Olutuwiliki okangundu okashona kAakriste ya pyokoka pambepo, mboka haya gandja omalombwelo kOonzapo dhaJehova muuyuni awuhe. Iilonga yawo oya kwatela mo iinima iyali:

•   Okutonatela nokulongekidha elongo ndyoka lya kankamena kOmbiimbeli okupitila miileshomwa, momakugongala nosho wo moosikola dhOonzapo dhaJehova. — Lukas 12:42.

•   Ohaya tonatele iilonga yomuuyuni awuhe yOonzapo dhaJehova, mokuwilika iilonga yokuuvitha nosho wo okutala nkene omayambidhidho ge na okulongithwa.

 Olutuwiliki ohalu landula omukalo ngoka gwa tulwa po ‘kaayapostoli nokaakuluntu yomuJerusalem’ yomethelemumvo lyotango, mboka ya li ya ningi omatokolo ga simana pehala lyegongalo alihe. (Iilonga 15:2) Ngaashi owala aalumentu mboka aadhiginini, iilyo yOlutuwiliki kayi shi nando aawiliki yehangano lyetu. Ohaya kongo ewiliko mOmbiimbeli, molwaashoka oya tseya kutya Jehova okwa langeka po Jesus Kristus e li Omutse gwegongalo. — 1 Aakorinto 11:3; Aaefeso 5:23.

 Iilyo yOlutuwiliki oyo: Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane nosho wo Jeffrey Winder. Ohaya longele koombelewa dhetu oonene moWarwick, shaNew York, moAmerika.

 Olutuwiliki olwa tota po ookomitiye hamano dhokutonatela iilonga yetu yi ili noyi ili, noshilyo kehe ohashi longo mokomitiye yimwe nenge dhi vulithe po.

•   Okomitiye yAaunganeki: Ohayi tonatele iinima yopaveta, ohayi ungaunga niiponga yopaunshitwe, niiningwanima yi na ko nasha nokuhepekwa kwOonzapo dhaJehova, omolwelongelokalunga lyadho nosho wo iinima yilwe yopaulumompumbwe mbyoka ya guma Oonzapo dhaJehova.

•   Okomitiye yOnkalonawa yaantu: Ohayi tonatele Aabetele.

•   Okomitiye yOkunyanyangidha: Ohayi tonatele iilonga yokunyanyangidha nokutuma iileshomwa yopaMbiimbeli, nohayi tungu Iinyanga yokugongalela, oombelewa dhokutoloka nosho wo iitayimbelewa.

•   Okomitiye yIilonga: Ohayi tonatele iilonga yetu yokuuvitha ‘elaka etoye lyOshilongo.’ — Mateus 24:14.

•   Okomitiye yOkulonga aantu: Ohayi longekidha iikulya yopambepo mbyoka hayi gandjwa okupitila momakugongala, moosikola nosho wo miikwamawi nuuvidio.

•   Okomitiye yOkunyola: Ohayi longekidha iikulya yopambepo mbyoka hayi gandjwa okupitila miileshomwa ya pilintwa, yi li kepandja lyetu lyokointaneta nohayi tonatele wo iilonga yokutoloka.

 Okutala kiilonga mbyoka hayi longwa okupitila mookomitiye ndhoka, Olutuwiliki ohalu gongala oshiwike kehe lu kundathane oompumbwe dhehangano. Uuna Olutuwiliki lwa gongala, ohalu kundathana shoka Omanyolo taga ti nokweetha ombepo ondjapuki yaKalunga yi ya wilike, sho taya ninga omatokolo. — Iilonga 15:25.

 Aakwatheli yOlutuwiliki oyo Aakriste aainekelwa mboka ya haya kwathele mookomitiye dhOlutuwiliki. (1 Aakorinto 4:2) Oye na uunongo nowino miilonga mbyoka hayi tonatelwa kokomitiye moka ye li nohaya kala pokugongala oshiwike kehe, hoka haku ningwa kokomitiye yawo. Nonando ihaya kutha ombinga mokuninga omatokolo, aakwatheli mbaka ohaya gandja omaetopo gomupondo nuuyelele wa gwedhwa po, ohaya tula miilonga omatokolo gokomitiye nohaya tala aluhe iizemo nehumokomeho lyomatokolo ngoka. Ohashi vulika wo ya tumwe kOlutuwiliki ya ka talele po aamwatate kiilonga yi ili noyi ili muuyuni nenge ya gandje iipopiwa piiningwanima ngaashi pokugongala kwokomumvo nenge pegandjo lyoonzapo dhosikola yaGilead.