Fangaʼasogö kefe ba halöwö fanuriaigöma ba zi sagörö ulidanö tehalö moroi ba dolo-tolo si no aoha gölö fameʼe nibeʼe ndra Samaduhuʼö Yehowa. a No tehenaigö ba gangowuloama naha dolo-tolo. Lala tanö böʼö ba wameʼe tolo-tolo tola mufaigi ba halaman Tolo-Tolo. Tola ifili zi samösa niha, hadia omasi ibeʼe tolo-tolo soguna ba halöwöma ba zi sagörö ulidanö, ba mbanua niha Keriso mazui dombu-dombua manö.

 Lö irai lafaso ndra Samaduhuʼö Yehowa ba wameʼe sambua niʼofulu mazui lö nitatugöi hawaʼebua dolo-tolo nibeʼe moroi ba gazira. (2 Korindro 9:7) Lö irai maʼandrö ameʼela mazui kefe ba gangowuloama. Niha sangai halöwö ba gangowuloama lö irai laʼandrö gazira ba ginötö mufalua famayagö idanö, fogoʼo niha si no mate, fangowalu hegöi ba wamalua halöwö tanö böʼö soʼamakhaita ba agama. Lö irai mafamawa kue, mabokai bazar, mafalua gowasa, makaoni niha wemanga ba zi bongi soguna ba amal, mazui ba wamalua halöwö tanö böʼö si fakhili ba daʼö ha enaʼö teʼowuloi dolo-tolo. Ba lö irai göi maʼandrö dolo-tolo ba niha misa. Lö irai mufatunö mazui muʼombakhaʼö sanandrösa ba niha sameʼe dolo-tolo. (Mataiʼo 6:2-4) Lö hadöi iklan sangaʼasogö kefe ba situs web hegöi publikasima.

 Ero sambua mbanua niha Keriso Samaduhuʼö Yehowa, laʼombakhaʼö laporan keuangan ero waŵa ba gangowuloa, ba fefu niha tola möi ba gangowuloa andre. Enaʼö sökhi wangogunaʼö kefe, fefu banua niha Keriso lö tebulö lahaogö lasura gefe nitema hegöi niʼogunaʼö.​—2 Korindro 8:20, 21.

•   Naha dolo-tolo: Tola öbeʼe gefe mazui cek ba naha dolo-tolo si no tehenaigö ba Balai Mbanua Lowalangi, Balai Kebaktian, mazui ba nahia gangowuloama tanö böʼö.

•   Tolo-tolo online: Ba zi hawaʼoya soi, ba wameʼe tolo-tolo tola öʼogunaʼö kartu kredit, kartu debit, transfer elektronik, hegöi lala tanö böʼö ba online si so ba halaman ”Beʼe Dolo-tolo khö Ndra Samaduhuʼö Yehowa”. b Börö me so lala simane daʼö ba wameʼe tolo-tolo, so Zamaduhuʼö Yehowa sameʼe tolo-tolo si no muʼera-era ba labeʼe daʼö ero waŵa secara otomatis.​—1 Korindro 16:2.

•   Tolo-tolo si no muʼera-era: So ösa dolo-tolo sinangea muhaogö muʼangeragö sakali hegöi/mazui mufatunöisi khö penasihat hukum. Na no muhaogö muʼera-era, tola manö ötema mbua moroi ba sistem pajak si so ba soimö. Ato niha si no manema mbuania börö me no lahaogö laʼalui informasi sanandrösa ba wameʼe tolo-tolo si tola mubeʼe sagötö faʼaurira mazui na no mate ira. Enaʼö itugu oya öʼila informasinia, tola öhubungi gödo ndraha Samaduhuʼö Yehowa ba zi so yaʼugö na omasi öbeʼe dolo-tolo simane na öʼogunaʼö:

  •   rekening bank

  •   asuransi hegöi dana pensiun

  •   properti

  •   saham hegöi obligasi

  •   wasiat hegöi perwalian

 Enaʼö öʼila hewisa lala ba wameʼe tolo-tolo si no tehenaigö ba zi so yaʼugö, bokai halaman ”Beʼe Dolo-tolo khö Ndra Samaduhuʼö Yehowa”.