Nyamenle maanle mraalɛ dɔɔnwo ɛgyalɛ nwo adenle wɔ mekɛ bie anu. (Mɔlebɛbo 4:19; 16:1-4; 29:18-29) Noko mraalɛ dɔɔnwo ɛgyalɛ ɛnvi Nyamenle. Raalɛ ko ala a ɔbɔle ɔmaanle Adam a.

 Nyamenle maanle Gyisɛse Kelaese vale Ye raalɛ ko ɛgyalɛ nwo ngyinlazo ne ziele ɛkɛ bieko. (Dwɔn 8:28) Mekɛ mɔɔ bɛbizale Gyisɛse agyalɛ nwo edwɛkɛ la, ɔhanle kɛ: “Ahenle mɔɔ bɔle bɛ la bɔle bɛ nrenyia nee raalɛ wɔ mɔlebɛbo ne na ɔzele kɛ: ‘Ɛhye ati a nrenyia bagyakyi ye papa nee ye mame na yeahɔbeta ɔ ye anwo na bɛ mu nwiɔ bɛayɛ nwonane ko la.’”​—Mateyu 19:4, 5.

 Nzinlii Nyamenle sunsum ne maanle Gyisɛse ɛdoavolɛ ne mɔ ko hɛlɛle kɛ: “Nrenyia biala ɛnyia ɔ ti anwo ɔ ye na raalɛ biala ɛnyia ɔ ti anwo ɔ hu.” (1 Kɔlentema 7:2) Eza Baebolo ne ka kɛ ɔwɔ kɛ agyalɛ nrenyia biala mɔɔ ɔwɔ Kilisiene asafo ne anu mɔɔ ɔlɛ gyimalilɛ titili la yɛ awie mɔɔ “ɔ ye kokye.”​—1 Temɔte 3:2, 12.