Nrenyia bie vi Eritrea radɛnlanle Norway kɛ tutanenli wɔ 2011. Mekɛ mɔɔ Gyihova Alasevolɛ hɔle ye ɛkɛ la, ɔhanle ɔhilele bɛ kɛ ɔyiale Alasevolɛ ne mɔ bie wɔ ye sua zo. Ɔhanle kɛ mekɛ mɔɔ ɛnee ɔle sogyanli wɔ nehane la, ɔnwunle kɛ Alasevolɛ mɔɔ bɛ diedi ti bɛdole bɛ efiade la kpole kɛ bɛbahɔ sogya. Mekɛ mɔɔ bɛtinlitinlinle bɛ nwo zo na bɛhilele bɛ nyane bɔbɔ la bɛanyɛ.

Arɛlevilɛ nu, edwɛkɛ bie mɔɔ dole nrenyia ne la maanle bɛhyele ɔdaye mumua ne bɛdole efiade. Ɔhɔdole Alasevolɛ nsa​—Paulos Eyasu, Negede Teklemariam yɛɛ Isaac Mogos​—mɔɔ bɛ diedi ti bɛguale bɛ efiade wɔ 1994 la.

Mɔɔ ɔla efiade ɛkɛ la, ɔnwunle kɛ Gyihova Alasevolɛ fa mɔɔ bɛkilehile awie mɔ la bɛbɔ bɛ ɛbɛla. Ɔnwunle kɛ bɛdi nɔhalɛ yɛɛ bɛfa bɛ aleɛ mɔɔ bɛlɛ la bie bɛmaa pilizama gyɛne. Ɔnwunle kɛzi ɔ gɔnwo mɔ pilizama mɔɔ bɛle Alasevolɛ la bɔ nu sukoa Baebolo ne dahuu na bɛfɛlɛ awie mɔ gyɛne kɛ bɛraboka bɛ nwo la. Mekɛ mɔɔ bɛhanle bɛhilele bɛ kɛ saa bɛfa bɛ sa bɛwula kɛlata bo kɛ bɛnrɛzonle Gyihova bieko a bɛbagyakyi bɛ la, bɛanyɛ.

Ɛhye hanle nrenyia ne ahonle kpalɛ. Na mɔɔ ɔradɛnlanle Norway la, ɛnee ɔkulo kɛ ɔnwu deɛmɔti Gyihova Alasevolɛ lɛ diedi kpole zɛhae la. Ɔti mɔɔ Alasevolɛ ne mɔ rale ɔ nwo ɛkɛ la, ndɛndɛ ne ala ɔmaanle bɛ nee ye zukoale Baebolo ne na ɔhɔle bɛ debiezukoalɛ ne mɔ bie.

Wɔ September 2018, bɛzɔnenle ye kɛ Gyihova Alasevolɛ ne mɔ ko. Kɛkala, ɔfa nwolɛ adenle biala mɔɔ ɔbanyia la ɔ nee menli mɔɔ vi Eritrea nee Sudan la tendɛ na ɔmaa bɛ anwosesebɛ kɛ bɛzukoa Baebolo ne amaa bɛanyia diedi kpole.