बप्तिस्मा के हो?
बाइबलको जवाफ
येशूले गहिरो नदीमा बप्तिस्मा गर्नुभएको थियो। (मत्ती ३:१३, १६) त्यसैगरि एक जना इथियोपियाली पुरुषले धेरै पानी भएको ठाउँनेर पुगेपछि बप्तिस्मा गर्न चाहेका थिए। (प्रेषित ८:३६-४०) यसबाट के बुझिन्छ भने बप्तिस्मा गर्ने व्यक्तिलाई पानीमा चुर्लुम्मै डुबाएर बाहिर निकाल्नुपर्छ। a
बप्तिस्माको अर्थ
पानीमा बप्तिस्मा गर्नुले आफ्नो पुरानो जीवनशैलीलाई मारेर परमेश्वरप्रति समर्पित ख्रीष्टियनको रूपमा नयाँ जीवनको सुरुवात गर्नुलाई बुझाउँछ। त्यसैले बाइबलमा बप्तिस्मालाई गाड्नुसित तुलना गरिएको छ। (रोमी ६:४; कलस्सी २:१२) येशू ख्रीष्टको बलिदानमा विश्वास गरेको आधारमा हामीले सफा अन्तस्करण पाउन सकोस् भनेर परमेश्वरले बप्तिस्माको प्रबन्ध गर्नुभयो। (१ पत्रुस ३:२१) त्यसकारण येशूले उहाँका चेलाहरूले बप्तिस्मा गर्नै पर्छ भनेर सिकाउनुभयो।—मत्ती २८:१९, २०.
के पानीको बप्तिस्माले पाप पखाल्छ?
अहँ! पखाल्दैन। येशूले बगाउनुभएको रगतले मात्र हाम्रो पाप पखाल्न सक्छ भनी बाइबलले सिकाउँछ। (रोमी ५:८, ९; १ यूहन्ना १:७) येशूको बलिदानबाट लाभ उठाउन येशूमा विश्वास गर्नुपर्छ, उहाँको शिक्षाअनुसार चल्न आफ्नो जीवनशैली परिवर्तन गर्नुपर्छ र बप्तिस्मा गर्नुपर्छ।—प्रेषित २:३८; ३:१९.
के बाइबलले शिशु-बप्तिस्माबारे सिकाउँछ?
कुनै-कुनै चर्चमा शिशुको टाउकोमा पानी छम्केर वा खन्याएर “बप्तिस्मा” गरिन्छ र त्यही दिन उसको नाम पनि राखिन्छ। यस्तो गर्नुपर्छ भनेर बाइबलमा कहीं उल्लेख गरिएको छैन। ख्रीष्टियन बप्तिस्मा त “परमेश्वरको राज्यको सुसमाचार” बुझ्न सक्ने र विश्वास गर्ने व्यक्तिको लागि मात्र हो। (प्रेषित ८:१२) बप्तिस्माको लागि योग्य हुन परमेश्वरको वचन सुन्नु, स्वीकार्नु र पश्चात्ताप गर्नु आवश्यक छ, जुन शिशुहरूले गर्न सक्दैनन्।—प्रेषित २:२२, ३८, ४१.
साथै, परमेश्वरले उहाँको इच्छाअनुसार चल्ने ख्रीष्टियन आमाबाबुको छोराछोरीलाई पवित्र वा शुद्ध ठान्नुहुन्छ भनेर बाइबलले बताउँछ। (१ कोरिन्थी ७:१४) यदि शिशु-बप्तिस्मा आवश्यक हुँदो हो त आमाबाबुको विश्वासको आधारमा छोराछोरीलाई किन पवित्र वा शुद्ध ठान्नुपऱ्यो र? b
ख्रीष्टियन बप्तिस्माबारे गलत धारणा
गलत धारणा: बप्तिस्मा गर्न पानीमा पूरै डुब्नु पर्दैन, पानी छम्के वा खन्याए मात्र पुग्छ।
सत्य: बाइबलमा हरेक पटक बप्तिस्माबारे चर्चा गर्दा बप्तिस्मा गर्ने व्यक्तिलाई पानीमा चुर्लुम्मै डुबाएको विवरण पाइन्छ। उदाहरणको लागि चेला फिलिपले इथियोपियाली पुरुषलाई बप्तिस्मा गराउँदा तिनीहरू “पानीमा पसे” अनि त्यसपछि “पानीबाट निस्के” भनेर लेखिएको छ।—प्रेषित ८:३६-३९. c
गलत धारणा: फिलिप्पीको जेलरबारे बाइबलमा यस्तो बताइएको छ: ‘उनले र उनको घरमा हुनेजति सबैले बप्तिस्मा गरे।’ घरमा हुनेहरू जति सबैले बप्तिस्मा गर्दा शिशुहरूको पनि बप्तिस्मा गरिएको थियो।—प्रेषित १६:३१-३४.
