Ngaaha, ediini zoona tizirikushushana. Baibuli neegamba aha diini nyingi ezi Ruhanga atarikusiima. N’ez’emiringo ebiri mikuru.

Omuringo 1: Okuramya baaruhanga b’ebishuba

 Baibuli ku erikuba neegamba aha kuramya baaruhanga b’ebishuba neekoresa ebigambo nka “ni busha,” ‘ebishuba bisha,’ na “ebitaine mugasho.” (Yeremia 10:​3-5; 16:19, 20) Yehova a akagambira eihanga rya Israeli ira ati: “Otarigira baaruhanga abandi, nyowe ndiho.” (Okuruga 20:​3, 23; 23:24) Abaisraeli ku baabaire baramya baaruhanga abandi, Yehova akaba ‘abagirira ekiniga kingi.’​—Okubara 25:3; Abaleevi 20:2; Abaramuzi 2:​13, 14.

 Ruhanga nikwo arikutwara okuramya ‘kw’abarikwetwa baaruhanga,’ n’omu bunaku obu. (1 Abakorinso 8:​5, 6; Abagalatia 4:8) Boona abarikwenda kumuramya naabaragiira kurekyera aho kukwatanisa n’abarikwejumba omu kuramya kw’ebishuba, ati: “Mubarugyemu, mubeetaaniseho.” (2 Abakorinso 6:​14-​17) Ediini zoona ku ziraabe nizihitsya abantu ahari Ruhanga, ahabw’enki naatuha ekiragiro ekyo?

Omuringo 2: Okuramya Ruhanga omu muringo ogu atarikusiima

 Obumwe, Abaisraeli bakaba nibaramya Yehova barikwihirira aha bikorwa n’enyikiriza z’abantu abarikuramya baaruhanga b’ebishuba, kwonka Yehova akaba naayangira kimwe ekikorwa ky’okujwanzya okuramya okw’amazima n’okw’ebishuba. (Okuruga 32:8; Eky’Ebiragiro 12:​2-4) Yesu akacwera orubanja abeebembezi b’ediini omu bunaku bwe ahabw’omuringo ogu baabaire nibaramyamu Ruhanga. Bakaba nibeeyoreka nk’abanyadiini, kwonka baine oburyarya, barikwehuzya “ebigambo bikuru eby’omu biragiro, okucwa emanja ez’amazima, n’embabazi, n’okwikiriza.”​—Matayo 23:23.

 Na hati, ediini yonka erikwegyesa amazima niyo erikuhitsya abantu ahari Ruhanga. Amazima aga nigashangwa omu Baibuli. (Yohaana 4:​24; 17:17; 2 Timoseo 3:​16, 17) Ediini ezirikwegyesa ebitari mu Baibuli, buzima nizitaanisa abantu ahari Ruhanga. Enyegyesa nyingi ezi abantu barikuteekateeka ngu niziruga omu Baibuli nk’enyegyesa y’obushatu, omwoyo ogutarikufa, n’omuriro ogutarikuraara zikakomooka omu bantu abarikuramya baaruhanga b’ebishuba. Okuramya okurikushagika enyegyesa nk’ezo ‘n’okwa busha,’ nari tikwine mugasho, ahabw’okuta omutima aha migyenzo y’ediini omu mwanya gw’okuguta aha bi Ruhanga arikwenda.​—Mako 7:7, 8.

 Ruhanga naayanga oburyarya bw’ediini. (Tito 1:16) Ediini kubaasa kuhwera abantu kwirira haihi na Ruhanga, eshemereire kwegyesa ebirikukwata aha magara gaabo beitu etari migyenzo. Nk’eky’okureeberaho, Baibuli neegira eti: ‘Omuntu weena ku arikweteekateekaho kuba omunyadiini, atarikurinda rurimi rwe, naayebeiha omu mutima gwe, kandi ediini y’omuntu ogwo n’eya busha. Ediini eshemeire etaine kamogo omu maisho ga Ruhanga Isheboona niyo egi: Okutaayaayira efuuzi n’abafaakazi omu busaasi bwabo, n’okwerinda okugira amabara g’ensi.’ (Yakobo 1:​26, 27)