Ɔnle ɛtane kɛ yɛbabiza deɛmɔti menli wu la, titili wɔ mekɛ mɔɔ awie mɔɔ bikye yɛ la kɛwu la. Baebolo ne ka kɛ: “Ewule bɔlɔ a le ɛtane.”​—1 Kɔlentema 15:56.

Duzu ati menli kɔsɔɔti yɛ ɛtane na bɛwu a?

 Alesama mɔɔ bɛlimoa, Adam nee Yive minlinle bɛ ngoane ɔlua ɛtane mɔɔ bɛyɛle bɛtiale Nyamenle la ati. (Mɔlebɛbo 3:17-19) Ewule a vile atua mɔɔ bɛdele bɛtiale Nyamenle la anu rale a, ɔluakɛ ɔdaye a ɔle “ngoane nzufeanvea” ne a.​—Edwɛndolɛ 36:9; Mɔlebɛbo 2:17.

  Adam vale ɛtane sinlidɔlɛ ne maanle ɔ bozoamra kɔsɔɔti. Baebolo ne ka kɛ: “Ɔlua sonla ko anwo zo ɛtane rale ewiade na ewule luale ɛtane nwo zo rale, yɛɛ ewule dɛlɛle hanle menli kɔsɔɔti a, ɔluakɛ bɛ muala bɛyɛ ɛtane.” (Wulomuma 5:12) Menli kɔsɔɔti wu ɔluakɛ bɛ muala bɛyɛ ɛtane.​—Wulomuma 3:23.

Kɛzi bɛbaye ewule bavi ɛkɛ la

 Nyamenle ɛbɔ ɛwɔkɛ kɛ, mekɛ bie bara mɔɔ “ɔbame ewule bɔkɔɔ.” (Ayezaya 25:8) Amaa yeaye ewule ɛkɛ la, ɔwɔ kɛ ɔye ɛtane mɔɔ fa ewule ba la ɔfi ɛkɛ. Nyamenle bayɛ ɛhye ɔlua Gyisɛse Kelaese mɔɔ ɔbaye “ewiade amra ɛtane” yeavi ɛkɛ la anwo zo.​—Dwɔn 1:29; 1 Dwɔn 1:7.