Jesus tʼahdoo nahasdzáán bikááʼ hoʼdichííh yę́ędą́ą́ʼ níłchʼi naalʼaʼí jílı̨́įgo yáʼąąshdi haghan ńtʼééʼ, bílaʼashdlaʼii éí doo łaʼ ákótʼéego hojizlı̨́ı̨́ʼ da. (John 8:23) God éí Jesus áłtsé áyiilaa, áádóó God bíkáʼaníjílwoʼgo tʼááʼałtsoní bił ájiilaa. Tsʼídá tʼáá bí tʼéiyá Jiihóvah áhoolaa, éí biniinaa God biYeʼ “tʼááłáʼí bá yizhchínígíí” bee hoʼdéejiʼ. (John 1:14) Jesus éí God yá Yáłtiʼii jílı̨́, áko éí biniinaa “Saad” joosyeʼ.​—Proverbs 8:22, 23, 30; Colossians 1:15, 16 yííníłtaʼ.

God yáʼąąshdę́ę́ʼ biYeʼ díí átʼéego nahasdzáán bikáajįʼ yiiníłʼaʼ, Jew dineʼé chʼikę́ę́h jílı̨́įgo tʼahdoo hastiin hwee haleehígíí haYeʼ bibee iiná Mary joolyéego biishchʼid góneʼ nihoníłtį. Áko Jesus bílaʼashdlaʼii doo hazhéʼé da. (Luke 1:30-35) Jesus éí díí biniyé nahasdzáán bikáajįʼ jiníyá (1) God tʼááʼaaníigo baa haneʼígíí yaa naʼdínóotı̨́ı̨́ł biniyé, (2) azhą́shı̨́ı̨́ nihichʼįʼ nidahwiiʼnáa ndi God íinízinígíí haitʼéego biʼdiilnííł biniyé nihá ííshjání áyiilaa, dóó (3) hweʼiinaʼ tsʼídá tʼáá áłtsojı̨́ʼ yáʼájítʼééhígíí bee “ląʼí ninéidiyoołnih” biniyé.​—Matthew 20:28 yííníłtaʼ.

Nináʼályé éí diné bitsʼíís biʼdiniilyı̨́įgo bá bikʼeh nináʼályáago béédoochidgo óolyé. (Exodus 21:29, 30) God átséedi hodeezʼánéedą́ą́ʼ éí bílaʼashdlaʼii anoonééł dóó są́ doo yił áyiilaa da. Haash yitʼéego díí nihił bééhózin? Ádam áłtsé hastiin yę́ę God ábidííniid, Diyin God Bizaad biiʼ “ádił niʼiidzííh” yiłnínígíí íinidzaago éí dadíítsaał. Áko Ádam doo ajisiihgóó éí doo dajidootsaał da ńtʼééʼ. (Genesis 2:16, 17; 5:5) Diyin God Bizaad ání, Ádam éí ajisiihígíí biniinaa bílaʼashdlaʼii anoonééł bitah “hazlı̨́ı̨́ʼ.” Ádam tʼááʼałtso baʼáłchíní ádił niʼiidzííh dóó anoonééł bitah silı̨́ı̨́ʼ,  áko anoonééł biiʼ góneʼ nihá nidahwiistʼą́. Nináʼályé tʼéiyá bee anoonééł biiʼdę́ę́ʼ nihéedidoochił.​—Romans 5:12; 6:23 yííníłtaʼ.

Anoonééł biiʼdę́ę́ʼ nihéedidoochił biniyé háishąʼ nihá nináʼdoodlééł? Deetsaahgo tʼáá nihí ádił niʼiyiilzííʼ yę́ę tʼéiyá bee ádá nináʼdiilyééł. Tʼáá háiida niʼiisííhígíí náánáłaʼjįʼ niʼiisííhígíí doo yá yikʼeh nináʼdoodléeł da.​—Psalm 49:7 yííníłtaʼ.

Jesus tsʼídá tʼááʼałtsojįʼ yáʼájítʼééh ńtʼééʼ, nihi éí doo ákóniitʼée da. Jesus éí tʼáadoo ajisiih da, áko éí biniinaa doo dazhdootsaał da ńtʼééʼ. Ndi, Jesus bílaʼashdlaʼii ádiłnidaʼiisííhígíí bá nináʼázhdeetʼą́. God aláahdi bee ayóíʼíʼóʼní bílaʼashdlaʼii yichʼįʼ ííshjání áyiilaago haYeʼ jiníłʼaʼgo nihá nináʼázhdeetʼą́. Áádóó Jesus bee ayóíʼíʼóʼní ałdóʼ nihił ííshjání áyiilaago Bizhéʼé yikʼeh hóółʼįįd dóó bibee iiná nihá ninéidiníʼą́.​—John 3:16; Romans 5:18, 19 yííníłtaʼ.

Video Haʼátʼíishąʼ Biniyé Jesus Daaztsą́? bee naniné.

Nahasdzáán yikááʼ naaghá yę́ędą́ą́ʼ Jesus diné bąąh dah ndahazʼánígíí yá néyííłdzííʼ, łaʼ daneeznánígíí néidiyiisá, dóó bikʼedaʼíyééʼdę́ę́ʼ yisdáyíínil. Áko díí ájíítʼįįdígíí éí bééhózínígo náasdi diné bikʼeh dahółʼínígíí yá ákónáánéidoodlííł. (Matthew 15:30, 31; John 5:28) Jesus ájídin bikéédóó God ayóí átʼéego níłchʼi naalʼaʼí jílı̨́įgo ánáhodlaa. (1 Peter 3:18) Áádóó Jesus éí Jiihóvah íhólnííh haididooʼáałgo binishʼnáájígo bibaʼ dahjineezdáh, éí nahasdzáán bikʼi Naatʼáanii jidooleełígíí biniyé. (Hebrews 10:12, 13) Kʼad Jesus yáʼąąshdi Naatʼáanii jílı̨́įgo hojooʼááł, áko nahasdzáán nidahoneesʼą́ą́góó hakééʼ nidaakaiígíí díí nizhónígo haneʼígíí yaa nidahalneʼ.​—Daniel 7:13, 14; Matthew 24:14 yííníłtaʼ.

Díí bichʼįʼ hoolzhish, Jesus Naatʼáanii nilı̨́įgo tiʼhooʼnííh dóó atídaʼałʼínígíí bibee íhólníihii yee ałtso íidoołdįįł. Tʼááʼałtso Jesus deiyoodlánígíí dóó yikʼeh dahółʼı̨́įgo éí nahasdzáán bikááʼ áyóó áhonóolingi iiná daabííʼ dooleeł.​—Psalm 37:9-11 yííníłtaʼ.