1. Senotlelo sa bophelo bjo bo thabišago bja lapa ke sefe?

JEHOFA MODIMO o nyaka gore bophelo bja lapa la gago bo thabiše. Lentšu la gagwe e lego Beibele, le nea ditaelo bakeng sa setho se sengwe le se sengwe sa lapa, le hlalosa karolo yeo Modimo a nyakago gore yo mongwe le yo mongwe a e bapale. Ge ditho tša lapa di phetha dikarolo tša tšona ka go dumelelana le keletšo ya Modimo, mafelelo e ba a kgotsofatšago kudu. Jesu o itše: “Go thaba bao ba kwago lentšu la Modimo gomme ba le boloka!”—Luka 11:28.

2. Lethabo la lapa le ithekgile ka gore re lemoge’ng?

² Lethabo la lapa le ithekgile kudu ka go lemoga ga rena gore lapa le thomilwe ke Jehofa, yena yo Jesu a mmiditšego “Tatago rena.” (Mateo 6:9) Lapa le lengwe le le lengwe mo lefaseng le gona ka baka la Tatago rena wa legodimong—e bile o tseba e le ka kgonthe seo se dirago gore malapa a thabe. (Ba-Efeso 3:14, 15) Ka gona, ke’ng seo Beibele e se rutago ka karolo ya setho se sengwe le se sengwe sa lapa?

3. Beibele e hlalosa bjang mathomo a lapa la motho, gomme ke ka baka la’ng re tseba gore seo e se bolelago ke therešo?

³ Jehofa o bopile batho ba pele e lego Adama le Efa, gomme a  ba kopanya gore e be monna le mosadi. A ba bea legaeng la paradeise e botse ya lefaseng—tšhemo ya Edene—gomme a ba botša gore ba be le bana. Jehofa o itše: “Tswalang Le atê, tlalang lefase.” (Genesi 1:26-28; 2:18, 21-24) Se ga se feela kanegelo goba nonwane, ka gobane Jesu o bontšhitše gore seo Genesi e se bolelago ka go thomega ga bophelo bja lapa ke therešo. (Mateo 19:4, 5) Gaešita le ge re lebana le mathata a mantši gomme bophelo ga bjale bo se ka tsela yeo Modimo a bego a rerile gore bo be ka yona, anke re bone lebaka leo ka lona lethabo ka gare ga lapa e lego selo seo se kgonegago.

4. (a) Ke bjang setho se sengwe le se sengwe sa lapa se ka tlaleletšago lethabong la lapa? (b) Ke ka baka la’ng go ithuta bophelo bja Jesu go le bohlokwa gakaakaa bakeng sa lethabo la lapa?

⁴ Setho se sengwe le se sengwe sa lapa se ka thuša go dira gore bophelo bja lapa bo thabiše ka go ekiša Modimo tabeng ya go bontšha lerato. (Ba-Efeso 5:1, 2) Lega go le bjalo, re ka ekiša bjang Modimo ka ge e bile re ka se kgone go mmona? Re ka ithuta kamoo Jehofa a dirago dilo ka gona ka gobane o rometše Morwa wa gagwe wa leitšibulo go tšwa legodimong go tla lefaseng. (Johane 1:14, 18) Ge a be a le lefaseng, Morwa yo e lego Jesu Kriste o ile a ekiša Tatagwe wa legodimong gabotse kudu mo e lego gore go bona le go kwa Jesu go be go swana le ge re e-na le Jehofa gomme re Mo theeditše. (Johane 14:9) Ka gona, yo mongwe le yo mongwe wa rena a ka thuša go dira bophelo bja lapa gore e be bjo bo thabišago ka go ithuta ka lerato leo Jesu a ilego a le bontšha le go latela mohlala wa gagwe.

5, 6. (a) Ke bjang tsela yeo Jesu a swarago phuthego ka yona e beago mohlala bakeng sa banna? (b) Ke’ng seo se swanetšego go dirwa gore go hwetšwe tebalelo ya dibe?

⁵ Beibele e bolela gore banna ba swanetše go swara basadi ba bona ka tsela e swanago le yeo Jesu a swarago barutiwa ba gagwe ka yona. Ela hloko tlhahlo ye ya Beibele: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafela yona . . . Ka tsela ye banna ba swanetše go rata basadi ba bona bjalo ka mebele ya bona. Yo a ratago mosadi wa gagwe o a ithata, gobane ga go na motho yo a kilego a hloya  nama ya gagwe; eupša o a e fepa le go e babalela, go etša ge Kriste le yena a dira phuthego bjalo.”—Ba-Efeso 5:23, 25-29.

