Dipotšišo tše di Tšwago go Babadi
“Mosadi” yo go bolelwago ka yena go Jesaya 60:1 ke mang, gona o“tsoga” bjang le go “hlabiša seetša”?
Lengwalo la Jesaya 60:1 le re: “Tsoga, wena mosadi, hlabiša seetša ka gobane seetša sa gago se tlile gomme letago la Jehofa le tagile godimo ga gago.” Mo ge go bolelwa ka “mosadi” go be go bolelwa ka Tsione goba Jerusalema, e lego motse wa Juda wa nako e fetilego. a (Jes. 60:14; 62:1, 2) Jerusalema e emela motse ka moka wa Isiraele. Mantšu a Jesaya a dira gore go be le dipotšišo tše pedi. Ya pele, Jerusalema e tsogile neng le go hlabiša seetša ka tsela ya seswantšhetšo? Ya bobedi, na mantšu a Jesaya a phethagala mo mehleng ya rena?
Jerusalema e tsogile neng le go hlabiša seetša ka tsela ya seswantšhetšo? Jerusalema le tempele ya yona di ile tša dula e le lešope nakong ya ge Bajuda ba be ba le Babilona ka mengwaga e 70. Eupša ka morago ga gore Babilona e fenywe ke Bamede le Baperesia, Baisiraele ka moka bao ba bego ba le Babilona ba ile ba boela ga gabo bona gomme ba tsošološa borapedi bja therešo. (Esera 1:1-4) Go thoma ka 537 BCE, Baisiraele bao ba bego ba šetše bao ba botegago go tšwa melokong ka moka e 12 ba ile ba dira sona seo. (Jes. 60:4) Ba ile ba thoma go neela Jehofa dihlabelo, ba ba le menyanya ya mešaša le go tsošološa tempele. (Esera 3:1-4, 7-11; 6:16-22) Ka nako yeo letago la Jehofa le ile la thoma go phadimela Jerusalema e lego batho ba Modimo ba tsošološitšwego. Ba ile ba ba seetša sa seswantšhetšo go ditšhaba tšeo di bego di sa tsebe Jehofa.
Karolo e nngwe ya boporofeta bja Jesaya e ile ya phethagala mehleng ya kgale kua Jerusalema. Ga se Baisiraele ka moka ba ilego ba tšwela pele ba botegela Jehofa. (Neh. 13:27; Mal. 1:6-8; 2:13, 14; Mat. 15:7-9) Ka morago ba ile ba latola le Mesia e lego Jesu Kriste. (Mat. 27:1, 2) Ka 70 C.E., Jerusalema le tempele ya yona di ile tša fedišwa ka lekga la bobedi.
Jehofa o ile a bolela e sa le pele gore seo se tlo direga. (Dan. 9:24-27) Go molaleng gore e be e se morero wa gagwe gore Jerusalema yeo e lego lefaseng e phethagatše boporofeta ka moka bjo bo lego go Jesaya 60.
Na mantšu a Jesaya a phethagala mo mehleng ya rena? Ee, eupša a phethagala ka mosadi wa seswantšhetšo e lego “Jerusalema ya godimo.” Moapostola Paulo ngwadile gore ke “mmago rena.” (Bagal. 4:26) Jerusalema ya godimo ke mokgatlo wa Modimo wa legodimong wo o bopšago ke dibopiwa tše di botegago tša moya. “Bana” ba gagwe ba akaretša Jesu le Bakriste ba 144 000 ba tloditšwego bao go swana le Paulo ba nago le kholofelo ya go phela legodimong. Bakriste ba tloditšwego ba dira “setšhaba se sekgethwa”e lego “Isiraele ya Modimo.”—1 Pet. 2:9; Bagal. 6:16.
Jerusalema ya godimo e ile ya “tsoga” bjang le go “hlabiša seetša”? E ile ya dira bjalo ka bana ba gagwe ba mo lefaseng ba tloditšwego. Dilo tšeo ba di dirago di swana le tšeo go bolelwago ka tšona go Jesaya kgaolo 60.
