Boitshwaro ke

• go kgona go letela selo

• go se nyake selo feela ka gobane o se bona

• go kgona go fetša mošomo wo o sa o ratego

• go naganela batho ba bangwe

Bana bao ba nago le boitshwaro ba ka kgona go gana go dira dilo tše di sa lokago le ge ba ikwa ba nyaka go di dira. Ka lehlakoreng le lengwe, bana bao ba se nago boitshwaro gantši ba ka feleletša

• ba galefa

• ba imelwa monaganong (depression)

• ba kgoga, ba enwa bjala kudu le go diriša di-drugs

• ba eja dijo tše di se nago phepho

Nyakišišo e nngwe e re bana bao ba gotšego ba na le boitshwaro, gantši ga ba lwalelwale, ga ba be le mathata a ditšhelete e bile ga ba be le bothata bja go latela melao. Nyakišišo yeo e dirile gore Moprofesara Angela Duckworth wa Yunibesithing ya Pennsylvania a bolele gore: “Boitshwaro ga bo bolaye.” 

Tseba mo o emego.

KELETŠO YA BEIBELE: “Anke ‘ee’ ya lena e be ee, ‘aowa’ ya lena e be aowa.”—Mateo 5:37.

Ngwana a ka dira matepe e le ge a nyaka go bona gore motswadi o eme kae—mohlomongwe le gare ga batho. Ge motswadi a ka ya ka ngwana wa gagwe, ngwana yoo o tlo bona gore matepe a a mo šomela.

Eupša ge motswadi a ka tseba gore o eme kae, o tla ruta ngwana thuto ya bohlokwa ya gore mo bophelong ga se ka mehla re hwetšago dilo tše re di nyakago. Ngaka David Walsh o ngwadile gore: “Batho bao ba ithutilego thuto yeo ya bohlokwa ke bona ba thabilego mo bophelong, e sego bao ba naganago gore o swanetše go hwetša selo sengwe le sengwe bophelong. Re ipolaela bana ge re ba ruta gore ba tla dula ba hwetša selo se sengwe le se sengwe seo ba se nyakago.” *

 Ge o sa fe ngwana wa gago selo se sengwe le se sengwe seo a se nyakago, o mo thuša gore ge a gotše a tle a kgone go ba le boitshwaro. Ka mohlala, a ka se lekege go kgoga di-drugs, go dira thobalano pele ga lenyalo goba go dira dilo tše dingwe tše di ka mo gobatšago.

Thuša ngwana wa gago go tseba gore re buna se re se bjalago.

KELETŠO YA BEIBELE: “Se sengwe le se sengwe seo motho a se bjalago, ke sona seo a tlago go se buna.” —Bagalatia 6:7.

Ngwana wa gago o swanetše go tseba gore dilo tše re di dirago di ka ba le mafelelo a mabotse goba a mabe. Ka gona, go hloka boitshwaro go na le mafelelo a mabe. Ka mohlala, ge ngwana wa gago a rata go kwatakwata, ba bangwe ba ka se nyake go ba le yena. Eupša ge e ba a kgona go bontšha boitshwaro ge a kwatišitšwe—goba a sa fele pelo ge a nyaka dilo—batho ba tlo mo rata. Thuša ngwana wa gago go kwešiša gore ge e ba a na le boitshwaro, dilo di tlo mo sepelele gabotse bophelong.

Ruta ngwana wa gago gore a tsebe se se tlago pele.

KELETŠO YA BEIBELE: “Le kgonthišetše dilo tše bohlokwa kudu.”—Bafilipi 1:10.

Boitshwaro ga se go no gana go dira dilo tše di fošagetšego; eupša gape ke go dira le dilo tše bohlokwa le ge o sa nyake go di dira. Ka gona, ruta ngwana wa gago go tseba gore dilo tša bohlokwa ke tša mohuta mang le gore a dire tšona pele. Ka mohlala, mo rute gore o swanetše go dira mešongwana ya sekolo pele a ka raloka.

Beela ngwana wa gago mohlala o mobotse.

KELETŠO YA BEIBELE: “Ke le beetše mohlala gore go etša ge ke dirile go lena, le lena le dire bjalo.”—Johane 13:15.

Ngwana wa gago o a bona gore o dira eng ge o kwatile. Ka gona ge o kwatile, itshware. Seo se tla thuša ngwana wa gago go bona gore go itshwara go ba le mafelelo a mabotse. Ka mohlala, ge ngwana wa gago a go kwatiša, na o a galefa goba o dula o theošitše maswafo?