“Ga o kgole le Mmušo wa Modimo.”—Mareka 12:34.

SEO BATHO BA SE BOLELAGO

Go ya ka kereke e nngwe e kgolo ya Bojakane, batho ba bantši ba dumela gore “mmušo wa Modimo ke pušo ya Modimo pelong le bophelong bja motho.”

SEO BEIBELE E SE BOLELAGO

Mmušo ke pušo ya kgonthe, e sego feela kgopolo ya gore motho o ineetše go Modimo pelong ya gagwe. Mmušo wa Modimo o tla buša lefase ka moka.—Psalme 72:8; Daniele 7:14.

Eupša go thwe’ng ka mantšu a Jesu a gore “mmušô wa Modimo o ka mo teng xa lena?” (Mongwalo o sekamego ke wa rena; Luka 17:21, Beibele ya Sepedi) Jesu o be a sa bolele gore Mmušo o be o le ka dipelong tša batheetši ba gagwe. Ke ka baka la’ng re re’alo? Ka gobane ka nako yeo o be a bolela le Bafarisei. Jesu o boletše gore ba be ba ka se tsene Mmušong ka gore borapedi bja bona e be e le bja boikaketši e bile bo sa amogelege go Modimo. (Mateo 23:13) Lega go le bjalo, Jesu o be a nepile ka go bolela gore Mmušo wa Modimo o “teng xa lena” goba bjalo ka ge Phetolelo ya Lefase le Lefsa e bolela gore o “gare ga lena.” Ka baka la’ng? Ka gobane yena, bjalo ka Kgoši ya nakong e tlago ya Mmušo, o be a eme pele ga bona.—Luka 17:21.

“Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:10.

SEO BEIBELE E SE BOLELAGO

Mmušo ke pušo ya kgonthe ya Modimo le Mmuši e lego Jesu Kriste. (Mateo 28:18; 1 Timotheo 6:14, 15) Morero wa wona ke go dira gore thato ya Modimo e direge legodimong le lefaseng. (Mateo 6:10) Ka gona, Modimo o tla rarolla mathata a batho a diriša Mmušo wa gagwe. Mmušo woo o tla dira seo mebušo ya batho e ka se kego ya se fihlelela.

Ge go buša Mmušo wa Modimo, batho ba tla thabela khutšo, tšhireletšego gotee le katlego lefaseng la paradeise. (Psalme 46:9; Jesaya 35:1; Mika 4:4) Go ka se sa ba le yo a babjago goba go hwa, gomme malwetši a tla fedišwa. (Jesaya 33:24; Kutollo 21:4) Gaešita le botšofadi bo ka se sa ba gona. Beibele e bolelela pele gore: “Anke nama ya gagwe e be e nanana go feta bofseng; a a boele mehleng ya matla a bofseng bja gagwe.”—Jobo 33:25.

SEO O KA SE DIRAGO

Go sa šetšwe gore o wa lešika lefe goba o belegetšwe lefelong lefe, o ka ba molata wa Mmušo wa Modimo ge e ba o dira seo Modimo a go kgopelago sona. Beibele e re: “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”—Ditiro 10:34, 35.

“Modimo wa legodimo o tla hloma mmušo wo o ka se kego wa fedišwa.”—Daniele 2:44.

SEO BATHO BA SE BOLELAGO

Ba bangwe ba dumela gore batho ba tla hloma Mmušo wa Modimo mo lefaseng, mohlomongwe ka go dira gore ba bangwe ba sokologele ditumelong tša bona goba ka go katanela gore go be le khutšo ya lefase le borwarre.

SEO BEIBELE E SE BOLELAGO

Mmušo o tlo hlongwa ke Modimo, e sego motho. (Daniele 2:44) Mabapi le go hlongwa ga Mmušo woo, Modimo o re: “Nna ena ke beile kgoši ya ka.” (Psalme 2:6) Batho ga ba tliše Mmušo wa Modimo, e bile ba ka se thibele merero ya wona, ka ge o tla buša lefaseng ka moka go tšwa legodimong.—Mateo 4:17.

KE KA BAKA LA ENG GO SWANETŠE GO BA BOHLOKWA GO WENA?

E fo ba e le ga tlhago go duma gore ka letšatši le lengwe batho ba fihlelele khutšo le botee. O ka ba wa ikgafa e le ge o leka go fihlelela seo eupša wa nyama ge o sa fihlelele dipakane tša gago. Go tseba gore Mmušo wa Modimo o thekgwa ke matla a gagwe go tla go thuša go diriša matla a gago ka tsela e holago kudu, ka gore o be molata wa Mmušo woo.