⁶ Lerato la Jesu bakeng sa phuthego ya gagwe ya barutiwa le bea mohlala o phethagetšego bakeng sa banna. Jesu “o ba ratile go fihla bofelong,” a gafa bophelo bja gagwe bakeng sa bona, gaešita le ge ba be ba sa phethagala. (Johane 13:1; 15:13) Ka mo go swanago, banna ba kgothaletšwa gore: “Tšwelang pele le rata basadi ba lena gomme le se ke la ba galefela o šoro.” (Ba-Kolose 3:19) Ke’ng seo se tlago go thuša monna go diriša keletšo e bjalo, kudu-kudu ge e ba mosadi wa gagwe ka dinako tše dingwe a palelwa ke go bontšha bohlale? O swanetše go gopola diphošo tša gagwe ka noši le seo a swanetšego go se dira gore a hwetše tebalelo ya Modimo. O swanetše go dira’ng? O swanetše go lebalela bao ba mo diretšego sebe, gomme seo se akaretša le mosadi wa gagwe. Ee, mosadi le yena o swanetše go dira se se swanago. (Mateo 6:12, 14, 15) Na o bona lebaka leo ba bangwe ba ilego ba bolela gore lenyalo le le atlegilego ke go kopanywa ga batho ba babedi bao ba kgonago go lebalelana?

7. Ke’ng seo Jesu a ilego a se ela hloko, gomme o ile a beela banna mohlala ofe?

⁷ Banna gape ba swanetše go lemoga gore Jesu ka mehla o be a bontšha go naganela barutiwa ba gagwe. O ile a ela hloko mafokodi le dinyakwa tša bona tša nama. Ka mohlala, ge ba be ba lapile o ile a re: “Tlang, lena le nnoši, ka thopeng lefelong le lego lekatana gomme le khutšeng go se nene.” (Mareka 6:30-32) Basadi le bona ba nyaka go naganelwa ka kelohloko. Beibele e ba hlalosa gore ba swana le “sebjana se fokolago” seo banna ba laelwago gore ba se nee “kgodišo.” Ka baka la’ng? Ka gobane bobedi banna le basadi bao ba lego lenyalong ba hwetša “kgaugelo e sa swanelego ya bophelo.” (1 Petro 3:7) Banna ba swanetše go gopola gore go botega ke gona go dirago gore motho e be wa bohlokwa go Modimo, e sego gore motho ke monna goba mosadi.—Psalme 101:6.

8. (a) Go bolela’ng gore monna “yo a ratago mosadi wa gagwe o a ithata”? (b) Go ba “nama e tee” go bolela’ng bakeng sa monna le mosadi wa gagwe?

⁸ Beibele e bolela gore monna “yo a ratago mosadi wa gagwe o a ithata.” Se ke ka gobane monna le mosadi wa gagwe “ga e sa  le ba babedi, eupša ke nama e tee,” go etša ge Jesu a bontšhitše. (Mateo 19:6) Ka gona ga se ba swanela go itumelela gore ba be le dikganyogo tša tša botona le botshadi ka ntle ga lenyalo la bona. (Diema 5:15-21; Ba-Hebere 13:4) Ba ka dira se ge e ba ba bontšha go kgomega mo e sego ga boithati ka dinyakwa tša yo mongwe le yo mongwe wa bona. (1 Ba-Korinthe 7:3-5) Kgopotšo e bohlokwa ke gore: “Ga go na motho yo a kilego a hloya nama ya gagwe; eupša o a e fepa le go e babalela.” Banna ba swanetše go rata basadi ba bona go etša ge ba ithata, ba gopola gore ba ikarabelela go hlogo ya bona, Jesu Kriste.—Ba-Efeso 5:29; 1 Ba-Korinthe 11:3.

9. Ke seka sefe sa Jesu seo go bolelwago ka sona go Ba-Filipi 1:8, gomme ke ka baka la’ng banna ba swanetše gore ba bontšhe seka se go basadi ba bona?

⁹ Moapostola Paulo o boletše ka ‘maikwelo a borutho a bonolo ao Kriste Jesu a nago le ona.’ (Ba-Filipi 1:8) Borutho bja Jesu e be e le seka se se lapološago, seo se bego se ipiletša go basadi bao ba ilego ba ba barutiwa ba gagwe. (Johane 20:1, 11-13, 16) Ka gona basadi ba nyetšwego ba hlologela maikwelo a borutho go tšwa go banna ba bona.

