Diema 12:1-28
12 Yo a ratago tayo o rata tsebo,Eupša yo a hloilego kgalemelo ga se a hlalefa.
2 Jehofa o amogela motho yo a dirago dilo tša go loka,Eupša o hloile motho yo a logago maanomabe.
3 Motho a ka se itšhireletše ka go dira dilo tše mpe,Eupša baloki ba tla dula ba šireletšegile.
4 Mosadi wa mekgwa e mebotse o dira gore monna wa gagwe a hlomphege,Eupša yo a dirago dilo tša go leša dihlong o swana le bolwetši bjo bo bodišago marapo a monna wa gagwe.
5 Baloki ba nagana dilo tše di lokilego,Eupša keletšo ya batho ba babe e a lahletša.
6 Mantšu a batho ba babe a swana le lenaba leo le go hlaselago gore le go bolaye,Eupša mantšu a baloki a ba šireletša gore ba se wele kotsing.
7 Batho ba babe ba tlo fedišwa gomme ba se sa ba gona,Eupša ntlo ya moloki e tla dula e le gona.
8 Motho o tumišwa ka baka la ge a bolela dilo tše bohlale,Eupša motho wa pelo ya boradia o tla nyatšwa.
9 Go kaone gore o tšeelwe fase mola o na le mohlanka,Go e na le gore o ithete mola o se na dijo.
10 Moloki o hlokomela diruiwa tša gagwe,Eupša motho yo mobe o nagana gore o na le kwelobohloko mola a le sehlogo.
11 Yo a lemago tšhemo ya gagwe o tla ja dijo a khora,Eupša setlaela se phegelela dilo tše di se nago mohola.
12 Motho yo mobe o duma phoofolo yeo e tantšwego ke batho ba babe,Eupša moloki o swana le mohlare wo o tsemilego medu e bile o enywa dienywa.
13 Motho yo mobe o tsena mathateng ka baka la dilo tše mpe tšeo a di boletšego,Eupša moloki o tšwa mathateng.
14 Seo motho a se bolelago se ka dira gore dilo di mo sepelele gabotse,Le gona seo a se dirago se tla dira gore a hwetše moputso.
15 Lešilo le ipotša gore le dula le dira dilo tše dibotse,Eupša motho yo bohlale o amogela keletšo.
16 Lešilo le bontšha ka pela gore le tenegile,Eupša motho yo bohlale o itira eka ga a kwe ge ba mo roga.
17 Hlatse yeo e tshepegago e tla bolela nnete,Eupša hlatse ya maaka e bolela tša bofora.
18 Mantšu ao a bolelwago go sa naganwe a hlaba bjalo ka tšhoša,Eupša mantšu a yo bohlale a a fodiša.
19 Mantšu ao a tšwago molomong wo o bolelago nnete a tla dula a le gona go ya go ile,Eupša mantšu ao a tšwago lelemeng la maaka a tla ba gona ka nakwana.
20 Motho yo a ratago tša boradia o dula a bolela maaka,Eupša bao ba dirago gore go dule go na le khutšo ba a thaba.
21 Moloki a ka se diragalelwe ke dilo tše mpe,Eupša motho yo mobe o tla tsena mathateng a magolo.
22 Motho wa go bolela maaka o šišimiša Jehofa,Eupša bao ba tshepegago ba a mo kgahla.
23 Motho yo bohlale ga a ikgantšhe ka dilo tšeo a di tsebago,Eupša lešilo le tšama le ikgantšha ka bošilo bja lona.
24 Motho yo a šomago ka thata o tla laola ba bangwe,Eupša sebodu se tla dula e le lekgoba.
25 Dipelaelo di dira gore batho ba gateletšege,Eupša mantšu a mabotse a dira gore ba thabe.
26 Moloki o dula a tsomela diruiwa tša gagwe moo di ka fulago gona,Eupša tsela yeo batho ba babe ba itshwarago ka yona e dira gore ba aroge.
27 Sebodu se ka se kitimiše phoofolo gore se e je,Eupša go šoma ka thata go swana le lehumo le bohlokwa.
28 Go itshwara gabotse go tla dira gore motho a dule a phela,Gomme go ka se mmakele lehu.
