Tɛnɛ mɛ Ngbangɔ tɛnɛ na ndo kpale mɛ ba dungɔ na akwa nɛ?
Gbinya ti ya Ngbangɔ
Dungɔ na akwa alengbi ti lingɔ ya zo du na dengɔ bɛ wa lo sepala nga na dungɔ lɛ ngɛ̃́. Abɛta akwa ndo zangbi na popo tɛ la wa ala ndo sangbi nga ngunu bɛ la.—Masese 27:17.
Kanda Ngbangɔ kambisa nda mɛ ayɔ ya e du na kpengba lɛ na ngoi mɛ e ye pɔnangɔ akwa. Ni tɛnɛ hɛ̃ e ya dungɔ na asiɔ akwa alengbi ti hɛ̃ngɔ pɛnɔ. (Masese 13:20; 1 Kɔrinto 15:33) Akwa ti ngaso alengbi ti tongɔ zo ya lo mu ekateli ti siɔni bere lo gbɛ̃ aseliye tɛ lo ti nzɔ̃ni.
Na ya tɛnɛ mɛ e na bangɔ ahũnda mɛ:
Ye mɛ ndo li ya zo du nzɔ̃ kwa nɛ?
Ngbangɔ ndo tɛnɛ ya ayɔ ya anzɔ̃ akwa du na songo ti kpengbani ka popo tɛ la, songo niko alengbi ti dungɔ kpengbani aɔ aye zu mɛ ala ndo sepala na ni. Na ndakisa, Nzembo 119:63 atɛnɛ ya: “Mbi kwa azi zu mɛ ndo kpɛ mɔ a nga na azi mɛ ndo bata andia tɛ mɔ.” Hĩnga ya wa sungɔ Ngbangɔ mɛ tɛnɛ ya lo pɔnandó akwa mɛ ndo kpɛ lingɔ ye mɛ ta Nzapa ndo sepala na ni ma nga na azi mɛ ndo tɔndɔ andia tɛ lo.
Ngbangɔ kambisa nga aseliye mɛ kwa ti nzɔ̃ni lengbi ti dungɔ na ni. Na ndakisa:
“Bɛta kwa ndo ye fɔ̃ lo ngoi zu, wa lo du nga nyita mɛ adũ lo na ya angoi ti pɛnɔ.”—Masese 17:17.
“Ambanga akwa ndo gi lingɔ afɔ̃ la siɔni, kanda akwa mɛndɛ̃ ndo yengbi ɔngɔ ayata.”—Masese 18:24.
Avɛrsɛ niko ndo hɛ̃ e wangɔ ya kwa ti nzɔ̃ni ndo du mbilimbili, ndo du na songo, na nzɔ̃ bɛ wa lo ndo ka nga ye. Elengbi ti kpãngɔ bɛ e ndo kwa ti nzɔ̃ni ya lo na zangɔ e na ngoi mɛ etengbi na pɛnɔ. Bɛta kwa ndo du dã ti hɛ̃ngɔ e wangɔ na ngoi mɛ e ye dɔ̃ngɔ nɔ̃ na lége ti siɔni bere e ye mungɔ ekateli kɔi mɛ siɔni.—Masese 27:6, 9.
Ase lɛlo tɛ akwa ti nzɔ̃ni mɛ Ngbangɔ tɛnɛ tɛnɛ tɛ la nɛ?
Ngbangɔ na aselɛlo tɛ akwa ti nzɔ̃ni, ka popo tɛ la ala ndó na abulu mɛ akɛsɛnɛ, ala lo ka ndo na mɔmɛsɛnɔ mɛ kɛsɛnɛ nga na lo gbia mɛ kɛsɛnɛ. E ba selɛlo tɛ akwa taa ti ngaso.
Ruta na Naomi. Ruta dundó ya nyi Naomi, wa alengbi ti dungɔndó ya Naomi ndó kangba tɛ Ruta ti abulu gba. Hãngɔ ni zingɔ mɔmɛsɛnɔ ti kɔdɔrɔ tɛ Ruta aɔngbindó na tɛ Naomi. Abɛse ngaso ko, alandó na mangbi ti kpengbani wa ala yengbindó gba.—Ruta 1:16.
Davidi na Yonatana. Abɛse du ya Yonatana ndó kangba tɛ Davidi ti bulu 30 ko, Ngbangɔ tɛnɛ ya “Yonatana yendó Davidi ngama tɛrɛ lo nvɛ̃ni.”—1 Samwele 18:1.
Yezo na atoma tɛ lo. Yezo ndó na lo gbia na ndo atoma tɛ lo, lo ndó wa hangɔ la na ye nga gbia tɛ la. (Yoanɛ 13:13) Kanda ta lo ndo hũndó la mabere azi mɛ alengbi ti dungɔ akwa lo ma. Azi mɛndó ndo kpã wangɔ tɛ lo na kwa ko, ala ndo dundó akwa lo ti kpɔ̃ bɛ lo. Lo tɛnɛndó ya: “Mbi ili ĩ ya, ĩ afɔ̃ mbi, na lo mɛ ya, mbi fa ĩ na ye zu mɛ ndó mbi ma ka nyɔ To mbi.”—Yoanɛ 15:14, 15.
Zo lengbi ti dungɔ kwa Nzapa?
Ĩĩ, zo lengbi ti dungɔ kwa Nzapa. Ngbangɔ tɛnɛ ya: “Azi ti mbilimbili ndo du akwa Nzapa ti kpɔ̃ bɛ lo.” (Masese 3:32) Na tɛnɛ mɛndɛ̃, Nzapa ndo du kwa azi mɛ na seliye ti nzɔ̃ni, azi mɛ ndo du mbilimbili, mɛ na dɔngɔ nɔ ti nzɔ̃ni nga na azi mɛ ndo li kpengbani ti tɔndɔngɔ andia mɛ ba nzɔ̃ni na siɔni. Na ndakisa Ngbangɔ ili Abrahama ya kwa Nzapa.—2 Ntango 20:7; Yisaya 41:8; Zaki 2:23.
a Avɛrsɛ mɛndɛ̃ mɛ ka ndo lɛ ni nga na omɛ ge gbɛndani mɛ ndo tɛnɛ tɛnɛ ti “mɔ” ando fa Nzapa.
