Dihlatse tša Jehofa kua Bulgaria di gare di ruta batho ka Modimo le ka lentšu la gagwe e lego Beibele. Ge e sa le go tloga ka ngwaga wa 2 000, Dihlatse tše dintši di hudugela Bulgaria gore di kgone go ba thuša. Ke mathata afe ao o ka kopanago le ona ge o hudugela nageng e nngwe? Ke ka baka la eng go le bohlokwa go huduga? A re kweng seo bao ba hudugetšego Bulgaria ba se bolelago.

 Darren yo a tšwago England o re: “Re be re dutše re nyaka go ya nageng yeo go nago le tlhokagalo. Ka morago ga gore ke nyalane le Dawn, re ile ra ya go dula London gore re thuše go ruta batho Beibele ka leleme la se-Russia. Re be re nagana go ya nageng e nngwe eupša mabaka a sa re dumelele. Re be re ipoditše gore re ka se sa kgona go huduga, eupša mogwera wa rena o ile a re bontšha gore maemo a rena a fetogile gomme re ka kgona go huduga.” Darren le Dawn ba ile ba thoma go nyaka naga yeo ba ka hudugelago go yona gore ba ye go ruta batho ka Beibele. Ka 2011, ba ile ba hudugela Bulgaria.

 Mehlala ya batho bao ba hlankelago dinageng tše dingwe, e ile ya kgothatša ba bangwe bao ba bego ba sa nagane go ya go hlankela dinageng tše dingwe. Giada yo a bego a dula le monna wa gagwe e lego Luca kua Italy, o re:“Ke kopane le Dihlatse tše dintši tšeo di bego di thabile ka baka la go hlankela kua South Amerika le Afrika. Ke ile ka kgahlwa ke lethabo la bona le diphihlelo tša bona. Seo se nthušitše gore ke nyake go dira ka mo go oketšegilego tirelong ya Jehofa.”

 Tomasz le Veronika gotee le bana ba bona ba babedi e lego Klara le Mathias, ba ile ba tloga Czech Republic ba ya Bulgaria ka 2015, ke eng seo se ilego sa ba kgothaletša gore ba ye moo? Tomasz o re: “Re ile ra naganišiša ka mehlala ya batho ba bangwe gotee le ya ba leloko bao ba ilego ba hudugela dinageng tše dingwe. Re ile ra bona gore ba thabile ke moka ra boledišana ka taba yeo re le lapa.” Gona bjale lapa leo le hlankela le thabile toropong ya Montana kua Bulgaria.

 Linda ke Hlatse e nngwe yeo e hudugetšego Bulgaria. O re: “Ke ile ka etela Ecuador ke moka ka kopana le bagoeledi ba bangwe bao ba bego ba hudugetše moo gore ba bolele ditaba tše dibotse. Seo se dirile gore ke nagane gore lenna ka letšatši le lengwe, nka ya go hlankela moo go nago tlhokagalo ya bagoeledi.” Petteri le Nadja bao ba tšwago Finland, le bona ba ile ba naganišiša ka mohlala wa batho ba bangwe. Ba re: “Ka phuthegong ya gabo rena go be go na le batho ba bangwe bao ba ilego ba hudugela mafelong a mangwe gore ba ye go thuša batho gore ba ithute ka seo Beibele e se rutago. Ba be ba dula ba bolela gabotse ka mengwaga yeo ba e feditšego mohuteng wo wa tirelo. Ba re mengwaga yeo e bile yeo e thabišago kudu bophelong bja bona.”

 Go bohlokwa gore bao ba nyakago go hudugela nageng e nngwe ba rulaganye dilo gabotse e sa le pele. (Luka 14:28-30) Nele yo a tšwago Belgium o re: “Ge ke be ke thoma go nagana kudu ka go yo hlankela nageng e nngwe, ke ile ka rapela ke moka ka bala dikgatišo tšeo di bolelago gore ke swanetše go dira eng gore ke kgone go ya go hlankela nageng e nngwe. Ke ile ka bala dikgatišo tšeo ke moka ka bona gore ke swanetše go dira eng gore ke kgone go huduga.”

 Kristian le Irmina bao ba tšwago Poland, ba na le mengwaga e fetago e senyane ba dula Bulgaria. Ba re go kopanela le sehlopha sa go bolela leleme la se-Bulgaria go ba thušitše kudu pela ba ka huduga. Sehlopha seo se ile sa ba kgothatša le go ba thuša go ithuta leleme la gabo bona. Kristian le Irmina ba re: “Re lemogile gore ge o ikgafa, Jehofa o a go hlokomela. Ge o ikgafa ke moka o re go Jehofa, ‘Ke nna yo, roma nna’ o tlo kgona go dira dilo tšeo o bego o sa nagane gore o ka kgona go di dira.”—Jesaya 6:8.

