Ayóóʼóóʼnínę́ę Ádin Yileehgo
AYÓÓʼÍÍNÍʼNÍÍ ńtʼéeʼii łaʼ nitsʼą́ą́ʼ ádingo, ni ałdóʼ ląʼígóó yínííł nilı̨́įgo nitsíníkees shı̨́į łeh. Éí cha, chʼééná áádóó tʼáadoo áhóʼneʼí da ádaatʼéii. Bikʼee áháchįʼ, akʼíhátʼááh, índa náhádzid ałdóʼ. Áko haʼátʼíísh biniyé hinishnáa doo, shı̨́ı̨́ nínízin łeh.
Nizaagóó chʼééná ídlı̨́įgo tʼáadoo átʼéhí da. Éí binahjįʼ bééhózingo nitsʼą́ą́ʼ ádinę́ę ayóóʼííníʼníí ńtʼééʼ. Díí neezgaigo chʼééná ídlı̨́įgi bidééłníinii hólǫ́ǫgoósh átʼé?
ŁAʼ YEE HADAʼÓLNÍNÍGÍÍ
Nijéí neezgaigo doo nootʼééh átʼée da nahalin shı̨́ı̨́. Díí binahjįʼ haʼíínílníigo ándoolííł:
NANÍCHA
Chʼééná ídlı̨́įgi doo bee ahédaniiltʼée da áádóó łaʼ éí tʼáá nizaagóó yikʼee nidaakai łeh. Níjíchago bee hwiiʼ hanínááhwiildoh. Vanessa ániid baa chʼíhootʼánę́ę ání: “Shiiʼ hááhwiidiyooldoh biniyé náánáshcha łeh.” Sofía, hádí tʼáadoo hooyání ádin, éí ájíní: “Łóód ayóó átʼéego neezgaii hąąhgo táájigis nahalingo éí áhóótʼįįdgi baa nitséskeesgo ayóó neezgai. Díí tsʼídá yéigo bikʼeʼeshchʼíiʼii átʼé, ndi níjíchahgo náʼáłdziihii átʼé.”
BAA YÁNÍŁTIʼ
Łahda éí tʼáá sáhí honishłǫ́ǫ doo shı̨́ı̨́ nínízin doo. Ndi, chʼééná ídlı̨́įgi éí tʼáá sáhígo bííníshghah
jinízingo doo bíighah da. Jared 17 binááhai, éí hazhéʼé ádingo ájíní: “Shíniʼ átʼéegi bee ádaa hashneʼ. Tʼáá ádzaagóó shı̨́ı̨́ yáshtiʼ nahalin, ndi baa yáshtiʼgo bee yáʼáníshtʼééh ánáshiilʼįįh.” Janice, ániid baa chʼíhootʼánę́ę ání: “Náánáłaʼda bee bichʼįʼ yáshtiʼgo ayóó shíká análwoʼ. Shaa ákohwiinidzin lá, áádóó doo tʼáá shí tʼéiyá kóníshtʼée da lá niisįįh.”BÍNIʼ ŁAʼDA NÍKÁ ANÁLWOʼ
Azeeʼííłʼíní łaʼ ání: “Anoonééł ániid łaʼda bee atílyaago tʼáá ákǫ́ǫ́ tsı̨́įłgo bikʼis dóó bikʼéí bíká anájahgo áyósingo éí tʼahádóó yéigo chʼééná dooleełgi yichʼįʼ bidziil ábósin doo.” Nikʼis níká adeeshwoł shı̨́ı̨́ nízin, áko haʼátʼéegi shı̨́ı̨́ bee shíká aʼdoowoł nínízinígi bił ííshjání áníłʼı̨́.—Proverbs 17:17.
DIYIN ÁHÁNÍGO ÍÍNÍSIN
Tina ání: “Shichʼooní éí cancer bitsʼą́ą́dóó ájídin, áko bee shichʼįʼ anáhóótʼiʼii yę́ę tʼáadoo bee bił hooshneʼé da, kʼad éí Diyin díí tʼáá altso bee bił hashneʼ! Éí tʼáá ákwíí bíní díísh jı̨́ haʼahóní bee shíká anáádiilwoł nábidishniih. Tʼóó ahayóígóó Diyin shíká eelwod.” Tarsha, 22 honááhaigo hamá ádin, éí ájíní: “Diyin Bizaad tʼáá ákwíí jı̨́ yíníshtaʼgo bee shidziil. Éí yáʼádaatʼéehii baa nitséskeesgo áshósin.”
NÁÁDIʼDOOJAHÍGÍÍ BAA NITSÍNÍKEES
Tina ánáádíʼní: “Áłtsé éí nááʼdiijeeh doo ayóó nashiiłnáa da, háálá shiyáázh táltʼéegoígíí bił tʼáá áníiltso kʼad yeeʼ hádin daniidlı̨́. Ndi kʼad dı̨́ı̨́ʼ nááhai, nááʼdiijeeh bee ił chohooʼı̨́ tłʼóół nahalingo yéigo bąąh dah sétı̨́. Shichʼooní néideestséełgi baa nitséskeesgo bee shił hodéesyéél dóó shił hózhǫ́ǫgo áshósin!”
Doo éí tʼáadoo hodinaʼí yáʼátʼéehgo nił náhwiidootʼaał da. Vanessa tʼáá aaníígóó ání: “Doo bíighah da náázhnídzin łeh, ndi hoł yáʼáhootʼééh náhoodleełgo átʼé.”
Azhą́ nijéí ayóó átʼéego neezgaiígi doo nahjįʼ ádooníił da nahalin ndi, tʼáá ákónéehee dahiniiʼnáago átʼé. Diyin bibee ayóóʼóʼóʼníinii yee níká análwoʼgo nikʼis ayóóʼádanóʼnínígíí dahólǫ́ áádóó tʼáá ákónéehee iiná nee hólǫ́. Áádóó Diyin éí daneeznáanii ninéididoołjahgo bichʼįʼ hoolzhish. Éí ayóóʼííníʼnínę́ę bił náʼahiiniltsą́ągo yéigo adíidííltsoł nóʼní. Áko nijéí neezgai yę́ę nídoodzih!