10. Jesu o bea mohlala bjang bakeng sa basadi?

¹⁰ Lapa ke mokgatlo, gomme gore o šome ka thelelo o nyaka hlogo. Gaešita le Jesu o na le Yo a ikokobeletšago yena e le Hlogo ya gagwe. “Hlogo ya Kriste yona ke Modimo,” go swana le ge “hlogo ya mosadi [e le] monna.” (1 Ba-Korinthe 11:3) Go ikokobeletša ga Jesu bohlogo bja Modimo ke mohlala o mobotse, ka ge ka moka ga rena re e-na le hlogo yeo re swanetšego go ikokobeletša yona.

11. Ke boemo bofe bja kgopolo bjoo mosadi a swanetšego go ba le bjona ka monna wa gagwe, gomme mafelelo a boitshwaro bja gagwe e ka ba afe?

¹¹ Batho ba sa phethagalago ba dira diphošo gomme gantši ba hlaelelwa kudu ke go ka ba dihlogo tša malapa tšeo di swanelegago. Ka gona mosadi o swanetše go dira’ng? Ga se a swanela go nyatša seo monna wa gagwe a se dirago goba go leka go tšea bohlogo bja gagwe. Mosadi o dira gabotse go gopola gore go ya ka pono ya Modimo, moya wa khutšo le wa boleta ke o bohlokwa kudu. (1 Petro 3:4) Ka go bontšha moya o bjalo, mosadi  o tla hwetša go le bonolo go bontšha boikokobetšo bja go boifa Modimo gaešita le maemong a lekago. Go oketša moo, Beibele e re: “Mosadi o swanetše go ba le tlhompho e tseneletšego go monna wa gagwe.” (Ba-Efeso 5:33) Eupša go thwe’ng ge e ba monna a sa amogele Kriste e le Hlogo ya gagwe? Beibele e kgothatša basadi ka gore: “Ikokobeletšeng banna ba lena, e le gore, ge e ba go e-na le bao ba sa kwego lentšu, ba tle ba ruiwe ka ntle le lentšu ka boitshwaro bja basadi ba bona, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.”—1 Petro 3:1, 2.

12. Ke ka baka la’ng go sa fošagala gore mosadi a tšweletše dikgopolo tša gagwe ka tlhompho?

¹² Go sa šetšwe gore monna wa gagwe ke modumedi-gotee le yena goba ga se yena, mosadi o tla ba a sa bontšhe go se hlomphe ge e ba ka bohlale a bolela kgopolo yeo e fapanego le ya monna. Pono ya gagwe e ka ba e nepagetše, gomme lapa ka moka le ka holega ge e ba monna a ka mo theetša. Gaešita le ge Aborahama a ile a se dumele ge mosadi wa gagwe Sara a tšweletša tharollo e šomago bakeng sa bothata bjo bo itšego bja lapa, Modimo o ile a mmotša gore: “Tše Sara a di boletšexo le wêna, O di dumêlê.” (Genesi 21:9-12) Ee, ge monna a dira phetho ya mafelelo yeo e sa thulanego le molao wa Modimo, mosadi wa gagwe o bontšha go ikokobetša ga gagwe ka go e thekga.—Ditiro 5:29; Ba-Efeso 5:24.

13. (a) Ke’ng seo Tito 2:4, 5 e kgothaletšago basadi ba ba nyetšwego gore ba se dire? (b) Ke’ng seo Beibele e se bolelago ka karogano le tlhalo?

¹³ Ka go phetha karolo ya gagwe, mosadi a ka dira mo gontši tabeng ya go hlokomela lapa. Ka mohlala, Beibele e bontšha gore basadi ba ba nyetšwego ba swanetše “gore ba rate banna ba bona, ba rate bana ba bona, ba hlaphogelwe monaganong, e be ba sekilego, ba šomago ka gae, ba bolo, ba ikokobeletše banna ba bona.” (Tito 2:4, 5) Mosadi yo a nyetšwego yo e bilego e le mma yo a dirago ka tsela ye o tla hwetša lerato le tlhompho tša nako e telele tša lapa la gagwe. (Diema 31:10, 28) Lega go le bjalo, ka ge lenyalo e le go kopanywa ga batho ba sa phethagalago, maemo a mangwe a feteletšego a ka feleletša ka karogano goba tlhalo. Beibele e dumelela karogano ka tlase ga maemo a itšego. Lega go  le bjalo, karogano ga se ya swanelwa go tšewa gabohwefo ka gobane Beibele e eletša gore: “Mosadi a se ke a tlogela monna wa gagwe; . . . le monna a se ke a tlogela mosadi wa gagwe.” (1 Ba-Korinthe 7:10, 11) Le gona ke bootswa feela bjo bo dirilwego ke yo mongwe wa balekane ba lenyalo bjo bo neago motheo wa Mangwalo bakeng sa tlhalo.—Mateo 19:9.

