Ɛnee Osman nee ɔ ye yɛɛ ɔ ra raalɛ ne ɛlɛyɛ bagua nu daselɛlilɛ wɔ azie bie anwo wɔ Chile. Arɛlevilɛ nu, menli dɔɔnwo bie mɔɔ ɛnee bɛlɛkɔ bɛahɔzie awie na menli mɔɔ ɛlɛbɔ edwɛne boka bɛ nwo la razenle ɛkɛ. Menli ne bie nwunle Osman la, ɛnee bɛsuzu kɛ bɛ ɛsɔfo ne ɔ. Ɔti bɛhɔle ɔ nwo ɛkɛ na bɛyɛle ye atuu na bɛhanle kɛ, “Ɛsɔfo, yɛda wɔ ase kɛ wɔra ndɛ a, ɛnee yɛ nye la wɔ ade!”

Osman bɔle mɔdenle kɛ ɔkilehile nu yeahile bɛ kɛ tɛ ɔdaye a ɔle ɛsɔfo ne a, noko kɛ mɔɔ ɛnee menli ne ɛlɛyɛ dede la ati bɛande ye edwɛkɛ ne. Menli ne hɔle azie ne azo la, yeangyɛ biala, bie mɔ ziale rahanle hilele ye kɛ, “Ɛsɔfo yɛlɛkendɛ wɔ wɔ azie ne azo.”

Mɔɔ dede ne hanle aze la, Osman holale lale ɔ nwo ali hilele bɛ na ɔhilehilele deɛmɔti yera ɛkɛ ne la anu ɔhilele bɛ. Menli ne vale bɛ ɛsɔfo ne anwo ɛya kɛ yeamba la. Akee bɛbizale Osman kɛ, “Ɛbahola wɔaraha Baebolo ne anu edwɛkɛ ekyi wɔahile menli ne ɔ?” Osman liele dole nu.

Mɔɔ bɛlɛkɔ nla ne azo la, Osman bizale ahenle mɔɔ ɛwu la anwo edwɛkɛ na ɔdwenlenle ngɛlɛlera mɔɔ ɔbahola yeagenga yeahile bɛ la anwo. Mɔɔ bɛdwule nla ne azo la, ɔlale ɔ nwo ali ɔhilele menli ne na ɔhilehilele nu kɛ, kɛmɔ ɔle Gyihova Dasevolɛ la ati ɔbɔ edwɛkpa ne nolo ɔkile menli.

Akee ɔgyinlanle edwɛkɛ mɔɔ wɔ Yekile 21:3, 4 nee Dwɔn 5:28, 29 la azo ɔhilehilele nu kɛ ɛnee ɔnle Nyamenle bodane kɛ alesama bawu. Ɔhanle kɛ ɔnrɛhyɛ Nyamenle badwazo mowuamra na bɛadɛnla aze dahuu wɔ azɛlɛ ye azo. Mɔɔ Osman wiele la, bɛ nuhua dɔɔnwo yɛle ye atuu na bɛyɛle ye mo kɛ yeha “Gyihova edwɛkpa ne” yehile bɛ la. Akee ɔziale ɔhɔgyinlanle daselɛlilɛ ehwili ne anwo.

Mɔɔ bɛziele ahenle bɛwiele la, ɛzɛnema ne bie rale daselɛlilɛ ehwili ne anwo na bɛbizale Osman nee ye abusua ne Baebolo nu edwɛkɛ dɔɔnwo. Ɛzɛnema ne nee bɛ dendɛle hyɛle, na mɔɔ bɛkɔ la, asɛɛ bɛvale mbuluku mɔɔ wɔ ehwili ne azo la amuala bɛhɔle.