Batho ga ba kgetholle batho ba bangwe feela ka gore ba tšwa nageng efe, gore ke ba morafo ofe le gore ba bolela leleme lefe. Eupša ba ba kgetholla go ya ka gore ba tsena dikereke dife, gore ke ba bong bofe le gore ba na le maemo afe setšhabeng. Batho ba bangwe bona ba ahlola ba bangwe go ya ka mengwaga ya bona, gore ba rutegile gakaakang, gore ba lebelelega bjang le go ya ka bolwetši bjoo ba nago le bjona. Eupša batho bao ba sa dutše ba nagana gore ga ba na kgethollo.

Na le wena o ka ikhwetša o na le kgethollo? Gantši go bonolo go bona gore batho ba bangwe ba na le kgethollo, eupša go ba boima go bona kgethollo yeo rena re nago le yona. Nnete ke gore ka moka ga rena re na le kgethollo ka tsela e itšego. Ge batho ba nagana gampe ka morafo o itšego, gomme ba kopana le motho yo a tšwago morafong woo, “ba tla mo swara ka tsela yeo e fapanago le yeo ba bego ba tlo swara batho ba morafo wa gabo bona ba sa lemoge.”

Ka mohlala, kua Balkan moo go dulago Jovica, go na le morafo o itšego woo o dulago moo. Jovica o re: “Ke be ke nagana gore batho ba morafo woo ga se ba loka, eupša ke be ke sa nagane gore ke a ba kgetholla. Go feta moo, ke be ke feditše le pelo gore ka nnete batho ba ga se ba loka.”

Mebušo e dira melao ya go lwantšha mehuta ka moka ya kgethollo, eupša kgethollo e no tšwela pele e oketšega. Ka baka la’ng? Ka gobane melao yeo e no bolela feela gore batho ba se ke ba dira eng. Eupša ga e kgone go ntšha kgethollo yeo motho a nago le yona ka pelong ya gagwe, mola re tseba gore kgethollo e thoma ka pelong le ka monaganong wa motho. Bjale re ka ipotšiša gore: ‘Na go a kgonega gore re se be le kgethollo?’