14. Jesu o ile a swara bjang bana, gomme ke’ng seo bana ba se nyakago go batswadi?

¹⁴ Jesu o beile mohlala o phethagetšego bakeng sa batswadi tseleng yeo a ilego a swara bana ka yona. Ge ba bangwe ba be ba leka go thibela bana go ya go Jesu, o ile a re: “Lesang bana ba banyenyane ba tle go nna; le se leke go ba thibela.” Beibele e bolela gore ka morago o ile a “gokarela bana a thoma go ba šegofatša, a ba bea diatla.” (Mareka 10:13-16) Ka ge Jesu a ile a fetša nako a e-na le bana ba banyenyane, na ga se la swanela go dira se se swanago ka barwa gotee le barwedi ba lena? Ba nyaka nako ya lena e ntši, e sego e nyenyane. Le swanetše go ipeela nako ya go ba ruta, ka gobane seo ke se Jehofa a laelago batswadi gore ba se dire.—Doiteronomio 6:4-9.

15. Ke’ng seo batswadi ba ka se dirago gore ba šireletše bana ba bona?

¹⁵ Ka ge lefase le e e-ba le kgopo kudu le go feta, bana ba nyaka  batswadi bao ba tlago go ba šireletša go batho bao ba nyakago go ba gobatša, ba bjalo ka batho ba tsomago bana gore ba ba goboše ka dikopano tša botona le botshadi. Ela hloko kamoo Jesu a ilego a šireletša barutiwa ba gagwe, bao ka lerato a ilego a ba bitša “bana ba banyenyane.” Ge a be a swarwa gomme a be a tla bolawa kapejana ka morago ga moo, Jesu o ile a rulaganyetša gore ba phologe. (Johane 13:33; 18:7-9) Bjalo ka motswadi, o swanetše go phafogela maiteko a Diabolo a go leka go gobatša bana ba gago ba banyenyane. O swanetše go ba nea temošo e sa le pele. * (1 Petro 5:8) Ga go le ka mohla moo ba ilego ba ba  kotsing ya go se šireletšege mmeleng, moyeng le boitshwarong kudu gakaakaa.

16. Ke’ng seo batswadi ba ka ithutago sona tseleng yeo Jesu a ilego a swaragana le go se phethagale ga barutiwa ba gagwe?

¹⁶ Bošegong bja pele ga ge Jesu a e-hwa, barutiwa ba ile ba ngangišana ka gore ke mang yo mogolo gare ga bona. Go e na le gore a ba befelele, Jesu ka lerato o ile a tšwela pele a ipiletša go bona ka lentšu le ka mohlala. (Luka 22:24-27; Johane 13:3-8) Ge e ba o le motswadi, na o kgona go bona kamoo o ka latelago mohlala wa Jesu ka gona tseleng yeo o phošollago bana ba gago ka yona? Ke therešo gore ba nyaka tayo, eupša e swanetše gore e newe ka ‘tekanyo e swanetšego’ e sego ka bogale. Ga se wa swanela go bolela ka go se naganele “bjalo ka lerumo le le hlabago.” (Jeremia 30:11, bapiša le PK; Diema 12:18, PK) Tayo e swanetše go newa ka tsela yeo ngwana wa gago ka morago a tlago go bona gore e be e le e swanetšego kudu.—Ba-Efeso 6:4; Ba-Hebere 12:9-11.

17. Ke ka ditsela dife Jesu a beilego mohlala o phethagetšego bakeng sa bana?

¹⁷ Na bana ba ka ithuta go Jesu? Ee, ba ka ithuta! Ka mohlala wa gagwe ka noši, Jesu o bontšhitše kamoo bana ba swanetšego go kwa batswadi ba bona ka gona. O ile a re: “Ke bolela dilo tše go etša ge Tate a nthutile.” O okeditše ka gore: “Ka mehla ke dira dilo tše di mo kgahlišago.” (Johane 8:28, 29) Jesu o be a e-kwa Tatagwe wa legodimong, gomme Beibele e botša bana gore ba kwe batswadi ba bona. (Ba-Efeso 6:1-3) Le ge Jesu e be e le ngwana yo a phethagetšego, o ile a kwa batswadi ba gagwe ba batho e lego Josefa le Maria, bao ba bego ba sa phethagala. Seo se ile sa tliša lethabo go setho se sengwe le se sengwe sa lapa labo Jesu e le ka kgonthe!—Luka 2:4, 5, 51, 52.

