Papa un mama wat soo sin as air spëgel, daue måke wat sai inlëre. Duu kast ni luure dat dij kind dai wårhët sägt, wen’s duu selwst säge däist duu büst ni t’huus wen’s duu ni mit aim fortele wilst.

“Man kan ümer hööre dai lüür säge: ‘Dau måke wat ik sägt. Åwer ni wat ik måk!’ Åwer dat giwt ni richtig mit dai kiner. Dai kiner sin soo as esponja wat sich intreke ales wat wij måke un säge. Wen wij eer ain dail inlëre un daue anerd måke, sai daue oos dat säge.” – David

WAT SÄGT DAI BIJBEL? “Duu wat preege däist: “Dau ni steele”, steelst?” (Romanos 2:​21)

Dai kiner un dai juugende daue düler dai papa un mama nåmåke as dai andrer schaulekiner. Dårweegen jij papa un mama sin dai beste lüür taum juuch kiner inlëre måke wat richtig is. Åwer is wår dat jij måke muite wat jij inlëre daue.

“Man kan feel mål dai neemlige daile säge tau oos kiner ån waite of sai oos hööre daue. Awer wen’s duu ais ni mökst wat’s duu inlërst, sai daue dat glijk forståe. Dai kiner daue uppasse nå ales wat wij måke, sogår wen wij denke daue sai daue ni nå oos uppasse.” – Nicole

WAT SÄGT DAI BIJBEL? “Åwer dai klaukhët fon båwen is airst rëgen.” (Tiago 3:​17)

Dau andenke wat dij leewend lenke däit. Wat däist duu gërn ine televison kijke? Wosoo däist duu dijn familg behandle? Mit wat fon lüür häst duu ümgang? Däist duu dij bekümre mit dai andrer? Taulätst, dau dij fråge: Bün ik dai mësch wat ik luur mij kind schal sin?

“Ik un mij kërl daue ni oos kiner andrijwe taum daile måken wat wij ni måke daue.” – Christine

Wen’s duu wat forkërd mökst, forlang forgeewen. Dijn kiner waite dat’s duu uk wat forkërd mökst. Wen’s duu forgeewen forlange däist tau dijn familg, wen dat nöörg is, sai daue dijn gewöönligkët un reälligkët nåmåke.

“Oos kiner muite oos hööre forgeewen forlange wen wij forkërd sin. Wen wij dat ni måke, sai koine eer forkërde daile forsteeke.” – Robin