BÍHWIIDOOʼÁŁÍGÍÍ 2
Háísh éí God Átʼı̨́?
1. God haʼátʼíí biniyé díníilzin doo?
Tʼááʼaanínígíí God éí tʼááʼałtsoní Íyiilaii nilı̨́. Holyéelʼáádę́ę́ʼ hojílǫ́ dóó hoyéelʼáágóó hojílǫ́. (Psalm 90:2) Diyin God Bizaad biiʼdóó nizhónígo haneʼígíí éí bíBitsʼą́ą́dóó átʼé. (1 Timothy 1:11) God éí iiná nihee níláhígíí biniinaa tʼáá bí tʼéiyá bichʼįʼ hodíníilzin doo.—Revelation 4:11 yííníłtaʼ.
2. Haʼátʼíísh éí God yee hadítʼé?
God Níłchʼi jílínígíí biniinaa bílaʼashdlaʼii tsʼídá doo łaʼ biiłtsą́ą da, bí éí bílaʼashdlaʼii yiláahdi átʼé. (Psalm 11:4; John 1:18) Áko, God tʼááʼałtsoní áyiilaaígíí binahjįʼ bééhoʼdílzin. Tsin bineestʼąʼ dóó chʼilátah hózhóón ałʼąą ádaatʼéii binahjįʼ God bibee ayóíʼíʼóʼní dóó bibee hódzą́ yee nihichʼįʼ ádééhólzin. Yá abíyéelʼáágóó áníłtsxooígíí bibee adziil yee nihichʼįʼ ádééhólzin.—Romans 1:20 yííníłtaʼ.
Diyin God Bizaad yííníłtaʼgo éí God átʼéhígíí ląʼígóó bíhwiidiilʼáałgo átʼé. Áádóó ałdóʼ díí yee nihił halneʼ: God bił yáʼátʼéhígíí dóó doo bił yáʼátʼéhígíí, haitʼéego diné yił naalnish, dóó ałʼąą ádahoonííłígíí haitʼéego hashtʼeiiłʼı̨́.—Psalm 103:7-10 yííníłtaʼ.
3. Godʼísh bízhiʼ hólǫ́?
Jesus ádííniid, “NihiTaaʼ yáʼąąshdi honílóonii, nízhiʼ diyingo óolzin . . .” (Matthew 6:9) Azhą́shı̨́ı̨́ God tʼóóʼahayóigo bee hoʼdíjíi ndi, tʼááłáʼí házhiʼ. Saad ałʼąą ádaatʼéégóó God bízhiʼ ałʼąą átʼéego yee dayózhí, Naabeehó kʼehjígo éí “Jiihóvah” didiiʼniił. Áádóó łaʼ éí “Yahweh” daaníigo dayózhí.—Psalm 68:4 yííníłtaʼ.
Ląʼígóó Diyin God Bizaad biiʼdę́ę́ʼ God bízhiʼ hahasdzoh, áádóó Bóhólníihii doodaiiʼ God bee hoʼdójíigo bitséskʼeh góneʼé aheesʼnil. Ndi Diyin God Bizaad tʼóó ályaa yę́ędą́ą́ʼ 7,000 dóó baʼaan ánéelą́ąʼdi God bízhiʼ biiʼ daasdzoh ńtʼééʼ. Jesus diné neineeztą́ą́ʼ yę́ędą́ą́ʼ, God bízhiʼ bééhózingo áyiilaa.—John 17:26 yííníłtaʼ.
Video Godʼísh Bízhiʼ Hólǫ́? bee naniné.
4. Jiihóvahísh nihaa aʼááh nízin?
Kweʼé azhéʼé ayóíʼóʼóʼnínígíí nahalingo, God ałdóʼ nihichʼįʼ nahwiiʼnáago nihaah bíniʼ łeh
Tiʼhooʼnííh kʼeeʼąą yilzhishígíí biniinaaísh God doo nihaa aʼááh nízin da? Nihichʼįʼ ndahwiiʼnánígíí yee God nanihínítaah łaʼ daaníi łeh, díí éí doo ákótʼée da.—James 1:13 yííníłtaʼ.
God éí diné bił nilı̨́įgo tʼáá bí bíniʼkʼehgo ádoonííłígíí yił áyiilaa. Tʼáá nihí nihíniʼkʼehgo God bá neelʼaʼgo baa ahééh niidzin. (Joshua 24:15) Ndi tʼóóʼahayóí éí doo yáʼátʼééhígíí ádaaníiłgo atídaʼałʼı̨́, éí biniinaa tiʼhooʼnííh kʼeeʼąą yilzhish. Díí doo ákótʼéego ádaʼałʼínígíí, tʼáá yéigo Jiihóvah bijéí yineesgai.—Genesis 6:5, 6 yííníłtaʼ.
Jiihóvah éí God nihaa joobaʼii nilı̨́, áko niheʼiinaʼ baa nihił hózhǫ́ǫ dooleełgo nihá yinízin. Tiʼhooʼnííh niidoołtʼihgo bichʼįʼ hoolzhish, atídaʼałʼínígíí tʼáá bił. Ndi biniiyée hólónígíí biniinaa tiʼhooʼnííh tʼóó kóníshgháníjįʼ yá hasʼą́. Bíhwiidooʼáłígíí 8 góneʼ biniinaaígíí hazhóʼó bíhwiidiilʼááł.—2 Peter 2:9; 3:7, 13 yííníłtaʼ.
5. Haash yitʼéego God áhą́dígo ádeeyínósin doo?
Nihisodizin bee Jiihóvah áhą́dígo ádashíínósin nihiłní. Tʼááłáʼí niitínígo nihaa áhonízin. (Psalm 65:2; 145:18) Nihaa néiidiyiiʼaah doo nízin. Hojoobaʼ íitʼı̨́įgo bikʼeh honiilʼínígíí yooʼı̨́, łahda biʼoh nídiniidleeh ndi. Áko azhą́shı̨́ı̨́ biʼoh nídadiniidleeh ndi, baa nihił hózhǫ́ǫgo God áhą́dígo kʼé bił ahidiiʼníi dooleełgo átʼé.—Psalm 103:12-14; James 4:8 yííníłtaʼ.
Náánáłaʼ biláahdi Jiihóvah tʼéiyá aláahgo ayóíʼííníiʼníi doo, háálá iiná nihee níláh. (Deuteronomy 11:22) God baa íhołʼaahgo dóó áníhiłnínígíí beʼíłʼı̨́įgo, God ayóíʼííníiʼnínígíí tʼáá bééhózíní doo, áko díí binahjįʼ tʼáá áhą́dígo íínísin doo.—1 Timothy 2:4; 1 John 5:3 yííníłtaʼ.
