Ɛtane mɔɔ bɛfa bɛkyɛ a ɔnyɛ boɛ la a le nyɛleɛ mɔɔ saa awie yɛ a Nyamenle ɛnva ye ɛtane ɛngyɛ ye la. Kɛ ɔkɛyɛ na awie anyia subane ɛhye ɛ?

 Nyamenle fa menli mɔɔ nu bɛ nwo wɔ bɛ ɛtane nwo, bɛdi ɛbɛlabɔlɛ nu ngyinlazo ne mɔ azo, na bɛnyia Gyisɛse Kelaese anu diedi la ɛtane ɔkyɛ bɛ. (Gyima ne 3:19, 20) Noko akee, awie bahola azi ye ahonle kɛ ɔbahɔ zo yeayɛ ninyɛndane yɛɛ ɔnrɛhakyi ye nyɛleɛ anzɛɛ ye subane ɛlɛ. Baebolo ne ka sonla zɛhae anwo edwɛkɛ kɛ ‘yesolo’ na ɛtane ɛbɛlɛbɛla ye yemaa ‘yekpunli ye ahonle.’ (Hibuluma 3:​12, 13) Sonla zɛhae dwazo tia Nyamenle bɔkɔɔ na yeyɛ kɛ ndɛtɛlɛ mɔɔ bɛdo ye fonlomo nu yemaa yeyɛ ketekete mɔɔ ɛfa ɛyɛ debie bieko a ɔnyɛ boɛ la. (Ayezaya 45:9) Debie biala ɛnle ɛkɛ mɔɔ bɛbahola bɛagyinla zo bɛava sonla ɛhye ɛtane bɛhyɛ ye a, yeyɛ ɛtane mɔɔ bɛfa bɛkyɛ ye a ɔnyɛ boɛ.​—Hibuluma 10:26, 27.

 Dwuuma ɛzonlenlɛ nu adekilevoma bie mɔ mɔɔ dɛnlanle aze wɔ Gyisɛse mekɛ zo la yɛle ɛtane mɔɔ bɛfa bɛkyɛ a ɔnyɛ boɛ. Ɛnee bɛze ye kɛ sunsum nwuanzanwuanza ne a Gyisɛse dua zo yɛ nwanwane ninyɛne a, noko bɛbɔle adalɛ bɛhanle kɛ Seetan Abɔnsam a vale tumi ne maanle ye a.​—Maake 3:​22, 28-​30.

Ɛtane mɔɔ bɛfa bɛkyɛ a ɔyɛ boɛ la bie mɔ

•  Munzule edwɛkɛ mɔɔ tɛ awie anye fuu a ɔka la. Ɛnee ɛzoanvolɛ Pɔɔlo ka munzule edwɛkɛ, noko nzinlii ɔhanle kɛ: “Nyamenle nwunle me anwunvɔne, ɔluakɛ ɛnee menlɛ diedi, yemɔti ɛnee menze mɔɔ melɛyɛ la.”​—1 Temɔte 1:​13.

•  Agyalɛzɛkyelɛ. Baebolo ne ka menli bie mɔɔ ɛnee bɛsɛkye agyalɛ noko bɛhakyile bɛ subane na Nyamenle vale bɛ ɛtane hyɛle bɛ la anwo edwɛkɛ.​—1 Kɔlentema 6:​9-​11.

“Asoo meyɛ ɛtane mɔɔ bɛfa bɛkyɛ a ɔnyɛ boɛ ɔ?”

 Saa ɛkyi ɛbɛla mɔɔ ɛbɔle ye dɛba ne la na wɔnlu ɛ nwo nɔhalɛ nu na ɛkulo kɛ ɛyɛ nzenzaleɛ a, ɛnee ɛtɛyɛle ɛtane mɔɔ bɛfa bɛkyɛ a ɔnyɛ boɛ. Saa ɛyɛ nvonleɛ ko ne ala fane dɔɔnwo na wɔankpunli wɔ ahonle wɔ nwo a, Nyamenle bahola ava wɔ ɛtane ahyɛ wɔ.​—Mrɛlɛbulɛ 24:16.

 Bie mɔ te nganeɛ kɛ bɛyɛ ɛtane mɔɔ bɛfa bɛkyɛ a ɔnyɛ boɛ la ɔluakɛ bɛ adwenle bua bɛ fɔlɛ wɔ ɛtane mɔɔ bɛyɛ la anwo. Noko, Baebolo ne kilehile kɛ yɛnrɛhola yɛnrɛli yɛ nganeɛdelɛ nzi dahuu. (Gyɛlɛmaya 17:9) Nyamenle ɛtɛmaanle yɛ adenle kɛ yɛbua awie biala ndɛne​—yɛdayɛ mumua ne yɛboka nwo. (Wulomuma 14:​4, 12) Saa bɔbɔ yɛ ahonle bua yɛ fɔlɛ a, ɔbahola yeava yeahyɛ yɛ.​—1 Dwɔn 3:​19, 20.

Asoo Dwudase Yesekaleɔto yɛle ɛtane mɔɔ bɛfa bɛkyɛ a ɔnyɛ boɛ Ɔ?

 Ɛhɛe. Ye anyebolo ne maanle ɔwuale ezukoa mɔɔ ɛnee bɛye kɛ bɛbava bɛali sunsum nu ninyɛne nwo gyima la. Ɔyɛle ɔ nwo kɛ asɛɛ ɔdwenle ehyiavolɛma anwo wɔ mekɛ mɔɔ ɛnee ye bodane a le kɛ ɔkpondɛ ezukoa dɔɔnwo yeawua la. (Dwɔn 12:​4-8) Wɔ mekɛ mɔɔ ɛnee Dwudase ɛkpunli ye ahonle kɛ ɔyɛ ninyɛndane la ɔyele Gyisɛse ɔmaanle na ɔliele dwɛtɛ fufule 30. Ɛnee Gyisɛse ze kɛ Dwudase ɛnrɛhola ɛnrɛnlu ɔ nwo nɔhalɛ nu wɔ mɔɔ yeyɛ la anwo ɛlɛ, ɛhye ati ɔvɛlɛle ye ‘musuofoɔ mɔɔ ɔwɔ kɛ minli.’ (Dwɔn 17:12) Ɛhye kile kɛ ɛnee saa Dwudase wu a, bɛbazɛkye ye bɔkɔɔ mɔɔ ɔnlɛ ewudwazo anyelazo a.​—Maake 14:21.

 Dwudase anlu ɔ nwo nɔhalɛ nu wɔ ye ɛtane mɔɔ ɔyɛle la anwo. Yeanga ye ɛtane yeangile Nyamenle emomu ɔhanle ɔhilele ɛzonlenlɛ nu adekilevoma mɔɔ ɔ nee bɛ vale adwenle ɛtane ne la.​—Mateyu 27:​3-5; 2 Kɔlentema 7:​10.