Hele ke Eng? Na ke Moo Batho ba Tlaišetšwago sa Ruri?
Karabo ya Beibele
Diphetolelo tše dingwe tša Beibele di diriša lentšu “hele” ge di fetolela lentšu la Seheberu e lego “Sheol” le leo le sepedišanago le lona la Segerika e lego “Hades,” ao ka moka ga ona a bolelago ka lebitla le le tlwaelegilego la batho. (Psalme 16:10; Ditiro 2:27) Batho ba bantši ba dumela gore go na le mollo wa dihele, go etša ge go bontšhitšwe seswantšhong sa bodumedi seo se sepedišanago le sehlogo se. Eupša Beibele ga e rute seo.
Bao ba lego mabitleng ga ba tsebe selo e bile ga ba kwe bohloko. “Bodulabahu ... ga go na modiro le ge e le maano goba tsebo.”—Mmoledi 9:10.
Le batho ba ba lokilego ba ya diheleng. Banna ba botegago ba bjalo ka Jakobo le Jobo ba be ba tseba gore ba ya diheleng.—Genesi 37:35; Jobo 14:13.
Moputso wa sebe ke lehu, e sego go tšhungwa diheleng. “Yo a hwilego o hunologile sebeng sa gagwe.”—Baroma 6:7.
Go tlaiša batho sa ruri go kgahlanong le toka ya Modimo. (Doiteronomio 32:4) Ge monna wa mathomo Adama a be a dira sebe, Modimo o mmoditše gore kotlo ya gagwe e be e tla ba go kgaotša go phela, o itše: “O lerole gomme o tla boela leroleng.” (Genesi 3:19) Modimo o be a tlo ba a bolela maaka ge nkabe a be a tla iša Adama mollong wa dihele.
Modimo ga a nagane le ka go tlaiša batho sa ruri. Taba ya gore Modimo o tla tlaiša batho mollong wa dihele e thulana le thuto ya Beibele ya gore “Modimo ke lerato.”—1 Johane 4:8; Jeremia 7:31.