Ee, gantši Dihlatse tša Jehofa di a thuša ge go tšwelela dikotsi. Re thuša Dihlatse le batho bao e sego Dihlatse ka go dumelelana le taelo ya Beibele yeo e lego go Bagalatia 6:10 yeo e rego: “Anke re direleng bohle botse, eupša kudukudu re bo direleng bao ba tswalanego le rena tumelong.” Le gona, dinakong tše bjalo re leka go thuša bao ba nyakago thekgo maikwelong le moyeng.—2 Bakorinthe 1:3, 4.

Ka morago ga kotsi, bagolo ba diphuthego tša tikologong yeo e wetšwego ke kotsi ba leka go ikgokaganya le batho bohle bao ba kopanelago diphuthegong tša gabo bona go bona ge e ba ba šireletšegile le go hwetša gore ba ka ba ba hloka thušo ya mohuta ofe. Ke moka bagolo ba begela ofisi ya lekala ya Dihlatse tša Jehofa ya lefelong leo ka seo ba se dirilego le thušo yeo ba e hlokago kapejana.

Ge e ba diphuthego tša tikologong yeo di ka se kgone go thuša, Sehlopha se Bušago sa Dihlatse tša Jehofa se lokišeletša go nea thušo. Se se swana le tsela yeo Bakriste ba lekgolong la pele la nywaga ba ilego ba hlokomelana ka yona ge go be go wele tlala. (1 Bakorinthe 16:1-4) Ofisi ya lekala ya lefelong leo e kgetha Dikomiti tša Tlhakodišo go rulaganya le go okamela modiro wa tlhakodišo. Dihlatse tše di tšwago ditikologong tše dingwe le tšona di ithaopela go tlo thuša ka dilo tšeo di nago le tšona.—Diema 17:17.

E nngwe ya ditsela tšeo meneelo yeo e romelwago diofising tša makala a Dihlatse tša Jehofa e dirišwago ka yona ke ka go thuša batho bao ba wetšwego ke dikotsi. (Ditiro 11:27-30; 2 Bakorinthe 8:13-15) Ka ge modiro wa tlhakodišo o dirwa ke baithaopi bao ba sa lefiwego, meneelo yeo e ntšhiwago e dirišetšwa feela modiro wa go hlakodiša e sego le go lefa baithaopi. Re diriša meneelo ka moka gabotse.—2 Bakorinthe 8:20.