सत्य: जेलर येशूको चेला भएको विवरणमा बताएअनुसार बप्तिस्मा गरेकाहरूले “यहोवाको वचन” बुझेका र तिनीहरू “अत्यन्तै रमाए” थिए। (प्रेषित १६:३२, ३४) यसबाट स्पष्ट हुन्छ, जेलरको घरमा हुनेहरूले बप्तिस्मा गर्दा शिशुहरू त्यसमा समावेश थिएनन् किनभने शिशुहरूले यहोवाको वचन बुझ्न सक्दैन थिए।
गलत धारणा: येशूले परमेश्वरको राज्य साना केटाकेटीजस्ता मानिसहरूकै हो भन्नुभयो। यसरी उहाँले शिशु-बप्तिस्माबारे सिकाउनुभयो।—मत्ती १९:१३-१५; मर्कूस १०:१३-१६.
सत्य: येशूले ती शब्दहरू भन्नुहुँदा उहाँले बप्तिस्माबारे सिकाइरहनु भएको थिएन। बरु परमेश्वरको राज्यको निम्ति योग्य हुन साना केटाकेटीजस्तै नम्र र सिक्न इच्छुक हुनुपर्छ भनिरहनु भएको थियो। —मत्ती १८:४; लूका १८:१६, १७.
a “बप्तिस्मा” भनी अनुवाद गरिएको शब्द “चोप्नु” अर्थ लाग्ने ग्रीक शब्दबाट लिइएको हो। थियोलोजिकल डिक्सनरी अफ द न्यु टेस्टामेन्ट, खण्ड १, पृष्ठ ५२९ हेर्नुहोस्।
b दी इन्टरनेसनल स्टाण्डर्ड बाइबल इन्साइक्लोपीडिया-अनुसार “नयाँ करारमा शिशु-बप्तिस्माबारे केही पनि उल्लेख गरिएको पाउँदैनौं।” बप्तिस्मा गर्दा पाप आफै पखालिन्छ भन्ने “गलत धारणा र बप्तिस्माको महत्त्वलाई बढाइचढाइ गरिएकोले” यो चलन चल्तीमा आएको हो भनेर पनि त्यसमा बताइएको छ।—खण्ड १, पृष्ठ ४१६-४१७।
c “(बाइबलमा) बप्तिस्मा” शीर्षक अन्तर्गत न्यु क्याथोलिक इनसाक्लोपीडिया यस्तो उल्लेख गर्छ: “प्रारम्भिक चर्चमा पानीमा चुर्लुम्म डुबाएर बप्तिस्मा दिइन्थ्यो भन्ने कुरा स्पष्ट छ।”—खण्ड २, पृष्ठ ५९
अन्य रोचक विषयहरू
बाइबलसम्बन्धी प्रश्नहरूको जवाफ
के सबै धर्म एउटै हो? सबैले ईश्वरलाई खुसी बनाउँछ?
बाइबलमा बताइएको दुई वटा कुराले यो पत्ता लगाउन मदत गर्छ।
बाइबलसम्बन्धी प्रश्नहरूको जवाफ
तपाईँ साँचो धर्म कसरी चिन्न सक्नुहुन्छ?
बाइबलले साँचो धर्मका नौ वटा विशेषताबारे बताउँछ।
बाइबलको महत्त्वपूर्ण शिक्षा
के परमेश्वरले सबै धर्म स्विकार्नुहुन्छ?
धेरै मानिसलाई जुनसुकै धर्म माने पनि केही फरक पर्दैन जस्तो लाग्छ।
बाइबलसम्बन्धी प्रश्नहरूको जवाफ
मुक्ति पाउनु भनेको के हो?
मुक्ति पाउने बाटो कुन हो? हामीले केबाट मुक्ति पाउँछौं?
बाइबलको शिक्षा
अध्ययन गर्न चाहनुहुन्छ कि?
एक जना यहोवाको साक्षीसित निश्शुल्क बाइबल अध्ययन गर्नुहोस्।