“Na olo la adu ngoi mɛ ayɔ ya, e honzi zangangɔ mangbi wa sisiri du da. Na olo la du ngoi mɛ ayɔ ya, e du na kpengba lɛ ndo kpale ti to” Tɛnɛ mɛ António Guterres, Secrétaire général ti Nations Unies, tɛnɛ na lo ti to mɛ kaka popo tɛ azi ti Irak na Izraɛlɛ la, 13/04/2024.

 To mɛ ndo tiri tɛrɛ lo ndɛ ka Moyen-Orient, adu kɔi ti ato mɛ ndo li tɛrɛ lo na ndo lɛ gigi zu.

 “Ndɛ lo mɛ ko, nɔmbrɛ ti ato mɛ ndo li tɛrɛ lo na ndo lɛ gigi zu ati gba nvɛ̃ni ɔngɔ omɛndó ndo li tɛrɛ lo bandangɔ na to ti sɛ ti ndo lɛ gigi zu. Wa azi ɔngɔ 2 biliɔ̃ ndo hũ pɛnɔ na lo ni. Afa ya, se e mu azi siɔ ko, kɔi ka popo tɛ la tengbi na kpale ni.”— Conseil de sécurité des Nations unies, 26/01/2023.

 Akɔdɔrɔ mɛ to ndo tiri ka da kpengbani na olo: Israël, Gaza, Syrie, Azerbaïdjan, Ukraine, Soudan, Éthiopie, Niger, Myanmar nga na Haïti. a

 To na wɛngɔ gbanda lá kɔi? Agbia ti gigi olo alengbi ti kpangɔ siriri? Tɛnɛ mɛ Ngbangɔ tɛnɛ nɛ?

 Se mɛ to mu ndo ndɛ ge lɛ sese ndo fa ya, angbã yakere nda to zu kɔ. Ato niko ndo li ya, aprɔfesi ti ya Ngbangɔ mɛ aba ngoi mɛ e na ni ati na seni. Ngbangɔ ndo ili ngoi mɛ e da ya, “ngoi ti sese wɛngɔ.”—Matie 24:3.

•   “Ĩ na mangɔ pa ti to nga na tɛnɛ ti to. . . . Azi ti mbanga kɔdɔrɔ na afɔ̃ la ti kɔdɔrɔ mɛ ndɛ̃ atiri gbanda to, ambanga agbia abi gbanda to tɛrɛ afɔ̃ la.”—Matie 24:6, 7.

 Di bɛ li tɛnɛ mɛ “Elembo ya “mikolo ya nsuka,” to ‘ntango ya suka’ ezali nini?” ti nɛngɔ ya, mɔ hĩnga se mɛ to mɛ ndo tiri ndɛ li ya, aprɔfesi ti ya Ngbangɔ ati na seni.

 Ngbangɔ piandó tɛnɛ ya, to na wɛngɔ. Ni na lingɔ tɛrɛ lo ngasia? Ta azi la na onzingɔ ni ma, kanda Armagedona la na onzingɔ ni, ni du “to ti kota bi tɛ Nzapa mɛ Nvɛ̃ ngunu zu.” (Suma 16:14, 16) Na pɛ to ni ko, Nzapa na kokisangɔ kapa mɛndó ko hɛ̃ azi, wa ala na tingɔ na bɛta siriri.—Nzembo 37:10, 11, 29.

 Ti nɛngɔ ya, mɔ hĩnga kpale gba na ndo se mɛ to tɛ Nzapa “Etumba ya Armagedone ezali nini?”