SEO THUTAMAHLALE YA TŠA KALAFO E SE BOLELAGO

Go ya ka sehlogo seo se lego ka go Harvard Mental Health Letter, “go leboga go tswalanywa kudu le lethabo. Go leboga go thuša batho gore ba ikwe ba thabile, ba be le diphihlelo tšeo di kgahlišago, ba phele gabotse mmeleng, ba kgone go lebeletšana le mathata le go ba le ditswalano tšeo di tiilego.”

SEO BEIBELE E SE BOLELAGO

Beibele e re kgothaletša go hlagolela moya wa go leboga. Moapostola Paulo yo a ilego a bea mohlala o mobotse, o ngwadile gore: “Ipontšheng le le ba lebogago.” Ka mohlala, o ile a ‘leboga Modimo ka go se kgaotše’ ka karabelo e botse yeo batho ba ilego ba e bontšha molaetšeng woo a bego a ba botša wona. (Bakolose 3:15; 1 Bathesalonika 2:13) Lethabo leo le swarelelago ga le tlišwe feela ke go leboga ka sewelo, eupša le tlišwa ke go ba le moya wa go leboga. Seo gape se re šireletša gore re se be le moya wa go ipona re swanelwa ke dilo tše itšego, go ba le lehufa le go boloka sekgopi, e lego dilo tšeo di ka dirago gore batho ba bangwe ba re katoge, gomme ra lahlegelwa ke lethabo bophelong.

Mmopi wa rena o re beetše mohlala o mobotse wa go leboga. O ile a leboga gaešita le batho. Baheberu 6:10 e re: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.” Mmopi wa rena o bona go se leboge e le go se loke goba go hloka toka.

“Thabang ka mehla. Le lebogeng se sengwe le se sengwe.”—1 Bathesalonika 5:16, 18.

GO ITHUTA GO SEO SE DIREGAGO BOPHELONG

Ge re leboga go tšwa pelong, go sa šetšwe gore re leboga mpho, mantšu a botho goba re thušitšwe ka tsela e itšego, re bontšha motho yoo gore o bohlokwa. Batho bao re sa ba tsebego le bona ba a thaba ge re ba leboga ka ge ba re diretše dilo tše di botse, go swana le ge ba re swaretše lebati.

SEO BEIBELE E SE BOLELAGO

Jesu Kriste o boletše gore: “Tlwaelang go fa gomme batho ba tla le fa. Ba tla le tšhelela memenong ya diaparo tša lena kelo e botse, yeo e katetšwego, yeo e hlokgoseditšwego le ya go falala.” (Luka 6:38) Ela hloko mohlala wa Rose, e lego ngwanenyana wa sefoa wa kua Vanuatu, sehlakahlakeng seo se lego ka Borwa bja Pacific.

Rose o ile a ya dibokeng tša Dihlatse tša Jehofa, eupša ka ge a be a sa tsebe polelo ya diatla e bile go se na yo a tsebago polelo yeo ka phuthegong, o be a sa holege kudu. Ge banyalani bao ba kgonago go fetolela polelo ya diatla ba be ba etetše phuthego yeo gomme ba bona bothata bjoo, ba ile ba thoma klase ya polelo ya diatla. Rose o ile a leboga kudu. O itše: “Ke thabela go ba le bagwera ba bantši ka tsela ye bao ba nthatago.” Banyalani bao ba mo thušitšego ba thaba kudu ge ba bona go leboga ga gagwe e bile ba bona ge a tšea karolo dibokeng. Rose gape o a leboga ge a bona maiteko ao ba bangwe ba a dirilego gore ba ithute polelo ya diatla e le gore ba kgone go bolela le yena.—Ditiro 20:35.

‘Yo a tlišago ditebogo e le sehlabelo sa gagwe ke yena yo a tagafatšago Modimo.’—Psalme 50:23.

O ka hlagolela bjang moya wa go leboga?

SEO BEIBELE E SE BOLELAGO

Tsela yeo re ikwago ka yona e tswalana kudu le tsela yeo re naganago ka yona. Mongwadi wa Beibele e lego Dafida o boditše Modimo ka thapelo gore: “Ke naganišišitše ka mediro ya gago ka moka; ke ile ka nagana ka modiro wa diatla tša gago.” (Psalme 143:5) Dafida e be e le motho yo a tsepamego le yo a naganišišago. O be a na le moya wa go leboga ka gobane o be a phela a naganišiša ka ditsela tša Modimo, e lego seo a ilego a se dira karolo ya bophelo bja gagwe.—Psalme 71:5, 17.

Beibele e re nea keletšo ye e botse, e re: ‘Dilo le ge e le dife tša therešo, tše di rategago, tšeo go bolelwago gabotse ka tšona, tša bokwala le dilo le ge e le dife tše di tumišegago—tšwelang pele le naganišiša ka dilo tše.’ (Bafilipi 4:8) Mantšu ao a rego “tšwelang pele le naganišiša” a bontšha bohlokwa bja gore re naganišiše ka mehla, e lego seo se tla re thušago go bontšha moya wa go leboga.

“Dilo tšeo ke naganišišago ka tšona pelong ya ka e tla ba tša mabapi le kwešišo.”—Psalme 49:3.