Motho yo a ikokobeditšego o hlompha batho ba bangwe. Ga a ikgantšhe, goba go letela gore batho ba bangwe ba mo tšeele godimo. Go e na le moo, motho yo a ikokobeditšego o tshwenyega ka batho ba bangwe e bile o rata go tšea malebiša.

Batho ba bangwe ba nagana gore motho wa go ikokobetša o robetše goba ga se a hlalefa. Eupša nnete ke gore boikokobetšo bo thuša motho go dumela diphošo tša gagwe le go amogela gore go na le dilo tšeo a sa kgonego go di dira.

• Boikokobetšo bo re thuša go phedišana gabotse le bangwe. Puku ya The Narcissism Epidemic e re: “Batho bao ba ikokobeditšego ba kgona go dira bagwera, e bile ba kgona le go boledišana gabotse le batho ka moka.”

• Boikokobetšo bo tlo thuša ngwana wa gago le ge a gotše. Ge ngwana wa gago a ka ba le boikokobetšo, o tlo thušega gona bjale le nakong e tlago, go swana le ge a tlabe a nyaka mošomo. Mongwadi yo a bitšwago Ngaka Leonard Sax o re: “Gantši mofsa yo a se nago boikokobetšo le yo a sa amogelego gore go na le dilo tše di mo palelago, ga a nke a atlega ge a hlahlobelwa mošomo. Eupša mofsa yo a ikokobeditšego le yo a sa itirego tsebanyane mošomong wo a o hlahlobelwago, go na le kgonagalo e kgolo ya gore ba mo hire.” *

Thuša ngwana wa gago gore a se ke a ipona.

KELETŠO YA BEIBELE: “Ge e ba motho a nagana gore ke selo mola e se selo, gona o a iphora.” —Bagalatia 6:3.

• Phema mantšu ao a senyago bana. Mantšu a go swana le gore: “O ka se palelwe ke selo,” le ao a rego, “O ka ba nto e nngwe le e nngwe ye o nyakago go ba yona,” a senya bana le ge a bonala eka a ba thuša go ntšha ka ga tšhwene. Lebaka ke gore mo bophelong, ga se gantši dilo di sepela ka mokgwa wo re nyakago. Gantši ngwana wa gago o tla atlega ge e ba a tseba dilo tšeo a di nyakago bophelong e bile a šoma ka thata go di fihlelela.

• Ge o reta ngwana, mmotše ka go kgethega gore o mo retela eng. Go no botša ngwana gore, “o bohlale,” ga go mo rute go ba le boikokobetšo. Mmotše gore o mo retela eng.

• Beela ngwana wa gago nako ya go diriša inthanete. Gantši batho bao ba tsenago inthaneteng e ka ba ka founo goba ka khomphutha gore ba boledišana le ba bangwe, ba ikgantšha ka bokgoni  bja bona le dilo tšeo ba di dirago goba tšeo ba nago le tšona. Seo se ka dira gore ngwana wa gago a feleletše a hloka boikokobetšo.

• Ruta ngwana wa gago go kgopela tshwarelo kapela. Ge ngwana wa gago a dirile phošo, mo thuše go e bona le go dumela gore o fošitše.

Ruta ngwana wa gago go leboga.

KELETŠO YA BEIBELE: “Ipontšheng le le ba lebogago.” —Bakolose 3:15.

• Ruta ngwana wa gago go leboga tlholo ya Modimo. Bana ba swanetše go rutwa gore dilo tše Modimo a di bopilego di bohlokwa le gore di re thuša go phela. Ka mohlala, gore re phele, re hloka moya, meetse le dijo. Diriša mehlala ye go thuša ngwana wa gago go rata Modimo le go leboga tlholo ya gagwe.

• Ruta ngwana wa gago go leboga batho ba bangwe. Thuša ngwana wa gago go tseba gore batho ba bangwe ba tlo mo phala ka dilo tše dingwe le gore ge seo se direga a se ka a ba jela mona, go e na le moo a tšee malebiša.

• Ruta ngwana wa gago go leboga ka mediro. Mo rute gore a se ke a leboga ka molomo feela, eupša a bontšhe le ka mediro. Ba re go leboga go thuša motho go dula a ikokobeditše.

Ruta ngwana wa gago gore go thuša ba bangwe go tliša lethabo.

KELETŠO YA BEIBELE: “Ka boikokobetšo le tšee gore ba bangwe ba le feta ka bogolo. Le se ke la kgahlegela ditaba tša lena feela, eupša le kgahlegele le tša ba bangwe.” —Bafilipi 2:3, 4.

• Efa ngwana wa gago mešongwana ya ka gae. Ge o sa fe ngwana mešongwana ya ka gae, seo se ka mo senya, sa dira gore a ipone eka o bohlokwa. Ngwana o swanetše go dira mešongwana ya ka gae pele a ka raloka. Mo thuše go bona gore ge a dira mešongwana ya ka gae o hola ba bangwe le gore o tla ratwa ke batho.

• Dira gore ngwana wa gago a bone gore go thuša ba bangwe go a hola. Go dira bjalo go tla mo thuša gore a gole a na le maikarabelo. Ka gona, thuša ngwana wa gago gore a kgone go bona batho bao ba hlokago thušo. Boledišana le yena ka seo a ka se dirago go ba thuša. Ge ngwana wa gago a thuša ba bangwe, mo rete.