2 Akorintu 8:1-24
8 Vano anna, nnachuna wi musuwele sa mahala matokweene a Muluku yaawo avahiwe miloko so Maketoniya.
2 Variyari va ohooxeya, ohakalala waya wawaaca ni ohaawa waya otokweene waaheeriha wi waaca wa mahala aya otekhumeke.*
3 Tiwi, yeeyo awo yeenraaya waari mwawiiwanana ni owerya waya, aa, miyo kinnaweerela onamoona wi waari opwaha owerya waya;
4 mu ochuna waya, awo yaatitelela oniveka ni murima woothene, ekari ya ovaha mwa mahala, wi epake makupa mmuteko wa okhaviherya ntakhara aweela murima.
5 Nave yenreno opwaha mummo naaweheryaahu, woona wi yaapacenrye wiiveleela yaawo aneene wa Apwiya ni wa hiyo moorweela wa okhwela wa Muluku.
6 Mwawiihiiha, naamuceenyerya Titu wi, hiiha ntoko aapaceryinheiye muteko yoola variyari vanyu, owo tho onnaphwanela okwaaxa muteko ola wa okuxa yoovaha anyu ya mahala.
7 Hiiha ntoko muryaanyu ooreela mu soothene, mu nroromelo, mmasu, mmasuwelelo, mu wiilipixerya woothene, ni mu osivela wahu ntakhara nyuwo, mukhale tho ooreela vooloca sa yoovaha yeela ya mahala.
8 Kinaloca yeela ohiya ntoko nlamulo, nyenya wi koosuweliheeni sa wiilipixerya wa akina nave wi koone osivela wanyu waari weeparipari.
9 Tiwi, moosuwela mahala matokweene a Apwiya ahu Yesu Kristu, wi naamwi yaari ooreela, awo yaakhala oohaawa wa nthowa nanyu, wi nyuwo mukhale ooreela moorweela wa ohaawa waya.
10 Nave vooloca sa yeela, kinnavaha moonelo aka: Okhwaaniherya muteko yoola ti wamphurelo anyu, woona wi yooviravo eyaakha emoha ohiya pahiru mpacenrye muteko yoola, nyenya tho mwaahooniherya nchuno na weerano yeela.
11 Mwawiihiiha, vano mukwaaxe yeeyo mpacenryaanyu, wi oreheryeya wanyu wa okhaviherya okhwaaniheryeye mwawiiwanana ni mikhalelo sanyu.
12 Yamahala yoovahiwa ni murima woothene ti yaweemereryeya wa Muluku, woona wi Muluku onaweherya wi muchu avaheke mwawiiwanana ni yeeyo onaweryeiye, ohiya ni yeeyo ohinaweryeiye.
13 Ntakhara nkinachuna waakhweiherya akina, nave wookacamihaani nyuwo;
14 nyenya wi moorweela wa olikanyiha, soohalela sanyu iwerye waakhwaniherya soothowa saya, wi tho soohalela saya iwerye waakhwaniherya soothowa sanyu, nave mmukhalelo yoola onamukhalavo olikanela.
15 Hiiha ntoko erempwaaya: “Yoole aarino mwawaaca haancenoxa, nave yoole aarino vakhaani haarinoxa vakhaani.”
16 Ninnamuthamalela Muluku woona wi Titu ookhalano wuukhuwa omohamoha yoowo hiyo nryaahuno ntakhara nyuwo.
17 Tiwi, owo haakhulenle pahiru wa nthowa na nceenyeryo nahu, nyenya woona wi ootepa ochuna, owo oolakelela mwaneene orwa wooxekuryaani.
18 Nto hiyo ninnamurumiha yoowo vamoha ni munna yoowo onathamaleliwa mmiloko soothene wa nthowa na yeeyo onapakeiye ntakhara michaka saphaama.
19 Ohiya pahiru yeela, nyenya tho owo oothanliwa ni miloko wi akhale nthamwene ahu a vamukwahani anikhaviheryaka ni muteko yoola wa okawa* yoovaha ya mahala ntakhara ncicimiho na Apwiya ni wooniherya oreheryeya wahu wi nikhaviherye.
20 Ninneerano yeela wi nsepe ophwanyeriwa nthowa vooloca sa yooveleela yeela nnathokororyaahu.*
21 Tiwi, ‘ninnakhapelela ichu soothene moororomeleya, ohiya pahi vamiithoni va Yehova, nyenya tho vamiithoni va achu.’
22 Ohiya yeeyoru, vamoha ni yaawo ninnamurumiha munnihu yoowo nimweerenryaahu ikwaha sincipale nave noona wi ta mvai mmiyaha sincipale; nto vano owo onnooniherya okhala amvaixa wa nthowa na ororomela wawe otokweene oreiyeno mwa nyuwo.
23 Nyenya wakhala wi sookhalavo minikwa vooloca sa Titu, owo nthamwene aka* ni namuteko mukhwaaka ntakhara soochuna sanyu; naari, wakhala wi sookhalavo minikwa vooloca sa annihu, awo arummwa a miloko ni ncicimiho na Kristu.
24 Mwawiihiiha, mvahe sawooniherya sa osivela wanyu wa yaawo nave mooniherye wa miloko mathowa ananeeriha wiirumiha ntakhara nyuwo.
Inoota
^ Naari: “oyeeheyeke.”
^ Naari: “ohoolela.”
^ Naari: “nnahoolelaahu.”
^ Mu Ekriki, “mukhwaaka.”
