Othela onnapaka echoko evyaani. Naamwi nyuwaano mphwanelaka waasivela ni waacicimiha asitiithi anyu, oothelana anyu vano tori muchu oochuneyaxa veelaponi yavathi wa nyuwo. Akhweya ela enahaala okhala yoovila weemereryiwa ni amusi anyu akina. Nyenya malakiheryo a Piipiliya ananwerya wookhaviheryaani okhala oophimelela, mwawiihiiha nyuwaano munahaala okhapelela murecele ni amusi anyu vaavaa munalapaanyu mwakuru wi muteke onthamwene ovyaani mu echoko.

TIHEENI PIIPILIYA ONALOCEIYE: “Chichimiha atithiá ni amaiá.” (Aefeso 6:2) Moohipwacha iyaakha sanyu, munaphwanela waacicimiha asitiithi anyu. Musuwele wi oothelana anyu tho, ntoko mwaana, onnaphwanela ovaha ncicimiho wa asitiithi awe. “Osivela honakakamela,” mwawiihiiha muhikhale awoova onthamwene yoowo oothelana anyu oreiyeno ni yaawo.—1 Akorinto 13:4; Akalatiya 5:26.

TIHEENI MUNAPHWANELAANYU WEERA:

• Musepe oloca masu oonanara, ntoko “Amusi aa elukuluku yoothene hanakicicimiha” naari “Amai aa hetonko osiveliwa ni yeeyo kinapakaaka.”

• Mweererye woona ichu mmoonelo wa oothelana anyu.

TIHEENI PIIPILIYA ONALOCEIYE: “Mulopwana onamwahiyaka atithinya ni amannya, wi aphitàneke ni mwàriye nave òwèli anamukhalaka ntoko mutxhu mmoharu.” (Maphatxuwelo 2:24, BNM.) Vaavaa nyuwaano munathelaanyu, asitiithi anyu ananwerya woona wi nlelo aakhalano murici wa nyuwaano, nave awo ananwerya ochuna ovolowela othela wanyu opwaha anaphwanelaaya.

Ti yoothanla anyu ni oothelana anyu wi mulakane mweero yoowo munahaalaanyu otikitherya nave moosivela mwaaleele yaawo. Nyuwaano munaphwanela okhala oohuleya ni awookololowa muhiri oosama. (Masiposipo 15:1) Wiiyeviha, epewe, ni opixa murima onahaala wookhaviheryaani oteka onthamwene waphaama ni amusi anyu ni otitelela “olevelana mukina ni mukhwawe, musivela.”—Aefeso 4:2.

TIHEENI MUNAPHWANELAANYU WEERA:

• Wakhala wi munoona wi amusi anyu annavolowela vancipale mu okumi anyu, muthokororye ni oothelana anyu ichu siri soomaaleleya.

• Mwiiwanane vamoha vooloca sa mukhalelo munahaalaanyu othokororya miyaha seiho.