18. Ke ka baka la’ng Jesu ka mehla a be a e-kwa Tatagwe wa legodimong, gomme ke mang yo a thabago ge bana ba e-kwa batswadi ba bona lehono?

¹⁸ Na bana ba ka lemoga ditsela tšeo ka tšona ba ka swanago le Jesu gabotse gomme ba thabiša batswadi ba bona? Ee, bana ka dinako tše dingwe ba ka hwetša go le thata gore ba kwe batswadi ba bona, eupša seo ke se Modimo a nyakago gore bana  ba se dire. (Diema 1:8; 6:20) Jesu ka mehla o be a e-kwa Tatagwe wa legodimong, gaešita le ka tlase ga maemo a thata. Lebakeng le lengwe ge e be e le thato ya Modimo gore Jesu a dire selo se sengwe seo se bego se le thata kudu, Jesu o ile a re: “Tloša senwelo [senyakwa se itšego] se go nna.” Lega go le bjalo, Jesu o ile a dira seo Modimo a ilego a mo kgopela sona, ka gobane o ile a lemoga gore Tatagwe o be a tseba gakaone. (Luka 22:42) Ka go ithuta gore ba kwe, bana ba tla dira gore batswadi ba bona le Tatago bona wa legodimong ba thabe kudu. *—Diema 23:22-25.

19. (a) Sathane o leka bjang bana? (b) Batswadi ba ka kgongwa bjang ke boitshwaro bjo bobe bja bana ba bona?

¹⁹ Diabolo o ile a leka Jesu, gomme re ka kgodišega gore o tla leka le bafsa gore ba dire seo se fošagetšego. (Mateo 4:1-10) Sathane Diabolo o diriša kgateletšo ya dithaka yeo go ka bago thata gore o e ganetše. Ka gona ke gabohlokwa kudu gore bana ba se ke ba gwerana le badiri ba bobe! (1 Ba-Korinthe 15:33) Morwedi wa Jakobo e lego Dina o ile a gwerana le bao ba bego ba sa rapele Jehofa, gomme se se ile sa lebiša bothateng bjo bogolo. (Genesi 34:1, 2) Nagana kamoo lapa le ka kwago bohloko ka gona ge e ba yo mongwe wa ditho tša lona a ka akaretšwa boitshwarong bjo bo gobogilego bja tša botona le botshadi!—Diema 17:21, 25.

20. E le gore go thabelwe bophelo bja lethabo la lapa, ke’ng seo setho se sengwe le se sengwe sa lapa se swanetšego go se dira?

²⁰ Go ba bonolo go lebeletšana le mathata a lapa ge keletšo ya Beibele e dirišwa. Ge e le gabotse, go diriša keletšo e bjalo ke senotlelo sa lethabo la lapa. Ka gona banna, ratang basadi ba lena gomme le ba sware ka tsela yeo Jesu a swarago phuthego ya gagwe ka yona. Basadi, ikokobeletšeng bohlogo bja banna ba lena gomme le latele mohlala wa mosadi wa sethakga yo go bolelwago ka yena go Diema 31:10-31. Batswadi, tlwaetšang bana ba lena. (Diema 22:6) Bo-tate, ‘okamelang ba ntlo ya lena ka mokgwa o mobotse.’ (1 Timotheo 3:4, 5; 5:8) Lena bana, e-kwang batswadi ba lena. (Ba-Kolose 3:20) Ga go le o tee ka lapeng yo a phethagetšego, ka gobane ka moka ba dira diphošo. Ka gona ikokobetšeng gomme le kgopelaneng tshwarelo.

21. Ke ditebelelo dife tše di kgahlišago tšeo di letšego ka pele, gomme ke bjang re ka thabelago bophelo bjo bo thabišago bja lapa gona bjale?

²¹ Ke therešo gore Beibele e hupere keletšo gotee le tlhahlo e ntši e bohlokwa ge e le mabapi le bophelo bja lapa. Go oketša moo, e re ruta ka lefase le lefsa la Modimo le paradeise ya lefaseng yeo e tletšego ka batho ba thabilego bao ba rapelago Jehofa. (Kutollo 21:3, 4) A ditebelelo tše di kgahlišago tšeo di letšego ka pele! Gaešita le gona bjale, re ka thabela bophelo bjo bo thabišago bja lapa ka go diriša ditaelo tša Modimo tšeo di hwetšwago Lentšung la gagwe e lego Beibele.