Go bontšha tebogo go bohlokwa bakeng sa gore lenyalo le atlege. Lega go le bjalo, banna le basadi ba bantši ga ba sa bona dika tše dibotse tša balekane ba bona; ga ba sa ba bontšha tebogo. Ka pukung ya Emotional Infidelity, moeletši yo mongwe o bolela gore banyalani ba bantši bao ba tlago go yena “ba tshwenyegile kudu ka seo se sa diregego [manyalong a bona] go feta go šetša seo se diregago. Ba tla ofising ya ka go tlo mpotša ka seo se swanetšego go fetoga, e sego seo se sa swanelago go fetoga. Phošo yeo yo mongwe le yo mongwe wa banyalani ba a e dirago ke go se bontšhe lerato ka go leboga.”

Wena le molekane wa gago le ka phema phošo yeo bjang?

Go bontšha tebogo go ka fokotša mathata lenyalong. Ge monna le mosadi ba dira maiteko a go lemoga le go amogela dika tše dibotse tša yo mongwe le yo mongwe wa bona, gantši tswalano ya bona e a kaonefala. Gaešita le bothata bjo bogolo bo ka bonagala e se selo ge balekane ba bontšhana tebogo.

Bakeng sa basadi. Puku yeo go boletšwego ka yona pejana ya Emotional Infidelity e re: “Basadi ba bantši ba na le go hlokomologa gore banna ba rwele boima bjo bogolo bja go hlokomela lapa.” Ditšhabeng tše dingwe, bothata bjoo bo ka ba gona le malapeng ao monna le mosadi ba šomago ka bobedi.

Bakeng sa banna. Gantši banna ba tšeela fase maiteko ao basadi ba a dirago a go hlokomela lapa, e ka ba ka go šoma mošomo wa boiphedišo, go godiša bana goba go dira mešongwana ya ka gae. Fiona, * yo a nago le mengwaga e ka bago e meraro a nyetšwe, o re: “Ka moka re dira diphošo, ka gona ge ke dirile phošo ke nyama kudu. Ka gona ge monna wa ka a mpotša gore ke dirile gabotse selong se itšego, e ka ba ka mešongwana ya ka gae, ke lemoga gore o sa nthata go sa šetšwe mafokodi a ka. Gape seo se dira gore ke bone gore ke a thekgwa e bile ke ikwa ke thabile!”

Go fapana le seo, ge molekane a ikwa a sa tšeelwe godimo, seo se ka bea go botana ga banyalani kotsing. Mosadi yo a bitšwago Valerie o re: “Ge o ikwa o sa tšeelwe godimo  ke molekane wa gago, go bonolo gore o gogelege go motho yoo a dirago gore o ikwe o tšeelwa godimo.”

E ba šedi. Bekeng e latelago, šetša dika tše dibotse tša molekane wa gago. Gape, šetša dilo tšeo a di dirago e le gore dilo di sepele gabotse ka gae, e lego dilo tšeo mohlomongwe o bego o di tšeela fase go fihla ga bjale. Mafelelong a beke, ngwala lelokelelo la (1) dika tša molekane wa gago tšeo o di tšeela godimo le (2) dilo tšeo a di dirilego bakeng sa go hola lapa la lena.—Molao wa motheo wa Beibele: Bafilipi 4:8.

Ke ka baka la’ng go nyakega gore motho a be šedi? Mosadi yo a bitšwago Erika o re: “Ka morago ga mengwaga e mmalwa le nyalane, o ka thoma go tšeela molekane wa gago fase. O thoma go se sa bona dilo tše dibotse tšeo a di dirago gomme wa šetša tšeo a sa di dirego.”

Ipotšiše gore: ‘Na ke tšeela fase go šoma ka thata ga molekane wa ka?’ Ka mohlala, ge e ba monna wa gago a lokiša dilo ka gae, na ga o mo leboge ka ge o tšea gore ke mošomo wa gagwe go dira bjalo? Ge e ba o le monna, na o nagana gore ga wa swanela go leboga maiteko a mosadi wa gago a go godiša bana ka ge o tšea gore o dira seo le kgale a swanetšego go se dira? Ipotše gore o nyaka go lemoga le go leboga maiteko ka moka—e ka ba a magolo goba a manyenyane—ao molekane wa gago a a dirago bakeng sa go hola lapa la lena.—Molao wa motheo wa Beibele: Baroma 12:10.

Leboga go tšwa pelong. Beibele ga e bolele feela gore re swanetše go leboga eupša e re: “Ipontšheng le le ba lebogago.” (Bakolose 3:15) Ka gona leka go itlwaetša go leboga molekane wa gago. Monna yo a bitšwago James o re: “Ge mosadi wa ka a leboga dilo tšeo ke di dirago, seo se dira gore ke šome ka thata gore ke be molekane yo kaone le go leka go oketša maiteko ao ke a dirago gore lenyalo la rena le atlege.”—Molao wa motheo wa Beibele: Bakolose 4:6.

Banna le basadi bao ba leboganago ba matlafatša segwera sa bona. Monna yo a bitšwago Michael o re: “Ke dumela gore manyalo a mantši nkabe a ile a phologa ge nkabe banyalani ba be ba šetša seo ba se ratago ka yo mongwe le yo mongwe wa bona. Ge go e ba le mathata, ga se gantši ba bego ba ka fediša lenyalo ka ge ba tla be ba gopoditšwe gantši ka dika tše dibotse tšeo ba nago le tšona.”