɛlɛlera. Wɔ adenle ɛhye azo, yɛmmaa menli ɛnnyia adwenle kɛ Baebolo ne foa bie ɛkpa nwo anzɛɛ nwolɛ ɛngyia?

 Sunsum nwuanzanwuanza ne hanle ɛzoanvolɛ Pɔɔlo manle ɔhɛlɛle kɛ: “Debie biala mɔɔ bɛhɛlɛ ye wɔ Nyamenle Edwɛkɛ ne anu la wɔ ɛkɛ ne kilehile yɛ.” (Wulomuma 15:4) Ɛhye ati, Hibulu Ngɛlɛlera ne lɛ edwɛkɛ mɔɔ sonle bolɛ kpalɛ la maa yɛ. Nvasoɛ ne bie a le kɛ bɛmaa yɛnyia tetedwɛkɛ mɔɔ anwo hyia yɛɛ folɛdulɛ kpalɛ.

•   Tetedwɛkɛ mɔɔ anwo hyia. Abɔdeɛ nee alesama sinlidɔlɛ nwo kɛlɛtokɛ dɔɔnwo wɔ Hibulu Ngɛlɛlera ne anu. Saa edwɛkɛ zɔhane ɛnle nu a, anrɛɛ yɛnrɛnyia kpuyia le kɛ: Nienwu a yɛvi a? Duzu ati a sonla wu a? anwo mualɛ mɔɔ yɛ ahunludwolɛ. (Mɔlebɛbo 2:7, 17) Yeanga ye zɔ, Hibulu Ngɛlɛlera ne ka kɛzi Gyihova Nyamenle nee menli mɔɔ nyianle anyelielɛ nee ngyegyelɛ mɔɔ le kɛ yɛ ɛdeɛ ne la lile la.​—Gyemise 5:​17.

•   Folɛdulɛ kpalɛ. Nrɛlɛbɛ edwɛkɛ mɔɔ sonle bolɛ la wɔ Mrɛlɛbulɛ nee Nolobɔvo mbuluku ne mɔɔ wɔ Baebolo ne anu la anu. Bɛtu yɛ folɛ wɔ kɛzi yɛbanyia abusua asetɛnla mɔɔ yɛ anyelielɛ (Mrɛlɛbulɛ 15:17), kɛzi yɛbanyia gyima nwo adwenle kpalɛ (Mrɛlɛbulɛ 10:4;Nolobɔvo ne 4:6), nee kɛzi mgbavolɛ nee mrɛlɛra asa bahola aha mɔɔ anwo hyia wɔ bɛ asetɛnla nu la anwo. (Nolobɔvo ne 11:9–​12:1).

 Bieko, yɛbahola yɛanyia Mosisi Mɛla ne mɔɔ wɔ Torah ne (Baebolo mbuluku nnu mɔɔ lumua) anu la ɛzukoalɛ zo nvasoɛ. Ɔwɔ nuhua kɛ Mɛla zɔhane ɛnkyekye Keleseɛnema ɛdeɛ, noko ngyinlazo mɔɔ sonle bolɛ kpalɛ la wɔ nu mɔɔ bamaa yɛanyia asetɛnla nu anyelielɛ la.​—Sɛlɛvolɛma 19:18; Mɛla ne 6:​5-7.