SEO SE DIREGAGO

Dipelaelo di akaretša go se dudišege, go tshwenyega, goba go tšhoga. Re ka fela re welwa ke dipelaelo ka baka la gore re phela lefaseng la go se iketle.

SEO BEIBELE E SE BOLELAGO

Kgoši Dafida o ngwadile gore: “Ke tla ganetša moya wa ka go fihla neng? Ke tla kgaotša neng go nyama ka pelong letšatši ka moka?” (Psalme 13:2) Ke eng seo se thušitšego Dafida go lebeletšana le boemo bjo? O ile a botša Modimo mathata a gagwe ka thapelo, a botile botho bja gagwe ka mo go feletšego. (Psalme 13:5; 62:8) Ge e le gabotse, Modimo o re laletša gore re lahlele mathata a rena go yena.  Petro wa Pele 5:7 e re: “[Lahlelang] dipelaelo tša lena ka moka go [Modimo], gobane o a le hlokomela.”

Lega go le bjalo, go na le dilo tšeo re ka di dirago go laola dipelaelo tša rena. Ka mohlala, ge mongwadi wa Beibele e lego Paulo a be a “belaelela diphuthego ka moka,” o ile a šoma ka thata go kgothatša le go matlafatša bao a bego a tshwenyegile ka bona. (2 Bakorinthe 11:28) Ka baka leo, dipelaelo tša gagwe di bile le mohola ka ge di mo thušitše gore a thuše diphuthego. Go ka ba bjalo le ka rena. Eupša ge re ka se tshwenyege ka batho ba bangwe, re tla bontšha gore ga re na taba le bona.—Diema 17:17.

“Le se ke la kgahlegela ditaba tša lena feela, eupša le kgahlegele le tša ba bangwe.”—Bafilipi 2:4.

SEO SE DIREGAGO

Batho ba ka belaela ka baka la diphošo tša bona tša nakong e fetilego, ka bokamoso goba tšhelete. *

SEO BEIBELE E SE BOLELAGO

Go belaela ka diphošo tša nakong e fetilego: Pele e eba Bakriste, batho ba bangwe ba lekgolong la pele la nywaga e be e le bahlakodi, diotswa, mahodu le matagwa. (1 Bakorinthe 6:9-11) Go e na le gore ba dulele go tshwenyega ka dilo tša nakong e fetilego, ba ile ba fetoša ditsela tša bona gomme ba bota gore Modimo o tla ba gaugela, e lego selo seo a se dirago ka pelo ka moka. Psalme 130:4 e re: ‘Wena Modimo o lebalela e le ka kgonthe, e le gore o boifše.’

Go belaela ka bokamoso: Jesu Kriste o itše: “Le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona.” (Mateo 6:25, 34) Jesu o be a era go re’ng? O be a era gore re tshwenyege feela ka mathata a lehono. O se ke wa ikimetša ka mathata a lehono ka go nagana ka mathata a gosasa, e lego seo se ka dirago gore o se ke wa nagana gabotse gomme wa dira diphetho ka lebelo. Le gona, dula o gopola gore dilo tše dintši tšeo o tshwenyegago ka tšona, ka morago o ka hwetša gore go be go sa hlokagale gore o tshwenyege ka tšona.

Go belaela ka tšhelete: Monna yo bohlale o kile a rapela ka gore: “O se nnee bodiidi goba mahumo.” (Diema 30:8) Go e na le moo, monna yoo o ile a tsoma kgotsofalo—e lego seo Modimo a se thabelago. Go Baheberu 13:5, re bala ka gore: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona. Gobane [Modimo] o itše: ‘Le ka mohla nka se ke ka go tlogela le ge e le go go lahla.’” Go fapana le tšhelete yeo e ka no se re thušego, Modimo le ka mohla a ka se lahle bao ba mmotilego gomme ba sa rate mahumo.

“Ga se ka bona le ge e le mang yo a lokilego a tlogetšwe a le feela, goba bana ba gagwe ba kgopela dijo.”—Psalme 37:25.

SEO BATHO BA SE BOLELAGO

Mmegi wa ditaba e lego Harriet Green o ngwadile sehlogong se se lego kuranteng ya The Guardian ya 2008 gore: “Re tsena mehleng e mefsa ya dipelaelo.” Ka 2014, Patrick O’Connor o ngwadile kuranteng ya The Wall Street Journal gore: “Batho ba Amerika ba belaela go feta le ge e le neng pele.”

SEO BEIBELE E SE BOLELAGO

“Pelaelo e lego pelong ya motho e tla e imela, eupša lentšu le lebotse le tla e thabiša.” (Diema 12:25) “Lentšu le lebotse” le ka hwetšwa ditabeng tše dibotse tša Mmušo wa Modimo. (Mateo 24:14) Mmušo woo, e lego pušo ya Modimo, kgauswinyane o tla dira seo rena ka noši re ka se tsogego re se dirile, e lego go fediša dilo ka moka tšeo di bakago dipelaelo, go akaretša bolwetši le lehu! “[Modimo] o tla phumola megokgo ka moka mahlong a [rena] gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—Kutollo 21:4.

“Eka Modimo yo a neago kholofelo a ka le tlatša ka lethabo le khutšo ka go mmota ga lena.”—Baroma 15:13.