Bakriste ba tloditšwego ba ile ba swanelwa ke go “tsoga” ka gobane ba ile ba ba leswiswing la seswantšhetšo e lego nakong ya ge mefoka e lego bahlanogi ba tsena ka phuthegong lekgolong la bobedi la mengwaga C.E. (Mat. 13:37-43) Ba ile ba thopša ke Babilona o Mogolo, e lego mmušo wa lefase wa bodumedi bja maaka. Batlotšwa e ile ya ba mathopša go fihla “bofelong bja tshepedišo ya dilo,” e lego nako yeo e thomilego ka ngwaga wa 1914. (Mat. 13:39, 40) Ka ngwaga wa 1919, ba ile ba lokollwa bokgobeng ke moka ba thoma go hlabiša seetša sa seswantšhetšo ka go bolela ditaba tše dibotse tša Mmušo wa Modimo. b Ge nako e dutše e eya, batho ba go tšwa ditšhabeng ka moka ba ile ba tla seetšeng seo go akaretša le bao e bego e šetše e le Isiraele ya Modimo, “dikgoši” tšeo go bolelwago ka tšona go Jesaya 60:3.—Kut. 5:9, 10.
Nakong e tlago Bakriste ba tloditšwego ba tlo hlabiša seetša sa Modimo ka tsela e makatšago. Ba tlo dira seo bjang? Ge ba fetša modiro wa bona mo lefaseng ba tlo ba karolo ya “Jerusalema o Mofsa,” goba monyadiwa wa kwana e lego ba 144 000 bao ba hlankelago bjalo ka dikgoši goba baperisita. —Kut. 14:1; 21:1, 2, 24; 22:3-5.
Jerusalema e Mpsha e tlo bapala karolo e kgolo go phethagatšeng mantšu ao a lego go Jesaya 60:1. (Bapiša le Jesaya 60:1, 3, 5, 11, 19, 20 le Kutollo 21:2, 9-11, 22-26.) Go etša ge Jerusalema e be e le karolo ya mmušo wa Isiraele, Jerusalema e Mpsha gotee le Kriste e tlo ba mmušo wa tshepedišo e Mpsha ya dilo. Ke bjang Jerusalema e Mpsha e ‘theogago e etšwa legodimong go Modimo’? Ka go dira dilo tšeo di tlo kgomago lefase. Batho bao ba boifago Modimo go tšwa lefaseng ka moka ba “tla sepela ka seetša sa wona.” Ba ka se sa dira sebe le go hwa. (Kut. 21:3, 4, 24) Mafelelong go tlo ba le “tsošološo ya dilo ka moka” go etša ge Jesaya le baporofeta ba bangwe ba boletše e sa le pele. (Dit. 3:21) Tsošološo yeo e kgolo e thomile ge Kriste a e ba Kgoši gomme e tlo fela ge Pušo ya Mengwaga e Sekete e fela.
a Phetolelo ya Lefase le Lefsa go Jesaya 60:1, e diriša lentšu “mosadi” go e na le “Tsione,” goba “Jerusalema,” ka gobane madiri a Seheberu bakeng sa lentšu “tsoga” le go“hlabiša seetša” a dirišwa go šupa mosadi go swana le mantšu a a rego “ga gago.” Lentšu “mosadi” le thuša mmadi wa Seisemane go kwešiša gore go bolelwa ka mosadi wa seswantšhetšo.
b Go tsošološwa ga borapedi bja therešo mo go dirilwego ka 1919 go hlaloswa le go lengwalo la Hesekiele 37:1-14 le Kutollo 11:7-12. Hesekiele o ile a bolela e sa le pele ka go tsošološwa ga Bakriste ba tloditšwego ka moka ka morago ga go ba bokgobeng ka nako e telele. Boporofeta bjo bo lego go Kutollo bo bolela ka go tsošološa ga seswantšhetšo ga sehlopha se senyenyane sa bana babo rena ba tloditšwego bao ba bego ba palelwa ke go hlankela Jehofa ka nakwana ka ge ba be ba golegilwe. Ka 1919, ba ile ba kgethwa gore e be “mohlanka yo a botegago le wa temogo.”—Mat. 24:45; bala puku ye e rego Pure Worship of Jehovah—Restored At Last! letl. 118.
