Maria Magdalena e be e le Mang?
Karabo ya Beibele
Maria Magdalena e be e le molatedi yo a botegago wa Jesu Kriste. Leina la gagwe la Magdalena e ka ba e le leina la toropo ya Magda, yeo go ka diregago gore ke Magadan. Toropo ye e be e le kgauswi le lewatle la Galilea. Go ka direga gore Maria o kile a dula toropong yeo.
Maria Magdalena e be e le yo mongwe wa basadi bao ba kilego ba sepela le Jesu le Barutiwa ba gagwe, gaešita le go ba hlokomela ka dilo tšeo ba di hlokago. (Luka 8:1-3) O be a le gona ge Jesu a be a bolawa e bile ke yo mongwe wa basadi ba mathomo bao ba bonego Jesu kamorago ga gore a tsošwe bahung.—Mareka 15:40; Johane 20:11-18.
Na Maria Magdalena e be e le mogweba ka mmele?
Beibele ga e re botše gore Maria Magdalena e be e le mogweba ka mmele. Seo e re botšago sona ka yena ke gore Jesu o ile a raka matemona a šupa ao a bego a le go yena.—Luka 8:2.
Bjale taba ya gore pele Maria a e ba morutiwa wa Jesu e be e le mogweba ka mmele e tšwa kae? Ka morago ga mengwaga e mentši Maria Magdalena a šetše a hlokofetše, batho ba bangwe ba ile ba bolela gore mosadi (yo mohlomongwe e bego e le mogweba ka mmele), yoo a ilego a hlapiša Jesu maoto ka megokgo gomme a a omiša ka meriri ya gagwe, e be e le Maria Magdalena. (Luka 7:36-38) Lega go le bjalo, ka Beibeleng ga go na mo go bolelwago ka taba ye.
Na Maria Magdalena e be e le “moapostola yo mogolo”?
Aowa. Kereke ya Katholika e bitša Maria gore ke “St. Mary Magdalene,” e bile e re ke “moapostola yo mogolo” ka gobane e bile yena motho wa mathomo wa go yo botša baapostola ba bangwe gore Jesu o tsošitšwe bahung. (Johane 20:18) Eupša seo ga se sa mo dira gore e be yena moapostola. Le gona, ka Beibeleng ga go na mo go ngwadilwego gore e be e le moapostola.—Luka 6:12-16.
Beibele e feditšwe go ngwalwa pejana ga ngwaga wa 100 C.E. Bjale, ka morago ga mengwaga e mentši Beibele e feditšwe go ngwalwa, baetapele ba dikereke ba ile ba phetha ka gore ba fe Maria Magdalena maemo a godimo ka gore ba mmitše gore ke “mokgethwa.” Go na le mangwalo a mangwe ao a ilego a fetšwa go ngwalwa mengwageng ya bo-100 go ya go ya bo-300. Dingwalwa tšeo di hlalosa gore barutiwa ba bangwe ba Jesu ba be ba jela Maria Magdalena mona, eupša dingwalwa tšeo ga se karolo ya molaetša o tšwago go Modimo. Le gona e no ba ditori tšeo batho ba itlhametšego tšona, tšeo di se nago bohlatse.
Na Maria Magdalena e be e le Mosadi wa Jesu Kriste?
Aowa. Ge e le gabotse, Beibele e re Jesu ga se a ka a nyala. a
a Bala sehlogo seo se rego, “Na Jesu o be a Nyetše? Na o be a e na le Bana Babo?”
You May Also Like
DIPOTŠIŠO TŠA BEIBELE DI A ARABJA
Re ka Ithuta Eng go Basadi Bao go Bolelwago ka Bona ka Beibeleng?
Go basadi bao go bolelwago ka bona ka Beibeleng, bona phapano magareng ga basadi bao ba ilego ba bea mohlala o mobotse le bao ba ilego ba bea mohlala o mobe.
DIPOTŠIŠO TŠA BEIBELE DI A ARABJA
Na Jesu o be a Nyetše? Na o be a e na le Bana Babo?
Ka ge Beibele e sa bolele ka go lebanya ka maemo a gagwe a lenyalo, re ka tseba bjang gore o be a nyetše goba a se a nyala?
DITHUTO TŠA BEIBELE
Leka Thuto ya Rena ya Beibele
Ithute Beibele mahala o thušwa ke motho yo mongwe.