Ndalama ni muju wa viipa vonse?
Yankho ya m’Baibolo
Yayi. Baibolo yunena lini kuti ndalama ni ziipa olo kuti niyezuleta mavuto. Koma vakukonda laŵila ŵanthu anyinji ni vakuti “ndalama ni muju wa viipa vonse” vamene ivi vuwonesha kuti omvwisha lini vayunena Baibolo. Baibolo yunena kuti “muju wa viipa vonse ni chikondi pa ndamala.” a—1 Timoteyo 6:10, Buku Lopatulika Ndilo Mawu a Mulungu.
Kansi Baibolo yunena chinji pa nkhani ya ndalama?
Baibolo yunena kuti munthu akokatishila ntchito ndalama mwanzelu, zingamuyavye komasoti “kumuteteza.” (Mlaliki 7:12) ndipo yutembeja ŵanthu opasa mofumila pansi pa ntima amene oyavya ayawo, kupamikijapo kuŵapasa ndalama.—Miyambo 11:25.
Olo kuti vili tetyo, Baibolo yuchenjeja soti kuti tufunika lini kukonda ngako ndalama. Yunena kuti: “Moyo wanu unkhale wosakonda ndalama, koma munkhale okhutila na vamuli navo pa nthawe yamene iyo.” (Aheberi 13:5) Apa mfundo ni yakuti m’malo mosakila-sakila chuma, tikokatishila ntchito ndalama zatili nazo mwanzelu ndipo tikonkhala okhutila na vinthu vatafwana monga chakulya, vovwala na poyona.—1 Timoteyo 6:8.
Ndaŵa yanji Baibolo yunena kuti kukonda ndalama n’kuipa?
Ŵanthu otana azafwane lini moyo wosasila. (Aefeso 5:5) Tunena tetyo chifukwa kutana kuli monga kulambila mafano kapena kuti kulambila kwawenye. (Akolose 3:5) Komasoti ŵanthu otana akafuna kufwana chinthu, okatishila lini Mfundo za m’Baibolo. Lemba ya Miyambo 28:20 yunena kuti munthu “oyesa kuti afwane chuma mokulumija, opitilija lini kunkhala wosaphoniya”. Ŵanthu ofuna kuti afwane vinthu mokulumija, ochita vinthu mwachinyengo, olonda vinthu vayawo, oyiŵa, kusunga ŵanthu ayakine mokakamijika olosoti kupaya ŵanthu ayakine.
Olo kuti ŵanthu ayakine oganiza kuti kukonda ndalama kungaŵachitishe lini kunkhala na minkhalidwe iipa, koma kuli na mavuto ŵake. Baibolo yunena kuti: “Ŵanthu ofunishisha kulemela, opona mu mavuto na mu ukuka. Ove okashiwa na vilako-lako vinyinji voŵawonongesha.”—1 Timoteyo 6:9.
Kansi malangizo a m’Baibolo angatiyavye tyani pa nkhani ya ndalama?
Tikoyeja-yeja kunkhala na minkhalidwe iweme komasoti kukonkheja vayunena Baibolo pa nkhani ya ndalama, Mulungu akondwele nase ndipo atisiye lini. Ndipo Mulungu walonjeza ŵanthu amene umukondwelesha kuti: “nikusiye lini kapena kukutayani olo patontho.” (Aheberi 13:5, 6) Yove osimikijila kuti “munthu ochita vinthu mokhulupilika azafwane madaliso anyinji.”—Miyambo 28:20.
a M’Mabaibolo ayakine vesi yamene iyi imasuliliwa soti kuti: “kukonda ndalama ni muju wa voŵaŵa va ntundu uliwonse.”