TAMACHTILIS 2
¿A̱ʼ yéj Dios?
1. ¿Té íga matiktajto̱lkakikan Dios?
Dios kichij nochi tejté̱. Wan yéj onoʼ desde nochipa wan nike̱man yawi mikiti (Salmo 90:2). De yéj wi̱ts nochi tajto̱l yej ye̱kti yej onoʼ pan Biblia (1 Timoteo 1:11). Iga Dios te̱chij, moneki matiktajto̱lkakikan wan matikweychi̱wakan. Pan Biblia kijtowa: «Tejsan Jehová, yej Dios de nejeme̱n, ye̱kti iga xikmajkui weymakalis wan weychi̱walis [...] iga téj tikchij nochi tejté̱, wan iga téj tikneʼ onokej wan tikchij nochi iní̱n» (Revelación o Apocalipsis 4:11).
2. ¿Welij tiki̱xmatij Dios?
Dios awelij tikitaj iga yéj ayéj ken tejeme̱n, yej tikpiáj toesyo wan tonakayo. Yéj se̱ espírituj. Niágaj ateyi ken yéj (Juan 1:18; 4:24). Welij tiki̱xmatij Dios kua̱ tikitaj «nochi yej yéj kichij». Kua̱ tikitaj nochi ita̱kilyo kuawimej wan xochi̱mej, iní̱n te̱nextiliá iga yéj te̱neki wan kipiá komati tamatilis. Wan nochi tejté̱ yej onoʼ ajko kine̱xtiá «itajpal [Dios] yej nike̱man tamis» (Romanos 1:20).
Welij no̱ tiki̱xmatij Dios kua̱ timomachtiáj Biblia. Nigaj te̱ijliá te̱ kineki Dios wan te̱ akineki, wan no̱ te̱nextiliá te̱ kichi̱wa Dios iga tejeme̱n wan kén kixtajmaka sekin tejté̱. Pan Biblia kijtowa: «Jehová te̱pale̱wiá iga yéj kimachiliá toyo̱lmiktilis wan ayá̱ kuejkuesiwi imaní̱n wan nike̱man te̱kajte̱wa iga te̱neki» (Salmo 103:8).
3. ¿Kipiá ito̱ka̱ Dios?
Jesús kijtoj: «Totaj, yej tonoʼ ajko, mamochipaktili moto̱ka̱» (Mateo 6:9). Dios kipiá se̱san ito̱ka̱. Wan iní̱n ayá̱ moijtowa ijko̱nsan pan seuʼmej tajto̱lmej. Pan tomelaʼ tajto̱l moijtowa ijko̱nsan ken español, Jehová, wan sekin no̱ ki̱xmatij ken Yavé. Pan Biblia kijtowa: «Iga nochi tajta̱gamej makimatikan, iga téj moto̱ka̱ Jehová, tejsan yej tonoʼ ma̱j ajko ipan nochi ta̱jli» (Salmo 83:18).
Pan komati Biblias kipatakej kan onoya ito̱ka̱ Dios, Jehová, wan kitalijkej Señor o Dios. Pero kua̱ moijkuiloj Itajto̱l Dios, iní̱n to̱ka̱, Jehová, nesiá siete mil biáj. Kua̱ Jesús tajtoj de Dios nochipa kijtoj iní̱n to̱ka̱, pan Juan 17:26 kijtoj: «Nej nikne̱xtilij yejeme̱n, moto̱ka̱, wan niá nikne̱xti̱ti».
4. ¿Te̱neki Dios?
Ijko̱nsan ken iní̱n te̱taj yej kineki ipiltsi̱n, Dios kineki iga matiye̱onokan nochipa
Siga Jehová te̱neki, ¿té íga onoʼ komati kualo̱lis wan yo̱lmiktilis? Sekin kijtowaj iga Dios te̱chiwiliá iní̱n iga ayá̱ tiktajto̱lkakij wan seuʼmej kijtowaj iga te̱chiwiliá iní̱n iga makita siga tiawij tiktajto̱lkakitij. Pero inó̱n ayéj melá̱. Tajto̱lti Santiago 1:13.
Jehová te̱kajte̱wa iga matikchi̱wakan yej tejeme̱n tiknekij. Pero ma̱j ye̱kti matitekipano̱kan iga Jehová (Josué 24:15). Pero, komatimej ayá̱ kichi̱waj iní̱n, sinoke kichi̱wiliáj yej aye̱kti seuʼmej, wan inó̱n iga onoʼ komati kualo̱lis wan yo̱lmiktilis. Jehová yo̱lkualo kua̱ kita nochi iní̱n tejté̱ yej aye̱kti. Tajto̱lti Génesis 6:5, 6.
Pan Biblia kijtowa: «Yej pan inemilis kiweymakaj Jehová, yéj kimati kén kiki̱xtiá pan tejté̱ yej aye̱kti» (2 Pedro 2:9). Yéj te̱neki wan kineki matipa̱kikan, inó̱n iga, yawi kitami̱ti kualo̱lis wan yej kichi̱waj yej aye̱kti, iní̱n ayá̱ onoʼ wejka. Jehová kimati té íga a̱man kikajte̱wa iga maono tejté̱ yej aye̱kti. Pan tamachtilis 8, tikitaskej té íga. Tajto̱lti 2 Pedro 3:7, 13.
5. ¿Kén welij timona̱techowaj ka̱n Dios?
Jehová te̱ijliá iga matimona̱techo̱kan (o matimoaxilti̱gan) ka̱n yéj, iní̱n tikchi̱waj kua̱ titajtowaj iwan. Yéj moyo̱lmiktiá iga sejse̱ de tejeme̱n (Salmo 65:2; 145:18). Wan yéj kelka̱wa tejté̱ yej aye̱kti yej tikchi̱waj, kua̱ kita iga timotekitiliáj iga matikchi̱wakan yej yéj kineki. Iní̱n kine̱xtiá iga aunke tejeme̱n imperfectos welij timona̱techowaj (o timoaxiltiáj) ka̱n yéj. Pan Biblia kijtowa: «Ximona̱techo̱kan ka̱n Dios wan yéj yawi mona̱techo̱ti ka̱n anmejeme̱n» (Santiago 4:8). Tajto̱lti Salmo 103:12-14.
Iga Dios te̱chij moneki iga yéj matiknekikan ma̱j ken niágaj (Marcos 12:30). Pan Biblia kijtowa: «Tikne̱xtiáj iga tiknekij Dios kua̱ tikchi̱waj yej yéj kijtowa» (1 Juan 5:3). Inó̱n iga kua̱ timomachtiáj de Dios wan tiktajto̱lkakij, tikne̱xtiáj iga tiknekij. Siga ijkó̱n tikchi̱waj timomachili̱skej ina̱ de Dios. Tajto̱lti 1 Timoteo 2:4.