 Reto le Cornelia bao ba tšwago Switzerland ba ile ba nolofatša bophelo bja bona gore ba boloke tšhelete gore ba kgone go ya go hlankela Bulgaria. Ba re: “Ngwageng wa pele re ka huduga, re ile ra etela Bulgaria ka beke feela gore re bone gore naga yeo e bjang. Ge re le moo re ile ra bolela le baromiwa ba bangwe bao ba ilego ba re botša gore re swanetše go dira eng.” Reto le Cornelia ba ile ba diriša seo baromiwa bao ba ilego ba ba botša sona, gomme ga bjale ba na le mengwaga e fetago e 20 ba dula Bulgaria.

 Bao ba hudugelago nageng e nngwe ba swanetše go tlwaelana le bophelo bja moo goba mohlomongwe ba ka kopana le mathata a itšego. (Ditiro 16:9, 10; 1 Bakorinthe 9:19-23) Ba bantši ba thatafalelwa ke go ithuta leleme le lefsa. Luca yoo re boletšego ka yena pejana, o re: “Re be re dula re thabela go fana ka dikarabo dibokeng. Eupša go ile gwa tšea nako gore nna le mosadi wa ka re kgone go fana ka dikarabo tše bonolo ka se-Bulgaria! Go be go le bjalo ka ge eka re bana ba ba nyenyane. Ge e le gabotse, dikarabo tša bana ba moo di be di phala tša rena kgole.

 Ravil yo a tšwago Germany, o re: “Go be go lapiša go ithuta leleme le lefsa. Eupša ke ile ka dula ke ipotša gore ga se ka swanela go dula ke nagana kudu ka diphošo tšeo ke di dirago. Ke ile ka lebelela seo e se bothata, eupša e le karolo ya ka ya go hlankela Jehofa.

 Linda yoo re boletšego ka yena pejana, o re: “Ga ke kgone go ithuta maleme a mafsa gabonolo. Se-Bulgaria se thata, ke gantši ke nagana go tlogela go ithuta sona. O lewa ke bodutu ge o sa kgone go bolela le batho, e bile o sa kwe gore ba reng ge ba bolela. Ke ile ka bala dikgatišo ka se-Sweden gore ke tiiše segwera sa ka le Jehofa. Mafelelong ke ile ka kgona go ithuta leleme leo ke thušwa ke banabešo le dikgaetšedi.”

 Bothata bjo bongwe e ka ba go gopola gae. Batho bao ba hudugelago nageng e nngwe ba tlogela bagwera ba bona le ba leloko gae. Eva yo a hudugetšego Bulgaria le monna wa gagwe e lego Yannis o re: “Ke ile ka thoma go lewa ke bodutu, eupša re ile ra dula re bolela le bagwera ba rena le ba leloko bao ba lego gae, e bile ra dira le bagwera ba bafsa mo.

 Go na le mathata a mangwe. Robert le Liana bao ba tšwago Switzerland, ba re: “Go ithuta leleme le lefsa le setšo sa mo e bile bothata bjo bogolo, le gona re be re se ra itokišeletša marega a mo a go tonya kudu.” Eupša go dula re thabile go re thušitše gore re hlankele ka go botega mo Bulgaria ka mengwaga e 14.

 Lilly o kgothaletša batho gore ba ye go hlankela mo go nago le tlhokagalo. O re: “Ke tseba Jehofa gabotse go feta ka tsela yeo ke bego ke mo tseba ka yona ge ke be ke sa le gae. Ke dula ke swaregile ka go thuša batho ba bangwe, le gona se se nthuša gore ke be le segwera se sebotse le Jehofa, ke dule ke thabile e bile ke kgotsofetše.” Monna wa gagwe e lego Ravil, o dumelelana le yena, o re: “Ga go na seo se thabišago go feta go tsebana le bana beno le dikgaetšedi bao ba tšwago dinageng tše dingwe, bao ba swaregilego ka go thuša batho go ithuta ka ditherešo tša Beibele. Ke ile ka ithuta dilo tše dintši go bona.”

 Go ikgafa ga bana babo rena le dikgaetšedi go dirile gore go be le mafelelo a mabotse ge go bolelwa “ditaba tše dibotse tša Mmušo. . . lefaseng ka moka.” (Mateo 24:14) Bohle bao ba ilego ba ikgafa gomme ba hudugela Bulgaria gore ba thuše batho ba moo go ithuta ka Beibele, ba ile ba bona ge Jehofa a dira gore ba thabe le go bona ge a ba thuša gore dilo tšeo ba bego ba nyaka go di dira ba di fihlelele.—Psalme 20:1-4.