Aowa, madumedi ga a swane. Beibele e bolela ka madumedi a mantši ao a sa thabišego Modimo. Madumedi a a arotšwe ka mehuta e mebedi.

Mohuta wa Pele: Go rapela medimo ya maaka

 Beibele e hlalosa go rapela medimo ya maaka ka dipolelwana tše swanago le “lefeela” le “dilo tše se nago mohola.” (Jeremia 10:3-5; 16:19, 20) Jehofa a Modimo o ile a laela setšhaba sa Isiraele gore: “O se ke wa ba le medimo le ge e le efe e mengwe ka ntle le nna.” (Ekisodo 20:3, 23; 23:24) Ge Baisiraele ba be ba rapela medimo ya maaka, “Jehofa o ile a tuka bogale.”—Numeri 25:3; Lefitiko 20:2; Baahlodi 2:13, 14.

 Modimo o sa ikwa ka tsela e swanago ka go rapela “bao ba bitšwago medimo.” (1 Bakorinthe 8:5, 6; Bagalatia 4:8) Ge Modimo a be a laela bao ba nyakago go mo rapela gore ba tlogele go gwerana le barapedi ba medimo ya maaka, o itše: “Tšwang gare ga bona, le itlhaole.” (2 Bakorinthe 6:14-17) Ge e ba madumedi ka moka a swana e bile a amogelwa ke Modimo, gona ke ka baka la’ng a ka nea taelo ye?

Mohuta wa Bobedi: Go rapela Modimo wa therešo ka tsela yeo a sa e amogelego

 Nakong e nngwe, Baisiraele ba be ba rapela Modimo ba diriša ditumelo le mekgwa yeo ba ithutilego yona ge ba be ba rapela medimo ya maaka, eupša Jehofa o ile a se amogele go tswaka ga bona borapedi bja therešo le bja maaka. (Ekisodo 32:8; Doiteronomio 12:2-4) Jesu o ile a sola baetapele ba bodumedi ka baka la tsela yeo ba bego ba rapela Modimo ka yona; ba itira badumedi, eupša e le baikaketši e bile ba “hlokomologile ditaba tše bohlokwa tša Molao, e lego, toka le kgaugelo le potego.”—Mateo 23:23.

 Go swana le lehono, Modimo o amogela feela bodumedi bjo bo rutago therešo. Therešo ye e hwetšwa ka Beibeleng. (Johane 4:24; 17:17; 2 Timotheo 3:16, 17) Madumedi ao a rutago seo se ganetšanago le Beibele ge e le gabotse a aroša batho go Modimo. Dithuto tše dintši tšeo batho ba naganago gore di tšwa Beibeleng, tše swanago le thuto ya Boraro Botee, ya gore moya wa motho ga o hwe le tlaišo ya ka mo go sa felego di tšwa go bao ba rapelago medimo ya maaka. Bodumedi bjo bo thekgago dithuto tše bjalo ke bja “lefeela,” goba bja go hloka mohola ka gobane bo latela metlwae ya bodumedi go e na le go latela seo Modimo a se nyakago.—Mareka 7:7, 8.

 Modimo o hloile bodumedi bja boikaketši. (Tito 1:16) E le go thuša batho go batamela kgauswi le Modimo, bodumedi bo swanetše go kgoma maphelo a bona a letšatši le letšatši e sego feela go ba ruta metlwae e itšego. Ka mohlala Beibele e re: “Ge e ba motho a ipotša gore o rapela Modimo ka tsela ya kgonthe eupša a sa laole leleme la gagwe bjalo ka ge eka ke ka tomo, gona o fora pelo ya gagwe gomme borapedi bja gagwe ke bja lefeela. Mohuta wa borapedi bjo bo hlwekilego le bjo bo sa šilafalago ponong ya Modimo wa rena le Tate ke wo: Ke go babalela ditšhiwana le bahlologadi ditlaišegong tša bona le go itota ga motho a se na sepatso go tšwa lefaseng.” (Jakobo 1:26, 27) Beibele e bontšha gore “borapedi bjo bo hlwekilego” ke bjo bo se nago boikaketši.