Yaʼaga ira Samaduhuʼö Yehowa, maforege ba woloʼö famahaʼö nibeʼe Yesu hegöi nifalua ndra nifahaʼönia me föna. Ba duho daʼa, tola öʼila hadia manö nifaduhusima tödö.

1.   Lowalangi. Mafosumange Lowalangi sindruhu si ha samösa sotöi Yehowa, Fondrege Zabölö, Somböi fefu hadia ia. (Zinunö 83:19; Famaʼeleʼö 4:​11) Yaʼia andrö Lowalangi Gaberahamo, Moze, hegöi Yesu.​—2 Moze 3:6; 32:11; Yohane 20:17.

2.   Sura Niʼamoniʼö. Faduhu dödöma wa ösi Zura Niʼamoniʼö andrö oroisa Lowalangi ba niha. (Yohane 17:17; 2 Timoteo 3:​16) Teʼodane-dane waʼafaduhu dödöma ba zi 66 buku ba Zura Niʼamoniʼö, nifotöi ”Amabuʼula Li Siföföna” hegöi ”Amabuʼula Li si Bohou”. Tefaudu daʼö ba nifaduhuʼö Profesor Jason D. BeDuhn me itutunö sanandrösa khö ndra Samaduhuʼö Yehowa, wa ”teʼodane-dane waʼafaduhu dödöra hegöi lala wamosumangera Lowalangi ba zura Niʼamoniʼö, hewaʼae na lö nitatugöira ba wamobörö hadia geluaha nösinia”. a

   Hewaʼae na fao dödöma ba nösi Zura Niʼamoniʼö maʼafefu, hizaʼi tenga fundamentalis ndraʼaga. Faduhu dödöma wa so ösa nösi Zura Niʼamoniʼö sangogunaʼö ngawua wehede nifoʼamaedola mazui iʼogunaʼö dandra-tandra, ba tenga sindruhu geluahania daʼö.​—Famaʼeleʼö 1:1.

3.   Yesu. Maʼoʼö hadia nifahaʼö Yesu hegöi nifaluania. Mafosumange ia börö me yaʼia andrö Sangefaʼö ba Ono Lowalangi. (Mataiʼo 20:28; Halöwö Zinenge 5:​31) Daʼö mbörö wa lafotöi ndraʼaga niha Keriso. (Halöwö Zinenge 11:26) Hizaʼi, no mafahaʼö göi ndraʼaga ba Zura Niʼamoniʼö wa Yesu andrö tenga Lowalangi Fondrege Zabölö, ba lö hadöi ayati sanutunö sanandrösa ba wamahaʼö Lowalangi Sambua Tölu.​—Yohane 14:28.

4.   Famatörö Lowalangi. Daʼa sambua amatöröwa si so ba zorugo, tenga bakha ba dödö niha Keriso zamösana. Famatörö daʼa zangeheta amatöröwa niha ba ifalua gohitö dödö Lowalangi ba gulidanö. (Danieli 2:​44; Mataiʼo 6:​9, 10) Lö ara tö alua daʼa. No ifatunö khöda Sura Niʼamoniʼö wa no auri ita ba ”ngaluo safuria”.​—2 Timoteo 3:​1-5; Mataiʼo 24:​3-​14.

    Yesu zi tobali Razo ba Wamatörö Lowalangi. No ibörögö mamatörö ia ba zorugo me 1914.​—Famaʼeleʼö 11:15.

5.   Fangorifi. Tola teʼefaʼö ita moroi ba horö hegöi faʼamate börö höli nibeʼe Yesu. (Mataiʼo 20:28; Halöwö Zinenge 4:​12) Enaʼö tatema mbua moroi ba höli andrö, lö ibönö na ha mamati ita khö Yesu hizaʼi moguna göi tabulöʼö waʼaurida ba tebayagö idanö. (Mataiʼo 28:19, 20; Yohane 3:​16; Halöwö Zinenge 3:​19, 20) Oroma wamati zi samösa niha moroi ba mbua-buania. (Yakobo 2:​24, 26) Hewaʼae simanö, tenga daʼö geluahania wa no sinangea saʼae teʼorifi ita börö me no tafalua daʼö. Tola tasöndra wangorifi ha börö ”waʼasökhi dödö sebua moroi khö Lowalangi”.​—Galatia 2:​16, 21.

