Sehlogong se se fetilego, re kwele ka dilo tšeo Jesu a rilego di tla direga. Dilo tšeo di re nea bohlatse bja gore Mmušo wa Modimo o thomile go buša kua legodimong, gomme Jesu Kriste ke Kgoši ya Mmušo woo.

Beibele e re ka morago ga gore Jesu e be Kgoši, o ile a raka Sathane le batemona ba gagwe kua legodimong. Seo se diragetše ka 1914. Ga e sa le ba rakelwa mo lefaseng, ga ba sa dumelelwa go boela legodimong. Ke ka baka leo re welwa ke mathata mo lefaseng, ga e sa le go tloga ka 1914.—Kutollo 12:7, 9.

Le ge go tletše mathata mo lefaseng, Jesu ka ge e le Kgoši ya Mmušo wa Modimo, o dirile dilo tše itšego go thuša batho lefaseng ka moka. Ka mohlala, o dirile gore go be le mošomo wa go ruta batho ka Beibele lefaseng ka moka, gomme ka baka la mošomo woo, batho ba bantši ba ithuta melao ya Modimo le go phela ka yona letšatši le letšatši. (Jesaya 2:2-4) Batho ba bantši ba ithutile gore ba ka dira eng gore malapa a bona a thabe. E bile ba ithutile gore ga se ba swanela go dumelela mošomo goba mahumo di eba bohlokwa kudu maphelong a bona. Ka ge ba šomiša seo ba ithutilego sona, ba a holega gona bjale. E bile ba ithuta go ba batho bao Modimo a nyakago gore ba tle ba phele mo lefaseng ge Mmušo wa gagwe o tla be o buša.

Le ge Jesu a šetše a buša kua legodimong, mo lefaseng go sa buša mebušo ya batho. Eupša Modimo o laetše Jesu gore: “Eya o fenye gare ga manaba a gago.” (Psalme 110:2) Kgauswinyane Jesu o tlo fediša manaba a gagwe ka moka, gomme a phološa batho ka moka bao ba kwago melao ya Modimo.

Ka nako yeo, Mmušo wa Modimo o tlo dira dilo tše di latelago:

• O tlo fediša dikereke tša maaka. Modimo o tlo fediša dikereke tšeo e lego kgale di ruta maaka ka yena e bile di gatelela batho. Beibele e bitša dikereke tša maaka gore ke mogweba-ka-mmele. Batho ba tlo tšhoga kudu ge ba bona Modimo a fediša dikereke tša maaka.—Kutollo 17:15, 16.

• O tlo fediša mebušo ya batho. Beibele e re Mmušo wa Modimo o tlo fediša mebušo ka moka ya batho.—Kutollo 19:15, 17, 18.

• O tlo fediša batho ba babe. Diema 2:22 e re: “Ge e le ba kgopo [e lego batho ba babe] ba tla fedišwa lefaseng.” Se se ra gore batho bao ba sa nyakego go tlogela dilo tše mpe tšeo ba di dirago, le bao ba sa latelego melao ya Modimo, ba tlo fedišwa.

• O tlo fediša Sathane le batemona ba gagwe. Sathane le batemona ba gagwe ba ka se sa kgona go ‘timetša batho.’—Kutollo 20:3, 10.

Eupša go tlo direga eng ka batho bao ba latelago melao ya Modimo?

Ge Jesu a tla be a re buša a le legodimong, o tlo re direla dilo tše dintši tšeo di paletšego batho ka moka bao ba kilego ba buša. O tla be a buša a na le batho ba 144 000, bao Modimo a ba kgethilego mo lefaseng. (Kutollo 5:9, 10; 14:1, 3) O tlo dira sohle seo a ka se kgonago gore thato ya Modimo e direge mo lefaseng. Bjale ke’ng seo Modimo o tlago go se direla batho bao ba latelago melao ya gagwe? A re kwe:

• O tlo fediša bolwetši le lehu. Jesaya 33:24 e re: “Ga go na modudi yo a tla rego: ‘Ke a babja.’” Kutollo 21:4 yona e re: ‘Lehu le ka se hlwe le sa ba gona.’

• O tlo dira gore batho ba phele ka khutšo le go šireletšega. Jesaya 54:13 e re: “Khutšo ya bana ba gago e tla ata.” Mika 4:4 yona e re: “Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago.”

• O tlo fa batho mešomo yeo ba tlago go ipshina ka yona. Jesaya 65:22, 23 e re: “[Batho] ba tla thabela modiro wa diatla tša bona ka botlalo. Ba ka se itapišetše lefeela.”

• O tlo dira gore go se sa ba le dikotsi tša tlhago. Jesaya 35:1 e re: “Lešoka le tikologo e se nago meetse di tla hlalala gomme leganata le tla thaba la khukhuša go etša letšoba la safrona.”

• O tlo ruta batho seo ba swanetšego go se dira gore ba tle ba phele ka mo go sa felego. Johane 17:3 e re: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.”

Modimo o nyaka gore le wena o tle o ipshine ka dilo tšeo tše dibotse tšeo a tlago go di direla batho. (Jesaya 48:18) Bjale, o swanetše go dira’ng gore o tle o ipshine ka dilo tše? Sehlogo se se latelago se tla go botša.