Thoma ka go hwetša khomotšo therešong ye: Modimo o bona tlaišego yeo e lego gona lefaseng lehono, gomme o ikemišeditše go dira se sengwe ka yona. (Psalme 72:13, 14) Lentšung la gagwe, e lego Beibele, Modimo o holofetša gore bao ‘ba welwago ke masetlapelo ba tla imollwa.’ Neng? Beibele e re: “Ge go utollwa Morena Jesu go tšwa legodimong a na le barongwa ba gagwe ba matla ... nakong ya ge a tlo lefetša bao ba sa tsebego Modimo le bao ba sa kwego ditaba tše dibotse tša mabapi le Morena wa rena Jesu.” (2 Bathesalonika 1:7, 8) Go utollwa ga Jesu go tla direga nakong e tlago yeo Beibele e e bitšago “[ntwa] ya letšatši le legolo la Modimo Ramatlaohle” yeo gape e tsebjago e le Haramagedone.—Kutollo 16:14, 16.

Ntweng yeo ya nakong e tlago, Modimo a ka se diriše batho, eupša o tla diriša Morwa wa gagwe, e lego Jesu Kriste gotee le dibopiwa tše dingwe tše matla tša moya gore di lwe le batho ba kgopo. Madira a legodimong a tla fediša kgatelelo ka moka.—Jesaya 11:4; Kutollo 19:11-16.

Go fihla le lehono, pono ya Modimo ka ntwa ga se ya fetoga. O sa dutše a lebelela ntwa e le tsela ya maleba ya go fediša kgatelelo le bokgopo. Eupša bjalo ka ge go bile bjalo historing ka moka, ke Modimo feela yoo ka mo go swanetšego a ka dirago phetho ya gore dintwa tšeo di ka lwewa neng le gore ke mang yo a ka lwago go tšona. Ka ge re bone, Modimo o šetše a dirile phetho ya gore ntwa ya nakong e tlago ke yona e tlago go fediša bokgopo le go lefeletša bao ba gateletšwego gomme  e tla lwewa ke Morwa wa gagwe, Jesu Kriste. Se se bolela gore dintwa tšeo di lwewago mo lefaseng lehono ga se tša dumelelwa ke Modimo, go sa šetšwe gore morero wa tšona o ka bonagala e le o mobotse gakaakang.

Ka mohlala: Akanya ka bana ba motho ba babedi bao ba thomago go lwa ge tatago bona a se gona. Ba kgaotša go lwa ka nakwana gomme ba founela tatago bona. O tee o bolela gore yo mongwe o thomile ntwa yeo, mola yo mongwe a bolela gore yena ga se a swarwa gabotse. Bobedi bja bona ba ipiletša go tatago bona, yo mongwe le yo mongwe a holofetše gore tatago bona o tla ema le yena ntweng ye. Lega go le bjalo, ka morago ga go kwa mahlakore ka moka a taba, tatago bona o ba botša gore ba tlogele go lwa gomme ba mo letele gore a tlo lokiša taba ye ge a fihla gae. Bana ba ba babedi ba motho ba tšea nakwana ba letile. Lega go le bjalo, ka moragonyana ba thoma go lwa gape. Ge tatago bona a fihla gae, ga a kgahlwe le ke o tee wa bana ba gomme o ba otla ka moka ka ge ba se ba mo kwa.

Lehono, gantši ditšhaba tšeo di lwago di kgopela thekgo ya Modimo. Eupša Modimo ga a tšee lehlakore dintweng tše tša lehono. Go e na le moo, Lentšung la gagwe, e lego Beibele, o bolela ka mo go kwagalago gore: “Le se ke la bušetša bobe ka bobe go motho,” le gore: “Le se ke la itefeletša.” (Baroma 12:17, 19) Go oketša moo, o tsebišitše gore batho ba swanetše go “mo [letela] ka go se fele pelo” gore a tšee kgato, e lego seo a tlago go se dira ka ntwa ya Haramagedone. (Psalme 37:7, mongwalo wa ka tlase wa nwt-E) Ge ditšhaba di palelwa ke go letela Modimo gore a tšee kgato gomme go e na le moo tša kgetha go lwa, o lebelela dintwa tše bjalo e le ditiro tša boikgogomošo tša bošoro tšeo di sa mo kgahlego. Ka go re’alo, ntweng ya Haramagedone, Modimo o tla bontšha kgalefo ya gagwe gomme a rarollela dikgohlano tša ditšhaba sa ruri ka go “fediša dintwa go fihla pheletšong ya lefase.” (Psalme 46:9; Jesaya 34:2) Ruri ntwa ya Haramagedone e tla ba ntwa ya go fediša dintwa ka moka.

Go fedišwa ga dintwa ke e nngwe ya ditšhegofatšo tše dintši tša Mmušo wa Modimo. Jesu o ile a bolela ka mmušo woo thapelong ye e tumilego ge a re: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Mmušo wa Modimo o ka se fediše feela dintwa ka moka eupša o tla fediša sebaki sa ntwa, e lego bokgopo. * (Psalme 37:9, 10, 14, 15) Ga go makatše ge balatedi ba Jesu ba letile ka phišego ditšhegofatšo tša Mmušo wa Modimo.—2 Petro 3:13.

Lega go le bjalo, re swanetše go leta go fihlela neng gore Mmušo wa Modimo o fediše tlaišego, kgatelelo le bokgopo ka moka? Go phethagala ga diporofeto tša Beibele go bontšha gore re phela “mehleng ya bofelo” bja tshepedišo ye ya dilo. (2 Timotheo 3:1-5) * Kgauswinyane, Mmušo wa Modimo o tla fediša mehla ye ya bofelo ka ntwa ya Haramagedone.

Ka ge go bontšhitšwe pejana, bao ba hwago ntweng ye ya mafelelo e tla ba bao ba ganago go “[kwa] ditaba tše dibotse tša mabapi le Morena wa rena Jesu.” (2 Bathesalonika 1:8) Eupša gopola gore Modimo ga a thabele go bona motho le ge e le mang a ehwa, go akaretša le ba kgopo. (Hesekiele 33:11) Ka baka la gore “ga a rate gore go fedišwe le ge e le mang” ntweng ye ya mafelelo, gona bjale o dira gore ditaba tše dibotse tša mabapi le Morena Jesu di “[bolelwe] lefaseng ka moka gore e be bohlatse go ditšhaba tšohle” pele bofelo bo etla. (2 Petro 3:8, 9; Mateo 24:14; 1 Timotheo 2:3, 4) Ee, ka modiro wa boboledi wa lefase ka bophara wa Dihlatse tša Jehofa, batho lehono ba hwetša sebaka sa go tseba Modimo, go kwa ditaba tše dibotse tša mabapi le Jesu le gore ba phele ba tle ba bone letšatši leo ka lona ntwa e tla bego e se sa le gona.