6.   Sorugo. Ba zorugo toröi Lowalangi Yehowa, Yesu Keriso hegöi ira malaʼika si lö faröi. b (Zinunö 103:19-​21; Halöwö Zinenge 7:​55) Ba zi so miföna, so ngawawa niha si lö atoto sauri ba zorugo si fao awö Yesu ba Wamatörö Lowalangi, faʼatora 144.000.​—Danieli 7:​27; 2 Timoteo 2:​12; Famaʼeleʼö 5:​9, 10; 14:​1, 3.

7.   Ulidanö. Ifazökhi gulidanö andre Lowalangi enaʼö tobali nahia niha sagötö faʼara. (Zinunö 104:5; 115:16; Zangombakha 1:4) Niha sangataʼufi Lowalangi, lö saʼae mofökhö ira dania ba auri ira sagötö faʼara ba gulidanö faradaiso.​—Zinunö 37:11, 34.

8.   Faʼalösökhi ba famakao. Ibörögö alua daʼa me so samösa malaʼika solawa Lowalangi. (Yohane 8:​44) Me no molawa malaʼika daʼa, lafotöi ia ”Satana” ba ”Afökha”. Ifarou dödö niha songambatö siföföna ba wolawa Lowalangi. Lua-luania göna göi fefu ngaʼötöra gabula dödö. (1 Moze 3:​1-6; Roma 5:​12) Enaʼö tola teʼasiwai gabula dödö nifobörö Zatana andre, itehegö Lowalangi alua zi lö sökhi hegöi famakao. Hizaʼi, iheta daʼö ba zi lö ara tö.

9.   Faʼamate. Niha si no mate, ba lö hadöi saʼae. (Zinunö 146:4; Zangombakha 9:​5, 10) Lö tefakao ira ba galitö narako.

    Ifuli isusugi Lowalangi niha si no mate si hauga miliar waʼato. (Halöwö Zinenge 24:15) Hizaʼi, na so si no tesusugi si lö omasi moloʼö goroisa Lowalangi, hasambalö tehori ira sagötö faʼara ba lö hadöi saʼae wanötönara enaʼö ifuli tesusugi.​—Famaʼeleʼö 20:14, 15.

10.   Fongambatö. Maʼoʼö goroisa Lowalangi sanandrösa ba wangowalu. No ihonogöi Lowalangi wa fangowalu andrö zamaböbö si samösa ira matua hegöi ira alawe. Ha sambua zi tobali dane-dane wa tola fabali zi faronga, yaʼia daʼö fohorö. (Mataiʼo 19:​4-9) Faduhu dödöma wa Sura Niʼamoniʼö tola tobali fanolo ba zi sambua wongambatö enaʼö ohahau dödöra ba waʼauri.​—Efeso 5:22–​6:1.

11.   Famosumange Lowalangi. Lö maʼogunaʼö röfa, adu, mazui gama-gama tanö böʼö ba wamosumange Lowalangi. (5 Moze 4:​15-​19; 1 Yohane 5:​21) Nifaluama na mafosumange Lowalangi:

    •   Mangandrö.​—Filifi 4:6.

    •   Mabaso ba mafahaʼö ndraʼaga ba Zura Niʼamoniʼö.​—Zinunö 1:​1-3.

    •   Maʼangerönusi zi no mafahaʼö yaʼaga ba Zura Niʼamoniʼö.​—Zinunö 77:13.

    •   Möiga ba gangowuloa mafalua wangandrö, mafahaʼö ndraʼaga ba Zura Niʼamoniʼö, manunö, ba faoma mafarou dödö nawöma.​—Kolose 3:​16; Heberaiʼo 10:23-​25.

    •   Manuriaigö ”turia somuso dödö” sanandrösa ba ”Wamatörö Lowalangi”.​—Mataiʼo 24:14.

    •   Matolo niha si göna abula dödö.​—Yakobo 2:​14-​17.

    •   Mafazökhi ba marorogö Balai Mbanua Lowalangi hegöi tomosa tanö böʼönia niʼogunaʼö ba wondrouʼö famahaʼö Zura Niʼamoniʼö ba zi sagörö ulidanö.​—Zinunö 127:1.

    •   Mabeʼe wanolo na alua bencana alam.​—Halöwö Zinenge 11:27-​30.

12.   Organisasi. No laföfögö ndraʼaga ba zi sambu-sambua banua niha Keriso. Ero sambua banua niha Keriso, so ndra satua sokubaloi sondrorogö. Hizaʼi, ira satua sokubaloi tenga simane ira fandrita. Lö lagazi ira. (Mataiʼo 10:8; 23:8) Lö hadöi si sambua niʼofulu hegöi ameʼela ba gangowuloama. (2 Korindro 9:7) Tola mafalua fefu halöwöma börö dolo-tolo si no aoha gölö fameʼe ba lö hadöi gangombakhata sanandrösa ba döi niha sameʼe dolo-tolo andrö.

     Latema wanuturu lala ira samaduhuʼö Yehowa ba zi sagörö ulidanö moroi khö ndra Boto Solohe sohalöwö ba gödo sebua, yaʼia daʼö ngawawa niha Keriso si lö atoto ba si no aro ba wamati.​—Mataiʼo 24:45.

13.   Fahasara Dödö. Ba zi sagörö ulidanö, teʼosambuaʼö ndraʼaga börö nifaduhusima tödö. (1 Korindro 1:​10) Maforege sibai enaʼö lö aboto wahasara dödöma hewaʼae na faböʼö mado, soi, mazui status sosial. (Halöwö Zinenge 10:34, 35; Yakobo 2:4) Hewaʼae simanö, lö tobali daha-tahama daʼö ba wangai angetula samösa. Dozi Samaduhuʼö Yehowa lahalö gangetula moloʼö dödöra side-ide si tefaudu ba goi-goi Zura Niʼamoniʼö.​—Roma 14:​1-4; Heberaiʼo 5:​14.

14.   Amuata. Maforege enaʼö fefu nifaluama teʼodane-dane ba waʼomasi. (Yohane 13:34, 35) Matimbagö wamalua si lö omasi Lowalangi. Duma-dumania, lö maʼogunaʼö do ba lala si fasala, yaʼia daʼö fanemaʼö transfusi darah. (Halöwö Zinenge 15:28, 29; Galatia 5:19-​21) Magohi waʼatulö ba lö fao ndraʼaga ba wasuwöta. (Mataiʼo 5:9; Yesaya 2:4) Mafosumange ndra samatörö ba maʼoʼö huku nibeʼera asala lö fatimba daʼö ba goroisa Lowalangi.​—Mataiʼo 22:21; Halöwö Zinenge 5:​29.

15.   Amakhaita ba niha böʼö. Imane Yesu, ”Omasiʼö nawöu simane faʼomasiu ndraʼugö.” Iwaʼö göi wa niha Keriso andrö ”tenga tana khö niha gulidanö”. (Mataiʼo 22:39; Yohane 17:16) Börö daʼö, maforege ’wamalua si sökhi ba niha fefu’. Hizaʼi, lö fao ndraʼaga ba politik ba lö falulu fohalöwö ndraʼaga ba agama tanö böʼö. (Galatia 6:​10; 2 Korindro 6:​14) Hewaʼae simanö, mafosumange gofu hadia ia nifalua niha böʼö sanandrösa ba daʼö.​—Roma 14:12.

 Na omasi öʼila nasa danö böʼö sanandrösa ba nifaduhusi tödö ndra Samaduhuʼö Yehowa, tola öbaso ba situs web khöma, hubungi fazambua gödo ndraha khöma, ondrasi gangowuloama ba Balai Mbanua Lowalangi sahatö ba mbanuamö, mazui öfalukhaisi fazamösa Samaduhuʼö Yehowa ba mbanua si toröi yaʼugö.